வங்காளதேசத்தில் தொடர்ச்சியான கனமழை பெரும் பாதிப்பை ஏற்படுத்தியுள்ளது. கடந்த சில நாட்களாக பெய்து வரும் பலத்த மழையால் சிட்டகாங் (சட்டோகிராம்) மாகாணத்தில் உள்ள ஏழு மாவட்டங்களில் வெள்ளப்பெருக்கு மற்றும் நிலச்சரிவு ஏற்பட்டு பெரும் உயிரிழப்பு ஏற்பட்டுள்ளது. இதுவரை மொத்தம் 51 பேர் உயிரிழந்துள்ளதாக அந்நாட்டு அரசு தெரிவித்துள்ளது. இந்த இயற்கை பேரிடரால் சுமார் 10 லட்சம் மக்கள் பாதிக்கப்பட்டுள்ளனர்.

காக்ஸ் பஜார் மாவட்டம் மிகக் கடுமையாகப் பாதிக்கப்பட்டுள்ளது. இங்கு மட்டும் 28 பேர் உயிரிழந்துள்ளனர். இவர்களில் பலர் ரோகிங்கியா அகதிகள் முகாம்களில் தங்கியிருந்தவர்கள். சட்டோகிராம் பகுதியில் 13 பேரும், பந்தர்பன் பகுதியில் 6 பேரும் பலியாகியுள்ளனர். மொத்தம் 64 மாவட்டங்களில் இந்த ஏழு மாவட்டங்கள் முழுமையாக வெள்ளத்தில் மூழ்கியுள்ளன. பல இடங்களில் ஆறுகள் கரைபுரண்டு ஓடுகின்றன. சாலைகள், பாலங்கள் சேதமடைந்துள்ளன. மக்களின் வீடுகள், விவசாய நிலங்கள் தண்ணீரில் மூழ்கியுள்ளன.

வானிலை ஆய்வு மையம் தொடர்ந்து கனமழை பெய்யும் என்று எச்சரிக்கை விடுத்துள்ளது. இதனால் மேலும் பாதிப்புகள் ஏற்படும் அபாயம் உள்ளது. ரோகிங்கியா அகதிகள் முகாம்கள் மலைப்பகுதிகளில் அமைக்கப்பட்டுள்ளதால், நிலச்சரிவுக்கு மிகவும் எளிதில் ஆளாகின்றன. இந்த முகாம்களில் உள்ள ஏறக்குறைய 20,000க்கும் மேற்பட்ட அகதிகள் இந்த மழையால் கடுமையாகப் பாதிக்கப்பட்டுள்ளனர். பல குழந்தைகள் உட்பட பெண்கள் மற்றும் ஆண்கள் உயிரிழந்த சம்பவங்கள் மிகுந்த மனவேதனையை ஏற்படுத்தியுள்ளன.

இதையும் படிங்க: "எல்லா சதிகளையும் முறியடிப்பேன்" இந்த ஆண்டே வங்கதேசம் திரும்புவேன்! ஷேக் ஹசீனா உறுதி!

அரசு உடனடியாக மீட்புப் பணிகளைத் தீவிரப்படுத்தியுள்ளது. இராணுவம் மற்றும் கடற்படைப் படைகள் படகுகள் மூலம் உணவு, மருந்து மற்றும் அத்தியாவசியப் பொருட்களைப் பாதிக்கப்பட்ட பகுதிகளுக்கு எடுத்துச் செல்கின்றன. 1,000க்கும் மேற்பட்ட நிவாரண முகாம்கள் திறக்கப்பட்டுள்ளன. ஆயிரக்கணக்கான மக்கள் இந்த முகாம்களில் தங்க வைக்கப்பட்டுள்ளனர். மின்சாரம், குடிநீர் மற்றும் சமையல் வசதிகள் பாதிக்கப்பட்டுள்ளதால் நோய்த்தொற்று அபாயமும் எழுந்துள்ளது.

இந்த பேரிடர் தென்கிழக்கு வங்காளதேசத்தின் பொருளாதாரத்தையும் பெரிதும் பாதித்துள்ளது. விவசாயம், மீன்வளம் மற்றும் சிறு தொழில்கள் முடங்கியுள்ளன. பாகிஸ்தான், மாலத்தீவு, ஆப்கானிஸ்தான் உள்ளிட்ட நாடுகளின் தலைவர்கள் இரங்கல் தெரிவித்து உதவி வழங்கத் தயாராக இருப்பதாக அறிவித்துள்ளனர்.

இந்த சூழலில், மக்களை பாதுகாப்பான இடங்களுக்கு மாற்றுவது, நிலச்சரிவு அபாயம் உள்ள மலைப்பகுதிகளில் வாழும் மக்களை மறுவாழ்வு ஏற்பாடு செய்வது ஆகியவை அரசின் முக்கியப் பணியாக உள்ளன. தொடர்ச்சியான மழை மற்றும் வெள்ள அபாயத்தால் பாதிக்கப்பட்ட மக்களுக்கு உரிய நிவாரண உதவிகள் உடனடியாகக் கிடைக்க வேண்டும் என்று பொதுமக்கள் வலியுறுத்துகின்றனர்.

இதையும் படிங்க: இந்தியாவுக்கு வர வேண்டிய திட்டத்தை தட்டிப்பறித்தது சீனா!! பாதுகாப்பு அச்சுறுத்தலால் கவலை!