தமிழ்நாடு சட்டப்பேரவையில் தொகுதி மறுவரையறைக்கு எதிராக முதலமைச்சர் விஜய் முன்மொழிந்த அரசினர் தனித்தீர்மானத்திற்கு திமுக வரவேற்பு தெரிவித்துள்ளது.

பேரவையில் பேசிய எதிர்க்கட்சித் தலைவர் உதயநிதி ஸ்டாலின், “தொகுதி மறுவரையறையால் தமிழ்நாட்டின் பிரதிநிதித்துவம் எந்த வகையிலும் குறையக்கூடாது என்பதுதான் திமுகவின் நிலைப்பாடு” எனத் தெரிவித்தார்.

2026-ம் ஆண்டு மக்கள் தொகை கணக்கெடுப்பின் அடிப்படையில் தொகுதி மறுவரையறை செய்யப்பட்டால் தமிழ்நாட்டின் நாடாளுமன்றத் தொகுதிகளின் எண்ணிக்கை குறையக்கூடிய ஆபத்து இருப்பதாக அவர் கூறினார்.

இதையும் படிங்க: "உதயநிதி கைதுக்கு காட்டிய வேகம் போல்..." - லிஸ்ட் போட்டு விஜயை விளாசிய ஆர்.பி.உதயகுமார்...!

மேலும், தொகுதி மறுவரையறை காரணமாக தமிழ்நாட்டின் பிரதிநிதித்துவம் குறைக்கப்படக்கூடாது என வலியுறுத்தி, ஏற்கனவே 2024-ம் ஆண்டிலேயே தீர்மானம் நிறைவேற்றப்பட்டதாக உதயநிதி ஸ்டாலின் தெரிவித்தார்.

இந்த விவகாரத்தின் பாதிப்புகள் குறித்து தென் மாநில முதலமைச்சர்களுக்கு திமுக தலைவர் கடிதம் எழுதியதாகவும், 7 மாநில முதலமைச்சர்களிடம் தொகுதி மறுவரையறையின் ஆபத்துகளை எடுத்துரைத்ததாகவும் அவர் கூறினார். மேலும், சென்னையில் Join Action Committee உருவாக்கப்பட்டு, தொகுதி மறுவரையறைக்கு எதிரான நடவடிக்கைகள் மேற்கொள்ளப்பட்டதாகவும் தெரிவித்தார்.

தொகுதி மறுவரையறைக்கு எதிராக திமுக நடத்திய போராட்டங்களும், நாடாளுமன்றத்தில் தெரிவித்த எதிர்ப்புகளுமே முந்தைய மசோதா தோல்வியடைய முக்கிய காரணம் என்றும் உதயநிதி ஸ்டாலின் கூறினார். தற்போது மீண்டும் அந்த மசோதாவைக் கொண்டுவர மத்திய அரசு முயற்சித்து வருவதாகவும் அவர் தெரிவித்தார்.

அதேநேரத்தில், மகளிருக்கு 33 சதவீத இடஒதுக்கீடு வழங்குவதற்கு திமுக முழுமையான ஆதரவு அளிப்பதாகவும், மகளிர் இடஒதுக்கீடு மசோதாவை வரவேற்பதாகவும் உதயநிதி ஸ்டாலின் தெரிவித்தார்.

மேலும், முதலமைச்சர் விஜய் கொண்டு வந்துள்ள அரசினர் தனித்தீர்மானத்தையும் திமுக வரவேற்பதாகவும், அரசு கொண்டு வந்துள்ள இரண்டு தீர்மானங்களுக்கும் திமுக தனது ஆதரவைத் தெரிவிப்பதாகவும் அவர் பேரவையில் கூறினார்.

இதையும் படிங்க: தென் மாநிலங்களுக்கு ஆபத்து... சட்டப்பேரவையில் கர்ஜித்த சி.எம்.விஜய்... தொகுதி மறுவரையறைக்கு கடும் எதிர்ப்பு...!