ஈரானுக்கும் அமெரிக்காவிற்கும் இடையேயான போர், எதிர்பாராத வகையில் புதிய களத்திற்கு விரிவடைந்துள்ளது. அந்த புதிய களம் காஸ்பியன் கடல். உலகின் மிகப்பெரிய உள்நாட்டு நீர்நிலையான காஸ்பியன் கடலில், ராணுவச் சரக்குகளை ஏற்றிச் சென்ற இரண்டு ரஷ்யக் கப்பல்கள் மீது ட்ரோன் தாக்குதல் நடத்தப்பட்டதாக கடந்த வார இறுதியில் உக்ரைன் தெரிவித்தது. இதற்கு பதிலளித்த ஈரான், "உக்ரைனின் இந்த ஆபத்தான சாகசத்திற்கு நிச்சயமாக பதிலடி கொடுக்கப்படும்" என்று எச்சரித்துள்ளது.

ஈரானுக்கும் ரஷ்யாவுக்கும் இடையே வளர்ந்து வரும் ராணுவ மற்றும் பொருளாதார ஒத்துழைப்பின் முக்கிய நரம்பாக விளங்கும் காஸ்பியன் கடல்வழி ஏன் குறிவைக்கப்படுகிறது? உக்ரைன், ஈரான்–அமெரிக்கா மோதலுக்குள் இழுக்கப்படுகிறதா? டொனால்ட் டிரம்ப் – வோலோடிமிர் ஜெலென்ஸ்கி சந்திப்பு அதனை உறுதிப்படுத்துகிறதா? என்ற கேள்விகள் தற்போது எழுந்துள்ளன.

ரஷ்யாவிலிருந்து காஸ்பியன் கடல் வழியாக தானியங்கள், எஃகு உள்ளிட்ட பல்வேறு சரக்குகள் ஈரானுக்கு கொண்டு செல்லப்படுகின்றன. இதற்காக ஈரான் பல முக்கிய துறைமுகங்களை உருவாக்கியுள்ளது. அவற்றில் அன்சாலி துறைமுகமும் ஒன்று.

இதையும் படிங்க: ஈரானுக்கு உதவுகிறதா ரஷ்யா? புடினிடம் நேரடியாக கேட்பேன்! ஜெலன்ஸ்கி குற்றச்சாட்டுக்கு டிரம்ப் அதிரடி!

பெயர் வெளியிடப்படாத ஒரு கப்பல், ரஷ்யாவின் அஸ்ட்ராகான் துறைமுகத்திலிருந்து ஈரானின் அன்சாலி துறைமுகத்தை நோக்கிப் பயணித்துக் கொண்டிருந்தது. இந்த வழித்தடத்தை, இரு நாடுகளுக்கிடையேயான வர்த்தக பரிமாற்றங்களுக்கு பாதுகாப்பான மற்றும் நம்பகமான பாதையாக ஈரான் வர்ணித்து வருகிறது.

இந்தக் கப்பலும் அதனுடன் சென்ற போர்க்கப்பலும் ராணுவச் சரக்குகளை ஏற்றிச் சென்றதாகவும், அவற்றை ட்ரோன் மூலம் தாக்கியதாகவும் உக்ரைன் அதிபர் வோலோடிமிர் ஜெலென்ஸ்கி, சனிக்கிழமை எக்ஸ் சமூக வலைத்தளத்தில் பதிவிட்டார்.

ஆனால், ராணுவச் சரக்குகள் அல்ல, இரும்புப் பொருட்களை ஏற்றிச் சென்ற தனது வணிகக் கப்பல்களில் ஒன்றே தாக்கப்பட்டதாகவும், அந்தத் தாக்குதலில் ஒரு கடற்படை வீரர் உயிரிழந்ததுடன் மேலும் மூவர் காயமடைந்ததாகவும் ஈரான் தெரிவித்துள்ளது.

இந்தச் சம்பவத்தையடுத்து, டெஹ்ரானில் உள்ள உக்ரைன் தூதர், ஈரான் வெளியுறவு அமைச்சகத்திற்கு அழைக்கப்பட்டு கடும் கண்டனம் தெரிவிக்கப்பட்டது. பின்னர், ஈரான் வெளியுறவு அமைச்சகத்தின் செய்தித் தொடர்பாளர் இஸ்மாயில் பகாயி, "உக்ரைனின் ஆபத்தான சாகசத்திற்கு நிச்சயமாக பதிலடி வழங்கப்படும்" என்று திங்கள்கிழமை தெரிவித்ததன் மூலம் பதற்றம் மேலும் அதிகரித்தது.

ஈரான், ரஷ்யா, அஜர்பைஜான், கஜகஸ்தான் மற்றும் துர்க்மெனிஸ்தான் ஆகிய ஐந்து நாடுகளுக்கு இடையில் காஸ்பியன் கடல் அமைந்துள்ளது. பரப்பளவில் மிகப்பெரியதாகவும் உப்புநீரைக் கொண்டதாகவும் இருப்பதால் இது "கடல்" என அழைக்கப்பட்டாலும், உண்மையில் உலகின் மிகப்பெரிய ஏரியாகும்.

ஐந்து நாடுகளின் எல்லையாக அமைந்துள்ளதால், காஸ்பியன் கடலின் புவிசார் மற்றும் பொருளாதார முக்கியத்துவம் மிகவும் அதிகம். பாரசீக வளைகுடா மற்றும் ஓமான் வளைகுடா பகுதிகளில் நிலவும் பதற்றம் காரணமாக, காஸ்பியன் கடல் தற்போது மாற்று வர்த்தகப் பாதையாக உருவெடுத்துள்ளது. இதனால் அதன் முக்கியத்துவம் மேலும் உயர்ந்துள்ளது.

சீனாவுடன் ரயில் பாதைகள் மூலம் இணைப்பு, மத்திய ஆசியா, கருங்கடல், காக்கசஸ் பகுதி, மேற்காசியா மற்றும் கிழக்கு ஐரோப்பாவுடனான வர்த்தகத்தை மேம்படுத்துவதற்கும் காஸ்பியன் கடல்வழி ஈரானுக்கு முக்கிய பங்காற்றுகிறது. வர்த்தக வழித்தடங்களைப் பன்முகப்படுத்தும் ஈரானின் உத்தியில் காஸ்பியன் கடல் முக்கிய இடத்தைப் பெற்றுள்ளது.

பாரசீக வளைகுடாவும் ஓமான் வளைகுடாவும் ஈரானின் தெற்கு கடல்வழிகளாக இருப்பதால், வடக்கு பகுதிகளுடன் தொடர்பை ஏற்படுத்த காஸ்பியன் கடல்வழி அவசியமாகிறது. இதன் மூலம் ஈரானின் வர்த்தக உத்தி முழுமை பெறுகிறது.

ரஷ்யாவைப் பொறுத்தவரை, காஸ்பியன் கடல் மத்திய ஆசியா மற்றும் ஈரானுடன் இணைக்கும் முக்கிய வர்த்தக மற்றும் வியூகப் பாதையாக உள்ளது. ஈரானின் அணுசக்தி மின்திட்டங்களில் ரஷ்யா முக்கிய பங்காற்றுவதுடன், எண்ணெய் அகழ்வுப் பணிகளிலும் ஈடுபட்டு வருகிறது.

ஈரானும் ரஷ்யாவும் பொருளாதார மற்றும் ராணுவ ஒத்துழைப்பை உள்ளடக்கிய விரிவான மூலோபாய ஒப்பந்தத்தில் இணைந்துள்ளன. இது பரஸ்பர பாதுகாப்பு ஒப்பந்தம் அல்ல என்றாலும், உக்ரைன் போரின் தொடக்கத்தில் காஸ்பியன் கடல்வழியாக ஈரானிய ஷாஹித் (Shahed) ட்ரோன்கள் ரஷ்யாவுக்கு அனுப்பப்பட்டதாக கூறப்பட்டது. பின்னர், அவை ரஷ்யாவில் உள்ள தொழிற்சாலைகளிலேயே தயாரிக்கப்பட்டன.

மாஸ்கோவிற்கும் டெஹ்ரானுக்கும் இடையே வளர்ந்து வரும் ராணுவ ஒத்துழைப்பின் முக்கிய பாதையாக காஸ்பியன் கடல் மாறியுள்ளது. மேற்கத்திய நாடுகளின் கடற்படைகள் எளிதில் அணுக முடியாத, நிலப்பரப்பால் சூழப்பட்ட இந்த நீர்வழி, சர்வதேச பொருளாதாரத் தடைகளாலும் பெரிதாக பாதிக்கப்படுவதில்லை. இதனால், காஸ்பியன் கடல்வழி ஈரானுக்கும் ரஷ்யாவுக்கும் பாதுகாப்பு மற்றும் வியூக ரீதியாக மிக முக்கியமானதாக உள்ளது.

ஈரானின் வடக்கு துறைமுகங்களையும் ரஷ்யாவின் அஸ்ட்ராகான் துறைமுகத்தையும் இணைக்கும் இந்தப் பாதை, இதற்கு முன்பும் உக்ரைனால் குறிவைக்கப்பட்டுள்ளது. கடந்த ஆண்டு ஆகஸ்ட் மாதம், ஷாஹித்-136 ட்ரோன்களுக்கான உதிரிப்பாகங்கள் மற்றும் ஈரானிய வெடிபொருட்கள் ஏற்றிச் சென்றதாகக் கூறப்படும் ஒரு சரக்குக் கப்பல் உக்ரைன் ட்ரோன்களால் தாக்கப்பட்டதாக தகவல்கள் வெளியாகின.

அதேபோல், 2024-ஆம் ஆண்டில் ஈரானிய பாலிஸ்டிக் ஏவுகணைகள் ரஷ்யாவுக்கு இந்த வழியே கொண்டு செல்லப்பட்டதாகவும், அவை உக்ரைனுக்கு எதிராக பயன்படுத்தப்படலாம் என்றும் அமெரிக்கா குற்றம் சாட்டியது. இதையடுத்து, ஈரான்–ரஷ்யா ராணுவ ஒத்துழைப்பு குறித்து அமெரிக்க தேசிய பாதுகாப்பு கவுன்சிலும் எச்சரிக்கை விடுத்தது. இருப்பினும், ரஷ்யாவுக்கு ராணுவ உதவி வழங்கவில்லை என்று ஈரான் மறுத்தது.

இந்தப் பின்னணியில், கடந்த வார இறுதியில் காஸ்பியன் கடலில் கப்பல்கள் மற்றும் எரிசக்தி உள்கட்டமைப்புகள் மீது உக்ரைன் ட்ரோன் தாக்குதல்களை நடத்தியதாக கூறப்படுகிறது. மேலும், மத்திய கிழக்கில் உள்ள அமெரிக்க ராணுவத் தளங்கள் மீது தாக்குதல்களை நடத்துவதற்காக ஈரானுக்கு ரஷ்யா செயற்கைக்கோள் தரவுகளை வழங்கி வருவதாகவும் ஜெலென்ஸ்கி குற்றம் சாட்டியுள்ளார்.

காஸ்பியன் கடலில் ஈரானிய வணிகக் கப்பல் மீது உக்ரைன் நடத்தியதாகக் கூறப்படும் தாக்குதலுக்கு பதிலடி வழங்கப்படும் என்று ஈரான் எச்சரித்துள்ளது. இதன் மூலம், மத்திய கிழக்குப் போரும் ரஷ்யா–உக்ரைன் போரும் ஒன்றோடொன்று இணையும் சூழ்நிலை உருவாகியுள்ளதாகக் கருதப்படுகிறது.

இந்தச் சூழலில், அமெரிக்க அதிபர் டொனால்ட் டிரம்பை உக்ரைன் அதிபர் வோலோடிமிர் ஜெலென்ஸ்கி சந்தித்து பேசியுள்ளார். அந்தச் சந்திப்பு மிகவும் சிறப்பாக நடைபெற்றதாக டிரம்ப் தனது Truth Social தளத்தில் தெரிவித்துள்ளார்.

உக்ரைனுக்கு கூடுதல் ராணுவ உதவி வழங்குவது குறித்து அமெரிக்கா அதிகாரப்பூர்வ அறிவிப்பு வெளியிடவில்லை என்றாலும், Patriot ஏவுகணைகளின் உள்நாட்டு உற்பத்திக்கான உரிமத்தை வழங்க டிரம்ப் ஒப்புக்கொண்டதாக ஜெலென்ஸ்கி பின்னர் தெரிவித்தார்.

ரஷ்யாவின் ட்ரோன் மற்றும் பாலிஸ்டிக் ஏவுகணைத் தாக்குதல்களில் இருந்து உக்ரைன் நகரங்களைப் பாதுகாக்க Patriot இடைமறிப்பு ஏவுகணைகள் மிகவும் அவசியமானவை. அவை இல்லாமல் பாலிஸ்டிக் ஏவுகணைகளை திறம்பட இடைமறிக்கும் வான் பாதுகாப்பு அமைப்பை செயல்படுத்துவது சாத்தியமில்லை. இதனால், நீண்ட காலமாக Patriot ஏவுகணைகளை வழங்குமாறு உக்ரைன் அமெரிக்காவிடம் கோரி வருகிறது.

இந்த நிலையில், Patriot ஏவுகணை உற்பத்திக்கான அனுமதி வழங்கப்படுவது, மத்திய கிழக்குப் போரும் ரஷ்யா–உக்ரைன் போரும் ஒன்றோடொன்று இணைக்கப்படுகின்றன என்ற விமர்சனத்தையும், அமெரிக்காவின் வியூக அணுகுமுறை குறித்த புதிய கேள்விகளையும் எழுப்பியுள்ளது.

இதையும் படிங்க: டிரம்ப் - நெதன்யாகு சந்திப்புக்கு சில மணி நேரத்தில் ஈரான் ஏவுகணை தாக்குதல்! அமெரிக்க ராணுவத்தை குறிவைத்து அதிரடி!