திமுகவின் நிறுவனத் தலைவரும், மறைந்த முன்னாள் முதலமைச்சருமான மு. கருணாநிதியின் மனைவியும், முன்னாள் தமிழக முதலமைச்சர் மு.க. ஸ்டாலினின் தாயாருமான தயாளு அம்மாள் (95) வயது முதிர்வு காரணமாக ஏற்பட்ட உடல்நலக் குறைவு காரணமாக சென்னை கிரீம்ஸ் சாலையில் உள்ள அப்பல்லோ மருத்துவமனையில் அனுமதிக்கப்பட்டுள்ளார். இச்செய்தி திமுக தொண்டர்கள், அரசியல் தலைவர்கள் மற்றும் தமிழக மக்கள் மத்தியில் பெரும் பரபரப்பையும் கவலையையும் ஏற்படுத்தியுள்ளது.

கடந்த சில ஆண்டுகளாகவே பல்வேறு வயதுசார்ந்த உடல்நலப் பிரச்சினைகளால் அவதிப்பட்டு வந்த தயாளு அம்மாள், சென்னை கோபாலபுரம் இல்லத்தில் தீவிர மருத்துவ கண்காணிப்பில் இருந்து வந்தார். அல்சைமர் உள்ளிட்ட நோய்களால் பாதிக்கப்பட்ட அவருக்கு, வீட்டிலேயே பிரத்யேக மருத்துவ உபகரணங்கள், ஆக்ஸிஜன் சப்போர்ட் உள்ளிட்ட வசதிகள் மற்றும் தனிப்பட்ட மருத்துவக் குழுவின் தொடர் உதவியுடன் சிகிச்சை அளிக்கப்பட்டு வந்தது. 

2018-ம் ஆண்டு தன் கணவர் கலைஞர் மு. கருணாநிதி மறைந்ததற்குப் பிறகு அவரது உடல்நிலை கணிசமாகப் பாதிக்கப்பட்டதாகக் கூறப்படுகிறது.சிறு உடல்நலக் குறைவுகளின்போது மட்டுமே மருத்துவமனைக்கு அழைத்துச் செல்லும் வழக்கம் இருந்த நிலையில், திடீரென ஏற்பட்ட சுகவீனம் காரணமாக அவரை உடனடியாக அப்பல்லோ மருத்துவமனைக்கு மாற்றினர். மருத்துவமனையில் உரிய முதலுதவி அளிக்கப்பட்டு, மூத்த மருத்துவர்கள் குழுவின் தீவிர கண்காணிப்பில் சிகிச்சை தொடங்கியுள்ளது. 

இதையும் படிங்க: திமுக தலைவர் மு.க.ஸ்டாலின் ஜுலை 5ல் லண்டன் பயணம்!! உதயநிதி, இன்பநிதியும் உடன் செல்கின்றனர்!

தற்போது அவரது உடல்நிலை ஓரளவு சீராக உள்ளதாக மருத்துவ வட்டாரங்கள் தெரிவிக்கின்றன. இந்த செய்தி அறிந்ததும் மு.க. ஸ்டாலின் உடனடியாக மருத்துவமனைக்கு விரைந்து வந்தார். தாயாரின் உடல்நிலை குறித்து மருத்துவர்களிடம் விரிவாக விசாரித்த அவர், அளிக்கப்படும் சிகிச்சை முறைகள் மற்றும் மருந்துகள் பற்றி தெரிந்துகொண்டார். எதிர்க்கட்சித் தலைவர் உதயநிதி ஸ்டாலின் உள்ளிட்ட குடும்ப உறுப்பினர்கள் பலரும் மருத்துவமனைக்கு வந்து நலம் விசாரித்தனர். மு.க. அழகிரி உள்ளிட்ட பிற குடும்ப உறுப்பினர்களும் வருகை தந்ததாகத் தகவல்கள் வெளியாகியுள்ளன.

மருத்துவமனை வளாகத்தில் போலீஸ் பாதுகாப்பு பலப்படுத்தப்பட்டுள்ளது. தயாளு அம்மாளின் உடல்நிலை குறித்த விரிவான மருத்துவ அறிக்கையை அப்பல்லோ மருத்துவமனை நிர்வாகம் விரைவில் வெளியிடும் என எதிர்பார்க்கப்படுகிறது. தமிழகம் முழுவதும் திமுக தொண்டர்கள் மற்றும் பொதுமக்கள் அவரது விரைவான குணமடைவுக்காக பிரார்த்தனை செய்து வருகின்றனர்.

தயாளு அம்மாள் தமிழக அரசியல் வரலாற்றில் முக்கிய பங்கு வகித்த கலைஞர் கருணாநிதியின் வாழ்க்கைத் துணைவியாகவும், குடும்பத்தின் தூணாகவும் விளங்கி வருபவர். அவரது உடல்நலம் தொடர்பான எந்தவித முன்னேற்றமும் தமிழக அரசியல் களத்தில் நிம்மதியை ஏற்படுத்தும் என எதிர்பார்க்கப்படுகிறது.  

இதையும் படிங்க: வாயிலும் வயிற்றிலும் அடித்துக் கொண்டாலும் 100% தோல்வி உறுதி!! விரக்தியில் வெடிக்கிறார், துடிக்கிறார் மு.க.ஸ்டாலின்! தவெக பதிலடி!