டிட்வா புயல் பாதிப்பு சம்பந்தமாகவும், அதன் விளைவுகள் குறித்தும், அதன் மீது எடுக்கப்பட்ட நடவடிக்கைகள் குறித்தும் ராமநாபுரம், புதுக்கோட்டை,  நாகப்பட்டினம், தஞ்சாவூர், திருவாரூர், கடலூர், விழுப்புரம், மயிலாடுதுறை மாவட்ட ஆட்சியர்களுடன், சென்னை தலைமைச் செயலகத்தில் உள்ள அலுவலகத்தில் காணொலி காட்சி வாயிலாக வருவாய் மற்றும் பேரிடர் மேலாண்மை துறை அமைச்சர் கே கே எஸ்எஸ்ஆர் ராமச்சந்திரன்  ஆலோசனை நடத்தினார். 

அதனைத் தொடர்ந்து செய்தியாளர்களைச் சந்தித்த அவர் பேசியதாவது: தமிழகத்தை பொறுத்தவரை நாகப்பட்டினம் மாவட்டத்தில் உள்ள தோப்புத்துறை என்ற இடத்தில் தான் அதிக அளவாக 20 சென்டி மீட்டர் மழை பதிவாகியுள்ளது. மீதமுள்ள இடங்களில் சராசரி அளவிலான மழையே பொழிந்துள்ளது. இந்த புயலை பொறுத்தளவிற்குராமநாதபுரத்தில இருந்து கடல் ஓரமாகவே வந்து கொண்டிருக்கிறது. சென்னை வரை வரும் என்று எதிர்பார்க்கிறோம். ஆனால் சென்னைக்குள்ளே வருகிறதா அல்லது அப்படி வெளியே போகிறதா என்பதை மாநில ஆய்வு மையம் தெளிவாக சொல்லவில்லை. இன்றைக்கு சொல்லி இருக்கிற ஒரு அறிக்கையின் படி, சென்னைக்கு புயல் வராமல் சென்னை ஓரமாகவே கடந்து செல்லக்கூடும் என கணிக்கப்பட்டுள்ளது.  

புயல் குறித்து முதலமைச்சர் மு.க.ஸ்டாலின் நேரடியாக கண்கானித்து வருகிறார். தகுந்த முன்னெச்சரிக்கை நடவடிக்கை எடுத்து வருகிறார். அனைத்து மாவட்டங்களிலும் தாழ்வான பகுதிகளில் இருப்பவர்களை தங்க வைப்பதற்காக தனியார் திருமண மண்டபங்கள் தயார் நிலையில் உள்ளன. மக்களுக்கு தேவையான உணவு மற்றும் குழந்தைகளுக்கு தேவையான பால் ஆகிய அத்தியாவசியப் பொருட்களும் முகாம்களில் தயார் நிலையில் உள்ளன. 

இதையும் படிங்க: இலங்கையை சூறையாடிய 'டிட்வா' புயல்.. களமிறங்கிய INS விக்ராந்த்..!! மீட்புப் பணிகள் தீவிரம்..!!

தமிழக அரசு சார்பில் 16 என்டிஆர்எப் அணிகளும், மத்திய அரசு சார்பில் 12 அணிகள் என தமிழ்நாடு முழுவதும் 28 அணிகள் தயாராக உள்ளன. மேலும் 10 என்டிஆர்எப்  அணிகள் தேவை என மத்திய அரசிடம் வலியுறுத்தி, விமானம் மூலமாக வரவழைத்துள்ளோம். இந்திய ராணுவத்தின் விமானம் மற்றும் கடற்படையையும் தயார் நிலையில் இருக்கும் படி கேட்டுக்கொண்டுள்ளோம். 

தமிழகத்தைப் பொறுத்தவரை கனமழையால் எந்தவிதமான உயிரிழப்பும் ஏற்படவில்லை. 16 கால்நடைகள் இறந்துள்ளன. 24 குடிசைகள் இடிந்து விழுந்துள்ளன. எந்தவிதமான பெரிய அளவிலான போக்குவரத்து பாதிப்பும் ஏற்படவில்லை. தமிழகத்தைப் பொறுத்தவரை டிட்வா புயலால் சென்னைக்கு பெரிய அளவிலான பாதிப்புகள் ஏற்படாது என்றும், கடலூர் மாவட்டத்திற்கு தான் அதிக அளவிலான பாதிப்புகள் ஏற்படும் என்றும் அமைச்சர் தெரிவித்துள்ளார். 
 

இதையும் படிங்க: #BREAKING உருவாகிறது 2வது புயல்... வலுவடைந்தது ஆழ்ந்த காற்றழுத்த தாழ்வு மண்டலம்... சென்னை நோக்கி வரும் ஆபத்து?