அமெரிக்க படைகள் அட்லாண்டிக் கடலில் ரஷ்யக் கொடியுடன் சென்ற எண்ணெய் டேங்கரை பறிமுதல் செய்த சம்பவம் சர்வதேச அளவில் பரபரப்பை ஏற்படுத்தியுள்ளது. இந்த டேங்கரில் 3 இந்தியர்கள் உட்பட 28 பேர் கொண்ட குழு இருந்ததாக தகவல்கள் தெரிவிக்கின்றன.

இந்த சம்பவம் வெனிசூலா தொடர்பான அமெரிக்க தடைகளை மீறியதாக குற்றச்சாட்டப்பட்டுள்ளது. ஜனவரி 7 அன்று வட அட்லாண்டிக் கடலில் ஐஸ்லாந்து அருகே இந்த பறிமுதல் நடைபெற்றது. 'மரினேரா' என்று பெயரிடப்பட்ட இந்த டேங்கர், முன்பு 'பெல்லா 1' என்று அழைக்கப்பட்டது. இது கயானா கொடியுடன் பயணித்து, கடந்த டிசம்பர் 24, 2025 அன்று ரஷ்யக் கொடியின் கீழ் மாற்றப்பட்டது.

வெனிசூலாவில் இருந்து சட்டவிரோதமாக எண்ணெய் ஏற்றிச் சென்றதாக அமெரிக்கா குற்றம்சாட்டியுள்ளது. இது 'ஷேடோ ஃப்ளீட்' எனப்படும் சட்டவிரோத கப்பல்களின் ஒரு பகுதி எனக் கூறப்படுகிறது. இரண்டு வாரங்களுக்கும் மேலாக கரீபியன் கடலில் அமெரிக்க கடற்படை தடுப்பை மீறி தப்பிய இந்த டேங்கர், அட்லாண்டிக் கடலில் தொடர்ந்து துரத்தப்பட்டது. 

இதையும் படிங்க: விசா சேவை ரத்து..!! வங்கதேச அரசு அதிரடி அறிவிப்பு..!! இந்தியர்களுக்கு புதிய கட்டுப்பாடு..!!

அமெரிக்க சிறப்புப் படைகள் கப்பலை பறிமுதல் செய்தனர். இதன்போது ரஷ்ய நீர்மூழ்கிக் கப்பல் அருகில் இருந்தபோதிலும், எந்த மோதலும் ஏற்படவில்லை. ரஷ்ய போக்குவரத்து அமைச்சகம், கப்பலுடன் தொடர்பு துண்டிக்கப்பட்டதாக தெரிவித்துள்ளது. குழு உறுப்பினர்களில் 17 உக்ரைன் நாட்டவர்கள், 6 ஜார்ஜியர்கள், 3 இந்தியர்கள் மற்றும் 2 ரஷ்யர்கள் உள்ளனர்.

இந்தியர்களின் பெயர்கள் அல்லது விவரங்கள் வெளியாகவில்லை. அவர்கள் அனைவரும் தடுப்புக்காவலில் வைக்கப்பட்டுள்ளனர். மேலும் ரஷ்யா இதை 'வெளிப்படையான கொள்ளை' எனக் கண்டித்துள்ளது. இதுதொடர்பாக ரஷ்ய வெளியுறவு அமைச்சகம் வெளியிட்ட அறிக்கையில், "சர்வதேச கடல் சட்டத்தை அமெரிக்கா மீறியுள்ளது. ரஷ்ய குடிமக்களுக்கு மனிதாபிமான சிகிச்சை அளிக்க வேண்டும்" என்று கூறியுள்ளது.

இந்த சம்பவம் வெனிசூலா மீதான அமெரிக்க அழுத்தத்தின் ஒரு பகுதியாகும். சமீபத்தில் வெனிசூலா அதிபர் நிக்கோலஸ் மடுரோவை அமெரிக்க சிறப்புப் படைகள் கைது செய்தன. அமெரிக்க பாதுகாப்பு செயலர் பீட் ஹெக்செத், "வெனிசூலா எண்ணெய் தடை உலகம் முழுவதும் அமலில் உள்ளது" என்று X தளத்தில் பதிவிட்டார். அதேநாள், பனாமா கொடியுடன் சென்ற 'எம் சோபியா' என்ற மற்றொரு டேங்கரும் அமெரிக்காவால் பறிமுதல் செய்யப்பட்டது.

இது சீனாவுக்கு எண்ணெய் கொண்டு சென்றது. இந்த நடவடிக்கைகள் வெனிசூலாவின் எண்ணெய் ஏற்றுமதியை தடுக்கும் அமெரிக்காவின் உத்தியின் ஒரு அங்கமாகும். இந்திய அரசு இதுவரை அதிகாரப்பூர்வ அறிக்கை வெளியிடவில்லை. ஆனால், இந்தியர்களின் பாதுகாப்பு குறித்து விசாரணை நடைபெறலாம் என எதிர்பார்க்கப்படுகிறது.

இச்சம்பவம் ரஷ்யா-அமெரிக்கா உறவில் மேலும் பதற்றத்தை ஏற்படுத்தியுள்ளது. சர்வதேச கடல் சட்டங்கள் மீறப்பட்டதாக ரஷ்யா குற்றம்சாட்டியுள்ளது. இந்த பறிமுதல், 2019 முதல் அமெரிக்காவால் விதிக்கப்பட்ட தடைகளின் தொடர்ச்சியாகும். வெனிசூலாவின் எண்ணெய் வளங்களை கட்டுப்படுத்த அமெரிக்கா முயல்வதாக விமர்சனங்கள் எழுந்துள்ளன. பிரிட்டன் போன்ற நாடுகள் இதுகுறித்து கருத்து தெரிவிக்க மறுத்துள்ளன.

இதையும் படிங்க: ரஷ்ய ராணுவத்தில் கட்டாயப்பணி: 26 இந்தியர்கள் உயிரிழப்பு; 7 பேர் மாயம் - மத்திய அரசு தகவல்!