டெல்லி: ஹார்முஸ் ஜலசந்தியில் கப்பல் போக்குவரத்து இயல்பு நிலைக்குத் திரும்பி வருவதால் உலக சந்தையில் கச்சா எண்ணெய் விலை கணிசமாக சரிந்துள்ளது. கடந்த நான்கு மாதங்களில் இல்லாத அளவுக்கு விலை வீழ்ச்சி ஏற்பட்டிருப்பது உலக நாடுகளின் முதலீட்டாளர்கள் மத்தியில் பெரும் நிம்மதியை ஏற்படுத்தியுள்ளது.

ஈரான் மற்றும் அமெரிக்கா இடையே ஏற்பட்ட அமைதி ஒப்பந்தத்தைத் தொடர்ந்து ஹார்முஸ் ஜலசந்தி வழியாக வர்த்தகக் கப்பல்கள் சீராக இயங்கத் தொடங்கியுள்ளன. இதனால் ஈரான் எண்ணெய் ஏற்றுமதி வாய்ப்புகள் அதிகரித்துள்ளன. இந்த நிலைமை உலக சந்தையில் எண்ணெய் விநியோகம் அதிகரிக்கும் என எதிர்பார்ப்பை ஏற்படுத்தியுள்ளது.

இன்று உலகளாவிய பெஞ்ச்மார்க் பிரெண்ட் கச்சா எண்ணெய் விலை ஒரு பேரலுக்கு 1.37 டாலர் சரிந்து 75.71 டாலராகக் குறைந்துள்ளது. பிப்ரவரி 27ஆம் தேதிக்குப் பிறகு இது மிகக் குறைந்த விலையாகும். அதேபோல், அமெரிக்காவின் வெஸ்ட் டெக்சாஸ் இண்டர்மீடியட் (WTI) கச்சா எண்ணெய் விலை ஒரு பேரலுக்கு 1.08 டாலர் சரிந்து 72.13 டாலராகக் குறைந்துள்ளது. 

இதையும் படிங்க: ஹார்முஸ் ஜலசந்தியை கடந்து வந்த 30 இந்திய கப்பல்கள்! சீரானது போக்குவரத்து!! ஹாப்பி நியூஸ்!

ராய்ட்டர்ஸ் உள்ளிட்ட சர்வதேச ஊடகங்கள் தெரிவிக்கும் தகவலின்படி, ஹார்முஸ் ஜலசந்தியில் போக்குவரத்து சீரடைந்தது மற்றும் ஈரான் எண்ணெய் சந்தைக்கு திரும்ப வாய்ப்பு அதிகரித்துள்ளது ஆகியவைதான் இந்த விலைச் சரிவுக்கு முக்கிய காரணம் என நிபுணர்கள் கூறுகின்றனர்.

ஹார்முஸ் ஜலசந்தி உலகின் மிக முக்கிய எண்ணெய் போக்குவரத்து பாதையாகும். உலகின் பெரும்பாலான எண்ணெய் வர்த்தகம் இந்தப் பாதையின் வழியாகவே நடைபெறுகிறது. கடந்த சில மாதங்களாக இங்கு ஏற்பட்ட பதற்றம் காரணமாக கப்பல் போக்குவரத்து பாதிக்கப்பட்டு, எண்ணெய் விலை உயர்ந்திருந்தது. தற்போது அந்தப் பதற்றம் குறைந்துள்ளதால் விலை சரிவு ஏற்பட்டுள்ளது.

இந்தியா போன்ற எண்ணெய் இறக்குமதி செய்யும் நாடுகளுக்கு இது நல்ல செய்தியாகப் பார்க்கப்படுகிறது. பெட்ரோல், டீசல் உள்ளிட்ட எரிபொருள் விலைகள் மீதான அழுத்தம் குறைய வாய்ப்பு உள்ளது. இருப்பினும், சர்வதேச சந்தை நிலவரம் மாறக்கூடிய சூழலில், இந்திய அரசு தொடர்ந்து கண்காணித்து வருகிறது.

உலகப் பொருளாதாரம் மீதான எண்ணெய் விலையின் தாக்கம் மிக முக்கியமானது. தற்போதைய சரிவு பல்வேறு துறைகளுக்கு நிம்மதியை அளித்துள்ளது. அடுத்த சில நாட்களில் விலை மேலும் சரியுமா அல்லது ஏறுமா என்பதை சந்தை போக்கு தீர்மானிக்கும். 

இதையும் படிங்க: ஹார்முஸை கடந்து இந்தியா வரும் எண்ணெய் கப்பல்கள்!! குட்நியூஸ் சொன்னது மத்திய அரசு!