தமிழக பாஜகவில் முன்னாள் மாநிலத் தலைவராக இருந்த அண்ணாமலை சுற்றி கடந்த சில நாட்களாக பல ஊகங்கள் எழுந்து கொண்டிருந்த நிலையில், அவர் திடீரென டெல்லி புறப்பட்டுச் சென்றிருப்பது பெரும் பரபரப்பை ஏற்படுத்தியுள்ளது. 

தேர்தல் பிரசாரத்தின் நடுவே அவசர அவசரமாக கார், ஹெலிகாப்டர், தனி விமானம் என மாறி மாறி பயணித்து டெல்லி சென்றது அவரது ஆதரவாளர்களை உற்சாகப்படுத்திய அதேவேளையில், கட்சிக்குள் புதிய மாற்றங்கள் வரப்போகிறதோ என்ற எதிர்பார்ப்பையும் தூண்டியுள்ளது.

நேற்று காரைக்காலில் இறுதிக்கட்ட பிரசாரத்தில் தீவிரமாக ஈடுபட்டிருந்தார் அண்ணாமலை. பாஜக மற்றும் அதன் கூட்டணி கட்சி வேட்பாளர்களுக்கு ஆதரவாக ஓட்டு சேகரித்துக் கொண்டிருந்தபோது, திடீரென டெல்லி உயர்மட்டத்திலிருந்து அழைப்பு வந்தது. 

இதையும் படிங்க: திமுகவின் வாரிசு அரசியல், குடும்ப அரசியலுக்கு ஃபுல் ஸ்டாப்!! உறுதிபட கூறிய பியூஸ் கோயல்!

“உடனடியாக டெல்லி வாருங்கள்” என கட்சி மேலிடம் அழைத்ததும், பிரசாரத்தை முடித்துக்கொண்ட அண்ணாமலை நேற்று மாலை ஹெலிகாப்டரில் சென்னை விமான நிலையத்துக்கு வந்தார். அங்கிருந்து இரவு 7.20 மணிக்கு தனி விமானம் மூலம் டெல்லி புறப்பட்டுச் சென்றார்.

பிரதமர் நரேந்திர மோடி மற்றும் உள்துறை அமைச்சர் அமித் ஷா ஆகியோரின் நேரடி அழைப்பின் பேரிலேயே இந்த பயணம் நடந்ததாக அண்ணாமலையின் நெருங்கிய வட்டாரங்கள் தெரிவிக்கின்றன. 

கட்சியில் சில அதிருப்திகள் இருப்பதாக சொல்லப்படும் அண்ணாமலைக்கு முக்கிய பொறுப்பு வழங்கும் திட்டம் இருப்பதாக அவரது ஆதரவாளர்கள் உற்சாகமாகப் பகிர்ந்துகொள்கின்றனர்.

டெல்லியில் பாஜக தேசியத் தலைவர் ஜே.பி. நட்டாவை அண்ணாமலை நேரில் சந்தித்து தமிழக அரசியல் நிலவரம் குறித்து முக்கிய ஆலோசனை நடத்தியதாகத் தகவல்கள் வெளியாகியுள்ளன. தற்போது தமிழக பாஜகவில் மிக முக்கியமான பொதுச் செயலாளர் பதவி காலியாக உள்ளது. முன்பு அந்தப் பதவியில் இருந்த கேசவ விநாயகம் மீண்டும் ஆர்எஸ்எஸ் பணிக்குத் திரும்பியதால் இந்த இடம் காலியானது.

இந்தப் பதவிக்கு புதிய நபரை உடனடியாக நியமிக்காமல், கட்சியை வலுப்படுத்த ஒரு புதிய அமைப்புக் குழு உருவாக்க மேலிடம் திட்டமிட்டுள்ளது. அந்தக் குழுவில் யாரை நியமிப்பது, அவர்களுக்கு என்ன பொறுப்பு கொடுப்பது என்பது குறித்து விரிவாக ஆலோசிக்கவே அண்ணாமலையை டெல்லிக்கு அழைத்ததாக பாஜக வட்டாரங்கள் தெரிவிக்கின்றன. 

மேலும், இந்த அதிக முக்கியத்துவம் வாய்ந்த அமைப்புக் குழுவின் தலைவர் பொறுப்பு அண்ணாமலைக்கு வழங்கப்படலாம் என எதிர்பார்க்கப்படுகிறது.

இந்த திடீர் பயணம் தமிழக பாஜகவில் புதிய அத்தியாயத்தை தொடங்கும் என்று கட்சி நிர்வாகிகள் நம்பிக்கை தெரிவிக்கின்றனர். அண்ணாமலையின் டெல்லி சந்திப்பு முடிவுகள் என்னவாக இருக்கும் என்பதை அடுத்த சில நாட்களில் தெரியவரும். தமிழக அரசியல் களம் இப்போது பரபரப்பாக உள்ளது. 

இதையும் படிங்க: கோவையில் திமுக செய்யும் தில்லாலங்கடி!! அண்ணாமலை பகீர்!! அமாவாசை காலத்து டெக்னிக் என விளாசல்!