ரஷ்யாவுடன் இதற்கு முன்பு இல்லாத அளவுக்கு நெருக்கமாக இணைந்து செயல்பட்டு வருவதாக ஈரான் வெளியுறவு அமைச்சர் அப்பாஸ் அராக்சி தெரிவித்துள்ளார். அமெரிக்கா மற்றும் இஸ்ரேலுடனான போர் நீடித்து வரும் சூழலில், ஈரான் - ரஷ்யா இடையிலான உறவு மேலும் வலுப்பெற்றிருப்பது சர்வதேச அரசியல் வட்டாரத்தில் கவனத்தைப் பெற்றுள்ளது.

ஈரானின் அணுசக்தித் திட்டம் தொடர்பான நீண்டகாலப் பிரச்சினைகளுக்கு மத்தியில், கடந்த பிப்ரவரி 28ஆம் தேதி அமெரிக்கா மற்றும் இஸ்ரேல் ஈரான் மீது ராணுவ நடவடிக்கைகளைத் தொடங்கின. இதற்குப் பதிலடியாக ஈரான் நடத்திய தாக்குதல்களால் வளைகுடா பிராந்தியத்தில் பதற்றம் அதிகரித்துள்ளது. குறிப்பாக, உலகளாவிய எரிசக்தி வர்த்தகத்தில் முக்கியப் பங்கு வகிக்கும் ஹோர்முஸ் நீரிணையில் கப்பல் போக்குவரத்து பாதிக்கப்பட்டுள்ளது.

இந்தச் சூழலில், ரஷ்ய வெளியுறவு அமைச்சர் செர்ஜி லாவ்ரோவ் அக்டோபர் 19ஆம் தேதி ஈரான் தலைநகர் தெஹ்ரானுக்குச் சென்றார். அங்கு ஈரான் வெளியுறவு அமைச்சர் அப்பாஸ் அராக்சியைச் சந்தித்து இருதரப்பு உறவுகள், பிராந்தியப் பாதுகாப்பு மற்றும் போரை முடிவுக்குக் கொண்டுவருவதற்கான தூதரக முயற்சிகள் குறித்து ஆலோசனை நடத்தினார். ஈரான் அதிபர் மசூத் பெஷேஷ்கியனையும் அவர் சந்தித்துப் பேசினார்.

இதையும் படிங்க: ஈரான் செல்லும் ஆசிம் முனீர்! அமெரிக்கா உடனான போரை முடிவுக்குக் கொண்டுவர புதிய முயற்சி?

இந்தச் சந்திப்புக்குப் பின்னர் அராக்சி வெளியிட்ட கருத்தில், ஐரோப்பா முதல் மேற்கு ஆசியா வரையிலான பல்வேறு பிராந்திய விவகாரங்கள் குறித்து இருவரும் விவாதித்ததாகக் குறிப்பிட்டார்.

லெபனான், பாலஸ்தீனம், உக்ரைன், யேமன் உள்ளிட்ட பகுதிகளில் நிலவும் சூழல்களுடன், பொருளாதாரம் மற்றும் அணுசக்தித் துறைகளில் ஒத்துழைப்பை விரிவுபடுத்துவது குறித்தும் ஆலோசித்ததாகத் தெரிவித்தார்.

மேலும், “வரலாற்றில் இதற்கு முன்பு ஈரானும் ரஷ்யாவும் இவ்வளவு நெருக்கமாகப் பணியாற்றியதில்லை” என்று அவர் குறிப்பிட்டார். இரு நாடுகளுக்கும் இடையிலான அரசியல் மற்றும் பொருளாதார ஒத்துழைப்பு வலுப்பெற்று வருவதை இந்தக் கருத்து வெளிப்படுத்துகிறது.

இதற்கிடையில், அமெரிக்கா - ஈரான் இடையிலான மோதலை முடிவுக்குக் கொண்டுவர மத்தியஸ்தம் செய்யத் தயாராக இருப்பதாக ரஷிய அதிபர் விளாதிமிர் புதின் ஏற்கெனவே தெரிவித்துள்ளார். லாவ்ரோவின் தெஹ்ரான் பயணமும் இந்த முயற்சிகளின் ஒரு பகுதியாகப் பார்க்கப்படுகிறது.

எனினும், ரஷ்யாவின் தலையீட்டால் போர் உடனடியாக முடிவுக்கு வரும் என்பதற்கான உறுதி இல்லை. ஹோர்முஸ் நீரிணை, பொருளாதாரத் தடைகள் மற்றும் அணுசக்தித் திட்டம் தொடர்பான கருத்து வேறுபாடுகள் நீடிப்பதால், அடுத்தகட்டப் பேச்சுவார்த்தைகள் முக்கியத்துவம் பெற்றுள்ளன.

இதையும் படிங்க: அணு ஆயுதம் கிடையாது அதுக்கும் மேல... பயங்கரமான ஆயுதத்தை கையில் எடுத்த ஈரான்... அமெரிக்காவுக்கு காத்திருக்கும் பேரழிவு...!