2026 தமிழ்நாடு சட்டமன்றப் பொதுத் தேர்தலை நேர்மையாகவும், அமைதியாகவும் நடத்துவதற்காக தலைமை தேர்தல் அதிகாரி (CEO) அர்ச்சனா பட்நாயக் தலைமையில் சென்னையில் உள்ள தேர்தல் அலுவலகத்தில் நான்கு முக்கிய கண்காணிப்பு மற்றும் கட்டுப்பாட்டு மையங்கள் செயல்பட்டு வருகின்றன. இந்த மையங்கள் தேர்தல் நடத்தை விதிகளை (Model Code of Conduct - MCC) கடுமையாகக் கண்காணித்து, மீறல்களுக்கு உடனடி நடவடிக்கை எடுக்க உதவுகின்றன.

முதலாவதாக, மாநில ஊடகக் கண்காணிப்புக் கட்டுப்பாட்டு அறை அமைக்கப்பட்டுள்ளது. இங்கு இரண்டு மாவட்ட வருவாய் அலுவலர்கள் (DROs) உட்பட 15 பேர் கொண்ட குழு பணியாற்றுகிறது. அச்சு ஊடகம், தொலைக்காட்சி, ரேடியோ போன்ற மின்னணு ஊடகங்கள் மற்றும் சமூக ஊடக தளங்களை (ஃபேஸ்புக், எக்ஸ், இன்ஸ்டாகிராம் உள்ளிட்டவை) தொடர்ச்சியாக கண்காணிக்கின்றனர்.

வெறுப்புப் பேச்சு, தவறான செய்திகள், கட்டணச் செய்திகள் (Paid News) மற்றும் தேர்தல் விதி மீறல்கள் கண்டறியப்பட்டால், Media Tracker இணையதளம் வழியாக உடனடியாக சம்பந்தப்பட்ட மாவட்ட அதிகாரிகளுக்கு தெரிவிக்கப்படுகிறது. இதுவரை 437 சமூக ஊடகப் புகார்கள், 129 அச்சு ஊடகப் புகார்கள் மற்றும் 100 மின்னணு ஊடகப் புகார்கள் பெறப்பட்டு தீர்வு காணப்பட்டுள்ளன.

இதையும் படிங்க: நாளை கோவை வருகிறார் பிரதமர் மோடி! – அமித்ஷாவின் சிவகிரி ரோடு ஷோ விபரங்களை வெளியிட்டார் நயினார் நாகேந்திரன்!

இரண்டாவதாக, வாகனக் கண்காணிப்பு மற்றும் cVIGIL புகார்களுக்கான 24x7 GPS கட்டுப்பாட்டு அறை இயங்கி வருகிறது. இரண்டு மாவட்ட வருவாய் அலுவலர்கள் தலைமையில் 30 பேர் கொண்ட குழு, பறக்கும் படை வாகனங்கள், நிலையான கண்காணிப்புக் குழுக்கள், காணொளி கண்காணிப்பு வாகனங்கள், EVM மற்றும் VVPAT இயந்திரங்களை ஏற்றிச் செல்லும் வாகனங்கள் உள்ளிட்டவற்றின் GPS இருப்பிடத்தை நேரலை கண்காணிப்பு செய்கிறது.

cVIGIL மொபைல் ஆப் மூலம் வரும் புகார்களும் இங்கு உடனடியாக கையாளப்படுகின்றன. தேர்தல் செலவினங்கள் தொடர்பான சந்தேகங்களையும் இந்த அறை தீர்க்கிறது. மார்ச் 15, 2026 முதல் செயல்படும் இந்த மையத்தில், ஏப்ரல் 21 வரை 5,859 புகார்கள் பெறப்பட்டு முடிவு செய்யப்பட்டுள்ளன.

மூன்றாவதாக, மாநிலத் தொடர்பு மையம் (State Contact Centre - SCC) 24 மணி நேரமும் செயல்படுகிறது. 30 பேர் கொண்ட குழு, கட்டணமில்லா தொலைபேசி எண் 1800-425-21950 வழியாக பொதுமக்களின் புகார்களைப் பெற்று நடவடிக்கை எடுக்கிறது. மாவட்ட அளவில் “மாவட்டத் தொடர்பு மையம் 1950” என்ற எண்ணில் (மாவட்ட STD குறியீட்டுடன்) இதேபோன்ற சேவை வழங்கப்படுகிறது. இதுவரை சுமார் 21,657 புகார்கள் பெறப்பட்டு தீர்வு காணப்பட்டுள்ளன.

நான்காவதாக, தலைமைத் தேர்தல் அதிகாரி அலுவலகக் கட்டுப்பாட்டு அறை ஏப்ரல் 20, 2026 முதல் செயல்படத் தொடங்கியுள்ளது. 18 மாவட்ட வருவாய் அலுவலர்கள் மற்றும் அவர்களது குழுவினர் இங்கு பணியில் ஈடுபட்டுள்ளனர். மாநிலம் முழுவதும் உள்ள 75,064 வாக்குச் சாவடிகளில் உள்ளே ஒன்று, வெளியே ஒன்று என மொத்தம் 1,50,128 காணொலிக் கருவிகள் மூலம் நேரடி ஒளிபரப்பு (Live Webcasting) ஏற்பாடு செய்யப்பட்டுள்ளது.

தேர்தல் நாளில் இந்த ஒளிபரப்புகளை கண்காணித்து, மாவட்ட தேர்தல் அலுவலர்களிடமிருந்து அறிக்கைகளைப் பெற்று ஒருங்கிணைக்கும் பணியை இவர்கள் மேற்கொள்வர். தலைமை தேர்தல் அதிகாரி அர்ச்சனா பட்நாயக், “தேர்தல் திருவிழா - தமிழ்நாட்டின் பெருவிழா” என்று வர்ணித்துள்ள இந்த ஏற்பாடுகள், தேர்தல் செயல்முறையை வெளிப்படையாகவும், நம்பகத்தன்மையுடனும் நடத்த உதவும். பொதுமக்கள் cVIGIL ஆப் மற்றும் தொடர்பு மையங்கள் வழியாக புகார்களை அளித்து தேர்தல் நேர்மையை உறுதி செய்யலாம் என்று அவர் வலியுறுத்தியுள்ளார்.

இதையும் படிங்க: சென்னை சென்ட்ரலில் ரூ.23.50 லட்சம் பறிமுதல்! ரயில்வே பாதுகாப்பு படை அதிரடி!