மேற்காசியப் பகுதியில் நீடித்து வரும் போர் சூழ்நிலையில், அமெரிக்காவுடன் எந்தவித பேச்சுவார்த்தையும் நடத்தும் திட்டம் இல்லை என ஈரான் தெளிவாக அறிவித்துள்ளது. இந்த தகவலை அந்நாட்டின் வெளியுறவுத்துறை அமைச்சர் அப்பாஸ் அராக்சி  (Abbas Araghchi) உறுதிப்படுத்தியுள்ளார்.

அணுசக்தி ஒப்பந்தம் தொடர்பான பேச்சுவார்த்தைகள் பலனின்றி முடிவடைந்ததைத் தொடர்ந்து, கடந்த பிப்ரவரி 28ஆம் தேதி அமெரிக்கா மற்றும் இஸ்ரேல் இணைந்து ஈரான் மீது ராணுவ தாக்குதலை தொடங்கின. இதற்கு பதிலடியாக, இஸ்ரேல் மற்றும் வளைகுடா பிராந்தியத்தில் உள்ள அமெரிக்க ராணுவத் தளங்கள் மீது ஈரான் தாக்குதல் நடத்தி வருகிறது. இதனால் அந்தப் பகுதியில் பதற்ற நிலை தொடர்ந்து அதிகரித்து வருகிறது.

போரை நிறுத்தும் நோக்கில், அமெரிக்கா 15 அம்ச திட்டத்தை முன்வைத்தது. இந்த திட்டத்தை பாகிஸ்தான், எகிப்து, துருக்கி போன்ற நாடுகள் மத்தியஸ்தம் செய்து ஈரானுக்கு தெரிவித்ததாக கூறப்படுகிறது. ஆனால், அந்த திட்டத்தை ஈரான் நிராகரித்ததுடன், மாற்றாக 5 முக்கிய நிபந்தனைகளை முன்வைத்தது.

இதையும் படிங்க: நீங்களே தனியா பேசிக்கிறீங்க போலயே! அமெரிக்காவை கிண்டல் செய்யு ஈரான்! பேச்சுவார்த்தை மறுப்பு!

இதில், எதிரியின் அனைத்து தாக்குதல்களும் முழுமையாக நிறுத்தப்பட வேண்டும், மீண்டும் போர் தொடங்காமல் இருக்க உறுதியான அமைப்புகள் உருவாக்கப்பட வேண்டும், போர் சேதங்களுக்கு இழப்பீடு வழங்கப்பட வேண்டும், ஆயுத குழுக்களுக்கு எதிரான நடவடிக்கைகள் உட்பட அனைத்து தாக்குதல்களும் நிறுத்தப்பட வேண்டும், ஹார்மூஸ் ஜலசந்தியை கட்டுப்படுத்தும் ஈரானின் உரிமையை உலக நாடுகள் அங்கீகரிக்க வேண்டும் என்பன அடங்கும்.

இந்த நிலையில், அப்பாஸ் அராக்சி  (Abbas Araghchi)  அரசு தொலைக்காட்சிக்கு அளித்த பேட்டியில், “அமெரிக்காவுடன் எந்த பேச்சுவார்த்தையும் நடைபெறவில்லை. அத்தகைய திட்டமும் இல்லை. எங்கள் கோரிக்கைகள் நிறைவேறும் வரை போராட்டம் தொடரும்” என்று தெரிவித்துள்ளார். மேலும், தற்போது பேச்சுவார்த்தை குறித்து பேசுவது தோல்வியை ஒப்புக்கொள்வதற்கு சமம் என்றும் அவர் குறிப்பிட்டார்.

அமெரிக்கா மத்தியஸ்தர்கள் மூலம் தகவல்களை அனுப்பினாலும், அது பேச்சுவார்த்தையாக கருதப்பட முடியாது என்றும் அவர் விளக்கமளித்தார். இப்போர் ஈரானின் போர் அல்ல, மாறாக இஸ்ரேலின் பாதுகாப்பிற்காக அமெரிக்கா ஈடுபட்ட மோதல் எனவும் அவர் குற்றம்சாட்டினார்.

மொத்தத்தில், ஈரான் எடுத்துள்ள இந்த கடுமையான நிலைப்பாடு, போர் முடிவடையும் வாய்ப்பை மேலும் சிக்கலாக்கியுள்ளதாக நிபுணர்கள் கருதுகின்றனர்.

இதையும் படிங்க: இதுவரை பாக்காத தாக்குதல் நடக்கும்!! ட்ரம்ப் சும்மா மிரட்ட மாட்டாரு! ஈரானுக்கு அமெரிக்கா வார்னிங்!