தமிழக அரசியலில் பெரும் எதிர்பார்ப்பை ஏற்படுத்தியுள்ள மதுராந்தகம் மற்றும் தாராபுரம் சட்டப்பேரவைத் தொகுதிகளுக்கான இடைத்தேர்தல் வாக்கு எண்ணிக்கை இன்று விறுவிறுப்பாக நடைபெற்று வருகிறது. கடந்த அக்டோபர் 6ஆம் தேதி நடைபெற்ற இந்தத் தேர்தலில் தமிழக வெற்றிக் கழகம் (தவெக), திராவிட முன்னேற்றக் கழகம் (திமுக), அனைத்திந்திய அண்ணா திராவிட முன்னேற்றக் கழகம் (அதிமுக), கம்யூனிஸ்ட் கட்சிகள் மற்றும் நாம் தமிழர் கட்சி என ஐந்து முக்கியக் கட்சிகள் களம் இறங்கியுள்ளன.

இரு தொகுதிகளிலும் முன்னதாக அதிமுகவின் சிட்டிங் எம்எல்ஏக்கள் வெற்றி பெற்றிருந்தனர். ஆனால் அவர்கள் பதவியை ராஜினாமா செய்துவிட்டு ஆளுங்கட்சியான தவெகவில் இணைந்ததால் இடைத்தேர்தல் நடத்தப்பட்டது. தமிழக சட்டமன்றத் தேர்தலில் திமுகவையும் அதிமுகவையும் தோற்கடித்து தவெக ஆட்சியமைத்த பின்னர், ஆட்சியை மேலும் உறுதிப்படுத்த இந்த இரு இடங்களிலும் வெற்றி பெறுவது அவசியமாகியுள்ளது. 

அதேவேளை, அதிமுகவுக்கு இது கௌரவப் பிரச்சினையாகவும், திமுகவுக்கு பலமான எதிர்க்கட்சியாகத் தங்களை நிரூபிக்கும் வாய்ப்பாகவும் பார்க்கப்படுகிறது. வாக்கு எண்ணிக்கையில் மதுராந்தகத்தில் ஆரம்பச் சுற்றுகளிலிருந்தே தவெக வேட்பாளர் மரகதம் குமரவேல் முன்னிலை வகித்து வருகிறார். அங்கு திமுக இரண்டாமிடத்திலும், அதிமுக மூன்றாமிடத்திலும் உள்ளன. 

இதையும் படிங்க: மதுராந்தகம், தாராபுரம் இடைத்தேர்தல்: ஆதிக்கம் செலுத்தும் தவெக.. வேகமெடுத்து நெருங்கும் திமுக!! பரிதாபத்தில் அதிமுக..!!

தாராபுரத்தில் ஆரம்பத்தில் அதிமுக முன்னிலையில் இருந்தது. தவெக இரண்டாமிடம், திமுக மூன்றாமிடம் என்ற நிலை ஐந்து சுற்றுகள் வரை தொடர்ந்தது. ஆறாவது சுற்றிலிருந்து தவெக வேட்பாளர் சத்தியபாமா முன்னிலைக்கு வந்தார். ஒன்பது சுற்றுகள் முடிந்த நிலையில் தாராபுரத்தில் தவெக தொடர்ந்து முன்னிலையில் இருக்கிறது. 

முன்னதாக இரண்டாமிடத்தில் இருந்த அதிமுகவை பின்னுக்குத் தள்ளி திமுக இரண்டாமிடத்திற்கு முன்னேறியுள்ளது. அதிமுக மூன்றாமிடத்திற்குத் தள்ளப்பட்டுள்ளது. மீதமுள்ள மூலனூர் உள்ளிட்ட பகுதிகளில் திமுக வலுவாக இருப்பதால் வரும் சுற்றுகளில் அதன் நிலை மேலும் உயர வாய்ப்புள்ளது. மதுராந்தகத்தில் தொடர்ந்து மூன்றாமிடத்தில் அதிமுக இருப்பதும், தாராபுரத்திலும் அதே நிலை ஏற்பட்டதும் அதிமுகத் தரப்பில் அதிர்ச்சியை ஏற்படுத்தியுள்ளது. 

வாக்குப்பதிவு விகிதம் மதுராந்தகத்தில் சுமார் 86 சதவீதமும், தாராபுரத்தில் 80 சதவீதமும் பதிவாகியிருந்தது. இரு தொகுதிகளிலும் தவெக முன்னிலை வகிப்பதால் ஆளுங்கட்சிக்கு சாதகமான சூழல் உருவாகியுள்ளதாக அரசியல் வட்டாரங்கள் கருதுகின்றன. முழுமையான முடிவுகள் விரைவில் வெளியாகும் என எதிர்பார்க்கப்படுகிறது.

இதையும் படிங்க: ஓட்டு சதவீதம் குறைந்தால் மாறுமா முடிவு? மதுராந்தகம் - தாராபுரத்தில் யாருக்கு வெற்றி?