அமெரிக்க அதிபர் டொனால்ட் டிரம்பின் சமீபத்திய அறிவிப்பு சர்வதேச எண்ணெய் சந்தையில் அலைகளை ஏற்படுத்தியுள்ளது. ரஷ்யாவுக்கும் உக்ரைனுக்கும் இடையே எரிசக்தி உட்கட்டமைப்புகள் மீதான தாக்குதல்களை உடனடியாக நிறுத்தும் ‘எரிசக்தி போர் நிறுத்தம்’ ஏற்பட்டுள்ளதாக அவர் தனது சமூக ஊடகப் பதிவில் தெரிவித்தார். இரு தரப்பும் ஒப்புக்கொண்டதாகக் கூறிய அவர், “இதை மீறாதீர்கள்” என்று எச்சரித்தார். இந்த அறிவிப்பைத் தொடர்ந்து சர்வதேச சந்தையில் கச்சா எண்ணெய் விலை சுமார் 1.5 சதவீதம் சரிந்தது. ப்ரெண்ட் கச்சா எண்ணெய் விலை ஒரு கட்டத்தில் பேரலுக்கு 103 டாலர் அளவுக்கு வீழ்ந்தது.

நான்கரை ஆண்டுகளாக நீடிக்கும் ரஷ்யா-உக்ரைன் போரில் சமீப வாரங்களில் இரு தரப்பும் எரிசக்தி இலக்குகளை குறிவைத்து தாக்குதல்களை தீவிரப்படுத்தியிருந்தன. உக்ரைன் ரஷ்ய எண்ணெய் சுத்திகரிப்பு நிலையங்களைத் தாக்கியதால் உலகளாவிய டீசல் விநியோகம் பாதிக்கப்பட்டதாக டிரம்ப் குற்றம் சாட்டியிருந்தார். 

இதற்கிடையே ரஷ்யாவிடமிருந்து அமெரிக்கா மற்றும் உலகச் சந்தைக்கு டீசல் வழங்கும் ஒப்பந்தத்தையும் அவர் அறிவித்திருந்தார். முதற்கட்டமாக 3 லட்சம் டன்னுக்கும் அதிகமான டீசல் உடனடியாக வழங்கப்படும் என்றும், நவம்பரில் மேலும் அதிக அளவு வரும் என்றும் தெரிவிக்கப்பட்டது. இதனால் ரஷ்யாவின் டீசல் ஏற்றுமதி மீண்டும் அதிகரிக்கும் என்ற எதிர்பார்ப்பு எழுந்துள்ளது.

இதையும் படிங்க: இந்தியா மீது 100% வரி விதிப்பா? அமெரிக்காவுக்கு இந்திய வெளியுறவு அமைச்சகம் எச்சரிக்கை!

இருப்பினும் இந்த நிறுத்தம் நீடிக்குமா என்பது உறுதியாகவில்லை. உக்ரைன் அதிபர் ஜெலென்ஸ்கி, ரஷ்யாவும் அதேபோல் செயல்பட்டால் தாங்கள் ஆதரவு தருவதாகக் கூறியுள்ளார். ஆனால் அறிவிப்புக்குப் பிறகும் ரஷ்யா உக்ரைன் எரிசக்தி வசதிகளைத் தாக்கியதாக அவர் குற்றம் சாட்டியுள்ளார். ரஷ்யா அதிகாரப்பூர்வமாக உறுதிப்படுத்தவில்லை.

குளிர்காலம் நெருங்கும் நிலையில் உலகளாவிய டீசல் தேவை அதிகரிக்கும். வளைகுடா நாடுகள் மற்றும் ரஷ்யாவின் ஏற்றுமதி குறைந்ததால் நாளொன்றுக்கு சுமார் 16 லட்சம் பேரல் டீசல் பற்றாக்குறை நிலவுவதாக நிபுணர்கள் சுட்டிக்காட்டுகின்றனர். உலக எண்ணெய் பயன்பாட்டில் டீசலின் பங்கு சுமார் 30 சதவீதம். விவசாயம் மற்றும் சரக்குப் போக்குவரத்துக்கு இது முக்கியம். சேதமடைந்த ரஷ்ய சுத்திகரிப்பு நிலையங்கள் மீண்டும் இயல்புநிலைக்குத் திரும்பினால் மட்டுமே விநியோகம் சீராகும்.

இந்தியாவைப் பொறுத்தவரை, சர்வதேச கச்சா எண்ணெய் விலை சரிவு உடனடியாக பெட்ரோல், டீசல் விலையைக் குறைக்க வாய்ப்பு குறைவு என்று பொருளாதார நிபுணர்கள் கருத்து தெரிவிக்கின்றனர். விநியோகம் நிலைத்து நீடித்தால் மட்டுமே நீண்டகால தாக்கம் ஏற்படும். டிரம்பின் இந்த நடவடிக்கை எரிபொருள் விலையைக் குறைக்க எந்த நாட்டுடனும் வர்த்தகம் செய்யத் தயாராக இருப்பதைக் காட்டுகிறது என்றும் அவர்கள் சுட்டிக்காட்டுகின்றனர்.

இதையும் படிங்க: முக்கிய பைப்லைன் மூடல்..!! அதிரடி காட்டும் சவுதி அரேபியா.. கச்சா எண்ணெய் விலை மீண்டும் ஏறுமா?