ஜெப்ரி எப்ஸ்டீன் விவகாரம் மீண்டும் வெப்பம் பெற்றுள்ளது. சிறுமிகள் மற்றும் இளம்பெண்களை கடத்தி பாலியல் தொழிலுக்கு பயன்படுத்தியதாக குற்றம் சாட்டப்பட்ட அமெரிக்க தொழிலதிபர் எப்ஸ்டீன், 2019ஆம் ஆண்டு சிறையில் தற்கொலை செய்துகொண்டார். அவரது தனிப்பட்ட ஆவணங்கள், புகைப்படங்கள், வீடியோக்கள் உள்ளிட்ட லட்சக்கணக்கான கோப்புகள் 'எப்ஸ்டீன் கோப்புகள்' என அழைக்கப்படுகின்றன. அமெரிக்க நீதித்துறை உத்தரவின்படி இவை படிப்படியாக வெளியிடப்பட்டு வருகின்றன.

சமீபத்தில் வெளியான கோப்புகளில் மைக்ரோசாப்ட் இணை நிறுவனர் பில் கேட்ஸ் தொடர்பான தகவல்கள் இடம்பெற்றன. எப்ஸ்டீன் எழுதிய மின்னஞ்சல்களில், கேட்ஸ் ரஷ்ய பெண்களுடன் உறவு வைத்திருந்ததாகவும், அதனால் பால்வினை நோய் ஏற்பட்டு ரகசியமாக மருந்து பெற்றதாகவும் குறிப்பிடப்பட்டிருந்தது.

இதையும் படிங்க: செவ்வாய் கிரகம் இப்போ இல்ல.. 10 வருடத்திற்குள் நிலவில் நகரம்..!! எலான் மஸ்க்-கின் மாஸ்டர் பிளான்..!!

இதைத் தொடர்ந்து, கேட்ஸ் தனது கேட்ஸ் பவுண்டேஷன் ஊழியர்களுடன் நடத்திய சந்திப்பில் (டவுன் ஹால்) பேசியதாக வால் ஸ்ட்ரீட் ஜர்னல் உள்ளிட்ட ஊடகங்கள் தெரிவித்தன. அங்கு அவர், தான் இரு ரஷ்ய பெண்களுடன் (ஒருவர் பிரிட்ஜ் விளையாட்டு வீராங்கனை, மற்றொருவர் அணு இயற்பியலாளர்) உறவு வைத்திருந்ததை ஒப்புக்கொண்டார். எப்ஸ்டீனுடன் தொடர்பு கொண்டது தனது வாழ்க்கையில் செய்த மிகப்பெரிய தவறு எனக் கூறி, அதற்கு மன்னிப்பு கோரினார்.

இருப்பினும், எப்ஸ்டீனின் பாலியல் தொழில் சம்பந்தப்பட்டவர்களுடன் தான் எந்தத் தொடர்பும் வைத்திருக்கவில்லை என்றும், "எதுவும் சட்டவிரோதமாக நடக்கவில்லை, நான் எதையும் சட்டவிரோதமாகப் பார்க்கவில்லை" என்றும் வலியுறுத்தினார். 

இந்தச் செய்தி எக்ஸ் தளத்தில் பரவியபோது, ஒரு பயனர் "டெஸ்லா பங்குகளை வீழ்த்த நினைப்பவர்கள் நல்ல மனது உள்ளவர்கள் அல்ல" என்று பதிவிட்டார். இதற்கு எலான் மஸ்க் பதிலளித்து, "கர்மா உண்மையானது" (Karma is real) என்று பதிலடி கொடுத்துள்ளார். இதற்குப் பின்னணியில், பில் கேட்ஸ் டெஸ்லா பங்குகளுக்கு எதிராக ஷார்ட் செல்லிங் (Short Selling) செய்தது உள்ளது.

ஷார்ட் செல்லிங் என்பது, ஒரு நிறுவனத்தின் பங்கு விலை எதிர்காலத்தில் குறையும் என எதிர்பார்த்து, கடன் வாங்கி பங்குகளை விற்று, பின்னர் குறைந்த விலையில் வாங்கி திருப்பிச் செலுத்தி லாபம் ஈட்டும் உத்தி. கேட்ஸ் சுமார் 500 மில்லியன் டாலர் (தற்போதைய மதிப்பில் சுமார் ரூ.4,150 கோடி) அளவுக்கு டெஸ்லா பங்குகளுக்கு எதிராக இந்தப் பந்தயம் கட்டியதாக மஸ்க் குற்றம்சாட்டியுள்ளார். கடந்த 8 ஆண்டுகளாக இந்த நிலையைத் தொடர்ந்து வைத்திருப்பதாகவும், டெஸ்லா உலகின் மிகப்பெரிய நிறுவனமாக உயர்ந்தால் கேட்ஸ் கூட திவாலாகலாம் என்று மஸ்க் எச்சரித்திருந்தார்.

தற்போது உலக கோடீஸ்வரர்கள் பட்டியலில் மஸ்க் முதலிடத்தில் உள்ள நிலையில், கேட்ஸ் முதல் 10 இடங்களில் இல்லை என்பது குறிப்பிடத்தக்கது. இதனிடையே, சமீப எப்ஸ்டீன் கோப்புகளில் எலான் மஸ்க்கின் பெயரும் சில மின்னஞ்சல்கள் மற்றும் திட்டங்களுடன் இடம்பெற்றுள்ளது. ஆனால் மஸ்க், எப்ஸ்டீனின் தீவுக்கு அழைப்புகளை மறுத்ததாகவும், அவருடன் கொஞ்சம் தொடர்பு மட்டுமே இருந்ததாகவும் தெரிவித்துள்ளார். இவ்வாறு, எப்ஸ்டீன் விவகாரம் தொழிலதிபர்களிடையேயான பழைய பகைமையை மீண்டும் வெளிச்சத்துக்கு கொண்டு வந்துள்ளது.

இதையும் படிங்க: டெல்லி AI மாநாட்டில் பில் கேட்ஸ் ஆப்சென்ட்..?? வெளியான முக்கிய காரணம்..!! நடந்தது என்ன..??