கொலம்பியாவின் மேற்கு பகுதிகளை இன்று உலுக்கிய சக்திவாய்ந்த நிலநடுக்கம் மிகப்பெரிய பேரழிவை ஏற்படுத்தியுள்ளது. ரிக்டர் அளவுகோலில் 7.4 ஆக பதிவான இந்த நிலநடுக்கத்தில் இதுவரை 111 பேர் உயிரிழந்துள்ளதாக தகவல்கள் வெளியாகியுள்ளன. 87 பேர் காயமடைந்துள்ள நிலையில், இடிபாடுகளுக்குள் மேலும் பலர் சிக்கியிருக்கலாம் என்பதால் பலி எண்ணிக்கை அதிகரிக்கக்கூடும் என அஞ்சப்படுகிறது.

கொலம்பியாவின் உள்ளூர் நேரப்படி திங்கட்கிழமை காலை 7.34 மணியளவில் இந்த நிலநடுக்கம் ஏற்பட்டது. மேற்கு கொலம்பியாவின் சோகோ மாகாணத்தில் உள்ள சான் ஜோஸ் டெல் பால்மர் பகுதிக்கு அருகே நிலநடுக்கத்தின் மையப்பகுதி அமைந்திருந்தது. சுமார் 100 கிலோமீட்டர் ஆழத்தில் நிலநடுக்கம் ஏற்பட்டதாக சர்வதேச தகவல்கள் தெரிவிக்கின்றன.

நிலநடுக்கத்தின் தாக்கம் சோகோ மாகாணத்தை மட்டுமின்றி கலி, பெரேரா, மனிசாலேஸ் உள்ளிட்ட முக்கிய நகரங்களிலும் கடுமையாக உணரப்பட்டது. ஏராளமான கட்டிடங்கள் சேதமடைந்ததுடன், பல கட்டிடங்கள் முற்றிலும் இடிந்து விழுந்துள்ளன. இதுவரை 1,600-க்கும் மேற்பட்ட கட்டிடங்கள் சேதமடைந்துள்ளதாகவும், குறைந்தது 61 கட்டிடங்கள் முழுமையாக இடிந்துள்ளதாகவும் தகவல்கள் தெரிவிக்கின்றன.

இதையும் படிங்க: அதிகாலையிலேயே அதிர்ந்த பூமி... அலறியடித்துக் கொண்டு ஓடிய மக்கள்... மகாராஷ்டிராவில் நிலவரம் என்ன?

பெரேரா உள்ளிட்ட பகுதிகளில் இடிபாடுகளுக்குள் சிக்கியிருப்பவர்களை மீட்கும் பணிகள் தீவிரமாக நடைபெற்று வருகின்றன. மருத்துவமனைகள், பள்ளிகள் உள்ளிட்ட முக்கிய கட்டமைப்புகளும் சேதமடைந்துள்ளன. கலியில் உள்ள ஒரு மருத்துவமனையின் ஒரு பகுதியும் நிலநடுக்கத்தால் பாதிக்கப்பட்டதாக தகவல்கள் வெளியாகியுள்ளன. மனிசாலேஸ் நகரில் வரலாற்றுச் சிறப்புமிக்க தேவாலயத்தின் கோபுரப் பகுதியும் இடிந்து விழுந்துள்ளது.

நிலநடுக்கத்தின் அதிர்வுகள் கொலம்பியாவின் தலைநகர் பொகோட்டா, மெடலின், கலி உள்ளிட்ட தொலைதூர நகரங்களிலும் உணரப்பட்டன. அண்டை நாடுகளான வெனிசுலா, ஈக்வடார் மற்றும் பனாமாவின் சில பகுதிகளிலும் நில அதிர்வுகள் உணரப்பட்டதாக தகவல்கள் தெரிவிக்கின்றன.

இந்த நிலநடுக்கத்தால் பசிபிக் கடலோரப் பகுதிகளுக்கு சுனாமி அச்சுறுத்தல் எதுவும் இல்லை என அதிகாரிகள் தெரிவித்திருப்பது மட்டுமே சற்று ஆறுதல் அளிக்கும் தகவலாக உள்ளது. இதனால் கடலோரப் பகுதிகளில் சுனாமி எச்சரிக்கை விடுக்கப்படவில்லை.

நிலநடுக்கம் ஏற்படுத்தியுள்ள பாதிப்புகளை தொடர்ந்து, பாதிக்கப்பட்ட பகுதிகளில் அவசரநிலை நடவடிக்கைகள் தீவிரப்படுத்தப்பட்டுள்ளன. தீயணைப்புத் துறையினர், பேரிடர் மீட்புப் படையினர் மற்றும் ராணுவத்தினர் இணைந்து மீட்பு நடவடிக்கைகளில் ஈடுபட்டு வருகின்றனர். இடிபாடுகளை அகற்றி உயிருடன் இருப்பவர்களை மீட்பதற்கான பணிகள் தொடர்ந்து நடைபெற்று வருகின்றன.

நிலநடுக்கத்தால் விமான நிலையங்கள் உள்ளிட்ட போக்குவரத்து கட்டமைப்புகளும் பாதிக்கப்பட்டுள்ளன. பல்வேறு பகுதிகளில் கட்டிடங்கள் இடிந்து விழுந்ததால் பொதுமக்கள் பாதுகாப்பான இடங்களுக்கு வெளியேற்றப்பட்டுள்ளனர். மீட்புப் பணிகள் முழுவீச்சில் நடைபெற்று வருவதால், சேதம் மற்றும் உயிரிழப்பு தொடர்பான முழுமையான விவரங்கள் அடுத்தடுத்த மணிநேரங்களில் வெளியாகும் என எதிர்பார்க்கப்படுகிறது.

இந்த நிலநடுக்கம் கொலம்பியாவில் இந்த நூற்றாண்டில் பதிவான மிக வலுவான மற்றும் மிகப்பெரிய பாதிப்பை ஏற்படுத்திய நிலநடுக்கங்களில் ஒன்றாக பார்க்கப்படுகிறது. பேரிடரால் பாதிக்கப்பட்ட கொலம்பியாவுக்கு பல்வேறு நாடுகள் ஆதரவு தெரிவித்துள்ளன.

ஐக்கிய அரபு அமீரகம் நிலநடுக்கத்தில் உயிரிழந்தவர்களின் குடும்பங்களுக்கு இரங்கல் தெரிவித்துள்ளதுடன், காயமடைந்தவர்கள் விரைவில் குணமடைய வாழ்த்து தெரிவித்துள்ளது. எல் சால்வடார், ஈக்வடார், மெக்சிகோ உள்ளிட்ட நாடுகளும் மீட்புப் பணிகளுக்கு தேவையான மருத்துவ உதவிகள், உபகரணங்கள் மற்றும் மீட்புக் குழுக்களை வழங்க முன்வந்துள்ளதாக தகவல்கள் வெளியாகியுள்ளன.

இதற்கிடையே, இடிபாடுகளுக்குள் இன்னும் பலர் சிக்கியிருக்கலாம் என்ற அச்சம் நிலவுவதால், மீட்புப் படையினர் இரவு பகலாக தேடுதல் பணியில் ஈடுபட்டுள்ளனர். நிலநடுக்கத்தால் ஏற்பட்ட முழுமையான சேதம் மற்றும் இறுதி உயிரிழப்பு எண்ணிக்கை மீட்புப் பணிகள் நிறைவடைந்த பின்னரே தெரியவரும் என அதிகாரிகள் தெரிவித்துள்ளனர்.

இதையும் படிங்க: சீனாவில் அடுத்தடுத்து 2 நிலநடுக்கங்கள்..!! பீதியில் தெருவில் தஞ்சமடைந்த மக்கள்..!!