தமிழ்நாட்டின் புதிய முதலமைச்சராக தமிழக வெற்றிக் கழக தலைவர் சி.ஜோசப் விஜய் மே 10 அன்று சென்னை ஜவஹர்லால் நேரு உள்விளையாட்டு அரங்கில் பதவியேற்றுக் கொண்ட சில மணி நேரங்களுக்குள் மூன்று முக்கிய அரசாணை கோப்புகளில் கையெழுத்திட்டார். அவற்றில் ஒன்று, மாநிலத்தை போதைப்பொருள் இல்லாத தமிழ்நாடாக மாற்றும் நோக்கில் 65 போதைப்பொருள் தடுப்புப் படை பிரிவுகளை அமைக்கும் உத்தரவு ஆகும். அதன்படி, தமிழ்நாட்டின் 37 மாவட்டங்களில் ஒவ்வொன்றுக்கும் ஒரு போதைப்பொருள் தடுப்பு காவல் நிலையம் மற்றும் 9 மாநகரக் காவல் மாவட்டங்களில் தலா ஒன்று என மொத்தம் 65 சிறப்பு போதைப்பொருள் தடுப்புப் படை பிரிவுகள் உருவாக்குவதற்கான அரசாணையும் சமீபத்தில் வெளியிடப்பட்டது. 

மற்றொருபுறம் 717 டாஸ்மாக் கடைகளையும் மூட விஜய் உத்தரவிட்டுள்ளது தமிழக மக்களிடையே ஆதரவை பெற்று வருகிறது. இப்படி தமிழகத்தை போதையில்லா மாநிலமாக்க தவெக முயன்று வரும் அதே சமயத்தில் சென்னையில் வீட்டு மாடியிலேயே தவெக ஆதரவாளர் ஒருவர் கஞ்சா செடிகளை வளர்த்த சம்பவம் பேரதிர்ச்சியை ஏற்படுத்தியுள்ளது.

சென்னை புதுவண்ணாரப்பேட்டையில் இந்த சம்பவம் நடந்திருக்கிறது. தவெக ஆதரவாளரான எட்வின் ராஜ் பிரண்டோ (35) என்பவர் வீட்டின் பால்கனியில் வைத்து கஞ்சா செடியை வளர்த்து வந்திருக்கிறார். கஞ்சா செடியை யாரும் பார்க்காத வகையில் துணி போட்டு மூடி வைத்திருந்தாலும், அதன் வாசனை அக்கம் பக்கத்தினருக்கு காட்டிக்கொடுத்துள்ளது. கஞ்சா செடியின் பூக்கள் வழக்கமான பூக்களைப் போல் அல்லாமல் அழுகிய முட்டைகோஸ் போல் நாற்றம் வீசக்கூடியது எனக்கூறப்படுகிறது. 

இதையும் படிங்க: நெல்லை மக்களுக்காக பாடுபடுவேன்..! என்னை நம்புங்க..! MLA ஆர்.எஸ். முருகன் உறுதி..!

இதுகுறித்து அக்கம் பக்கத்தினர் போலீசாருக்கு தகவல் கொடுக்கவே, விரைந்து வந்த காவல்துறையினர் எட்வின் ராஜ் பிரண்டோ வீட்டை தீவிரமாக சோதனையிட்டனர். அங்கு கஞ்சா செடி வளர்க்கப்பட்டுள்ளதைக் கண்ட போலீசார் அதனை பறிமுதல் செய்ததோடு, தவெக ஆதரவாளரையும் கைது செய்தனர். போதையை ஒழிப்பேன் என வாக்குறுதி கூறி ஆட்சிக்கு வந்த தவெக ஆதரவாளரே இப்படி கஞ்சா சாகுபடியில் ஈடுபடலாமா? என சோசியல் மீடியாக்களில் கடும் விமர்சனம் எழுந்துள்ளது. 
 

இதையும் படிங்க: மகளிருக்கு மாதம் ரூ.2,500 எப்போது? - தவெக அமைச்சர் சி.டி.ஆர். நிர்மல் குமார் கொடுத்த முக்கிய அப்டேட்...!