நேபாள-திபெத் எல்லைப்பகுதியில் ஏற்பட்ட திடீர் பேரழிவு, இமயமலையின் உயரமான பகுதிகளில் இயற்கையின் சீற்றத்தை மீண்டும் உலகிற்கு நினைவூட்டியுள்ளது. ஆகஸ்ட் 26ஆம் தேதி காலை, சுமார் 5,200 மீட்டர் உயரத்தில் அமைந்திருந்த பனிப்பாறையின் கீழ்ப்பகுதி திடீரென உடைந்து சரிந்தது. இந்த பனி-பாறை பனிச்சரிவு சுமார் 1,200 மீட்டர் ஆழத்திற்கு பள்ளத்தாக்கில் விழுந்து, லெண்டே ஆற்றில் பெரும் அளவிலான பனி, பாறைகள் மற்றும் வண்டலைக் குவித்தது. 

தற்காலிகமாக ஆற்றைத் தடுத்த இந்தத் தடை உடைந்தபோது, சக்திவாய்ந்த வெள்ளப்பெருக்கு போதேகோசி மற்றும் திரிசூலி ஆறுகளில் பாய்ந்தது.ஆரம்பத்தில் நிலநடுக்கம் தூண்டியதாகக் கருதப்பட்ட இந்த நிகழ்வு, அமெரிக்க புவியியல் ஆய்வு நிறுவனம் (USGS) ஆய்வுக்குப் பிறகு பனிப்பாறை சரிவால் ஏற்பட்ட நில அதிர்வு என உறுதிப்படுத்தப்பட்டது. செயற்கைக்கோள் படங்கள் இந்த மாற்றத்தைத் தெளிவாகக் காட்டுகின்றன. 

ஆகஸ்ட் 23ஆம் தேதி எடுக்கப்பட்ட படத்தில், பசுமையான மலைகளின் நடுவே போதேகோசி நதி வெள்ளை நூல் போல மென்மையாகப் பாய்ந்து சென்றது. ஆனால் வெள்ளத்திற்குப் பிறகு எடுக்கப்பட்ட படங்களில், ஆற்றின் போக்கு முற்றிலும் மாறி, சேறு, பாறைகள் மற்றும் இடிபாடுகளால் நிரம்பிய அலங்கோலக் காட்சிகள் தெரிகின்றன. இந்தப் படங்கள் உலகளாவிய கவனத்தை ஈர்த்துள்ளன.ரசுவா மாவட்டத்தில் உள்ள திமுரே, சியாப்ருபேசி போன்ற பகுதிகளில் வீடுகள், பாலங்கள், வாகனங்கள் மற்றும் நீர்மின் திட்டங்கள் நொடிப்பொழுதில் அடித்துச் செல்லப்பட்டன. 

இதையும் படிங்க: தடம் தெரியாமல் உருகுலைந்து போன நேபாளம்... காணாமல் போனவர்களின் எண்ணிக்கை மட்டும் இவ்வளவா?

ஆற்றின் நீர்மட்டம் சில இடங்களில் 30 நிமிடங்களில் ஒன்பது மீட்டர் உயர்ந்ததாகத் தகவல்கள் தெரிவிக்கின்றன. பலி எண்ணிக்கை 200-ஐக் கடந்துள்ளது. நூற்றுக்கணக்கானோர் காணாமல் போயுள்ளனர். இதில் இந்தியர்கள், பிரிட்டிஷ், அமெரிக்க, ஆஸ்திரேலிய சுற்றுலாப் பயணிகள் உட்பட பலர் அடங்குவர். திபெத் பகுதியிலும் பலர் காணாமல் போயுள்ளனர். மீட்புப் பணிகள் இரு நாடுகளிலும் தீவிரமாக நடைபெற்று வருகின்றன. 

ஹெலிகாப்டர்கள், இராணுவப் படைகள் மற்றும் உள்ளூர் மீட்புக் குழுக்கள் பணியில் ஈடுபட்டுள்ளன. காயமடைந்தவர்களுக்கு சிகிச்சை அளிக்கப்பட்டு வருகிறது. மேலும் வெள்ள அபாயம் குறித்து எச்சரிக்கை விடுக்கப்பட்டுள்ளது. இந்தப் பேரழிவு, இமயமலைப் பகுதியில் பருவநிலை மாற்றத்தால் பனிப்பாறைகள் உருகும் அபாயத்தை மீண்டும் எடுத்துக்காட்டுகிறது.

இதையும் படிங்க: வெள்ளத்தில் சிக்கிய தமிழர்கள்.. மீட்பதில் சிக்கல்... அவசர உதவி எண்கள் அறிவிப்பு..!!