திருப்பூர் மாவட்டம் தாராபுரம் சட்டமன்றத் தொகுதியில் இடைத்தேர்தல் நடைபெறவுள்ள நிலையில், தேர்தல் ஆணையத்தின் கடுமையான கண்காணிப்பு நடவடிக்கைகள் தொடர்ந்து மேற்கொள்ளப்பட்டு வருகின்றன. பணம் மற்றும் பரிசுப் பொருட்கள் வாக்காளர்களுக்கு விநியோகம் செய்யப்படுவதைத் தடுக்கும் நோக்கில் பறக்கும் படைகள் மற்றும் நிலை கண்காணிப்பு குழுக்கள் பல்வேறு பகுதிகளில் தீவிர சோதனைகளை நடத்தி வருகின்றன.

இந்தச் சூழலில் தாராபுரத்திற்கு அருகிலுள்ள மூலனூர் பகுதியில் அதிரடி சோதனை நடத்தப்பட்டது.மூலனூர் பகுதியில் வாக்காளர்களுக்கு விநியோகம் செய்யும் நோக்கில் பெருமளவு ரொக்கம் பதுக்கி வைக்கப்பட்டிருப்பதாக நிலை கண்காணிப்பு குழுவினருக்கு ரகசியத் தகவல் கிடைத்தது. உடனடியாக அந்தப் பகுதிக்கு விரைந்த பறக்கும் படையினர், தாளக்கரை பிரிவில் உள்ள இரு வீடுகளில் சோதனையை மேற்கொண்டனர்.

சோதனையின் போது மூலனூர் பேரூராட்சி திமுக அவைத் தலைவர் விஸ்வநாதனின் வீட்டில் ரூ.40.79 லட்சம் ரொக்கமும், பேரூராட்சி ஆறாவது வார்டு கிளைச் செயலர் செல்வராஜின் வீட்டில் ரூ.7.63 லட்சம் ரொக்கமும் கண்டெடுக்கப்பட்டன. மொத்தமாக ரூ.48.42 லட்சம் ரொக்கம் ஆவணங்கள் இன்றி பதுக்கி வைக்கப்பட்டிருந்தது.

இதையும் படிங்க: நெருங்கும் இடைத்தேர்தல்... திமுக வேட்பாளர் சுகன்யா வேட்பு மனுத் தாக்கல்..!! பரபரக்கும் தாராபுரம்..!!

இந்தப் பணம் உரிய ஆதாரங்களுடன் தொடர்புபடுத்தப்படாததால் அதிகாரிகளால் உடனடியாக பறிமுதல் செய்யப்பட்டது. பறிமுதல் செய்யப்பட்ட தொகை மாவட்டக் கருவூலத்தில் ஒப்படைக்கப்பட்டுள்ளது. தேர்தல் நடத்தை விதிமுறைகள் அமலில் உள்ள நிலையில், இத்தகைய பெருந்தொகை ரொக்கம் வாக்காளர்களுக்கு விநியோகம் செய்வதற்காகத் தயாராக வைக்கப்பட்டிருக்கலாம் என்ற சந்தேகம் எழுந்துள்ளது. இதனால் தேர்தல் பறக்கும் படையினர் இந்தச் சம்பவம் குறித்து தீவிர விசாரணையை மேற்கொண்டு வருகின்றனர்.தாராபுரம் தொகுதியில் இடைத்தேர்தல் அறிவிக்கப்பட்டதிலிருந்து பல்வேறு இடங்களில் இதுபோன்ற சோதனைகள் நடத்தப்பட்டு வருகின்றன

இதையும் படிங்க: குதிரை பேரம்... அரசியல் அநாகரிகத்தை எப்படி ஏற்க முடியும்.? ஆர். பி. உதயகுமார் கேள்வி.!!