நேபாளத்தில் ஏற்பட்ட பெருவெள்ளத்தில் சுற்றியிருந்த கட்டடங்கள் அனைத்தும் வெள்ளநீரில் அடித்துச் செல்லப்பட்ட நிலையில், ஒரு மாடி வீடு மட்டும் எந்தவித சேதமும் இல்லாமல் கம்பீரமாக நிற்கும் வீடியோ இணையத்தில் வேகமாக வைரலாகி வருகிறது. வெள்ளத்தின் கோரத்துக்கு நடுவிலும் அந்த வீட்டில் இருந்த குடும்பத்தினர் உயிர் தப்பிய காட்சி பலரது கவனத்தையும் ஈர்த்துள்ளது.

நேபாளத்தை சமீபத்தில் தாக்கிய பெருவெள்ளம் பல்வேறு பகுதிகளில் பெரும் சேதத்தை ஏற்படுத்தியுள்ளது. ஆறுகளில் ஏற்பட்ட திடீர் நீர்வரத்து காரணமாக வீடுகள், கடைகள், பாலங்கள் உள்ளிட்ட பல்வேறு கட்டமைப்புகள் வெள்ளத்தில் அடித்துச் செல்லப்பட்டன. பல இடங்களில் சாலைகள் துண்டிக்கப்பட்டதுடன், பொதுமக்களின் இயல்பு வாழ்க்கையும் கடுமையாக பாதிக்கப்பட்டுள்ளது.

இந்த நிலையில், நுவாகோட் மாவட்டத்தில் எடுக்கப்பட்டதாக கூறப்படும் வீடியோ ஒன்று சமூக வலைதளங்களில் அதிகமாக பகிரப்பட்டு வருகிறது. அதில், ஒரு பகுதியை வெள்ளநீர் முழுமையாக சூழ்ந்திருப்பதையும், சுற்றியிருந்த பல கட்டடங்கள் காணாமல் போயிருப்பதையும் பார்க்க முடிகிறது. ஆனால், அவற்றுக்கு மத்தியில் ஒரு மாடி வீடு மட்டும் எந்தவிதத்திலும் இடிந்து விழாமல் நிற்பது ஆச்சரியத்தை ஏற்படுத்தியுள்ளது.

இதையும் படிங்க: நேபாளத்தில் தொடங்கிய வெள்ளம்… 200 கி.மீ. தூரம் அடித்துச் செல்லப்பட்ட சடலங்கள்! இந்தியாவில் 7 உடல்கள் மீட்பு!

அந்த வீட்டின் பால்கனியில் குடும்பத்தினர் நின்றுகொண்டு சுற்றிலும் சீறிப்பாயும் வெள்ளநீரை அதிர்ச்சியுடன் பார்த்துக் கொண்டிருக்கும் காட்சியும் வீடியோவில் இடம்பெற்றுள்ளதாக கூறப்படுகிறது. சுற்றியுள்ள கட்டடங்கள் வெள்ளத்தில் சிக்கிய நிலையில், இந்த குடும்பம் மட்டும் வீட்டுக்குள் பாதுகாப்பாக இருந்ததாக தகவல்கள் தெரிவிக்கின்றன.

இந்த வீடு மட்டும் எப்படி தாக்குப்பிடித்தது என்பது தற்போது இணையத்தில் விவாதமாகியுள்ளது. சிலர் வீட்டின் கட்டுமானத் தரமே முக்கிய காரணமாக இருக்கலாம் என கருத்து தெரிவித்து வருகின்றனர். குறிப்பாக கட்டடத்தின் அடித்தளம், தூண்கள், சுவர்கள் உள்ளிட்டவை நீரின் அழுத்தத்தை எந்த அளவுக்கு தாங்கும் வகையில் அமைக்கப்பட்டுள்ளன என்பது முக்கியமானதாக இருக்கலாம் என கூறப்படுகிறது.

மேலும், கட்டுமானத்தில் பயன்படுத்தப்பட்ட பொருட்களின் தரம், சிமெண்ட் கலவை, இரும்புக் கம்பிகளின் பயன்பாடு மற்றும் கட்டுமான விதிமுறைகள் முறையாக பின்பற்றப்பட்டிருந்ததா என்பதும் வீட்டின் உறுதித்தன்மைக்கு காரணமாக இருக்கலாம் என சமூக வலைதளங்களில் பலர் கருத்து பதிவிட்டு வருகின்றனர். இருப்பினும், இதற்கான உறுதியான காரணத்தை கட்டடப் பொறியியல் ஆய்வு இல்லாமல் முடிவு செய்ய முடியாது.

வெள்ளத்தின் நடுவே தனியாக கம்பீரமாக நிற்கும் இந்த வீட்டு காட்சி தற்போது நெட்டிசன்கள் மத்தியில் பெரும் பேசுபொருளாகியுள்ளது. வீடியோவை பகிர்ந்து வரும் பலரும், வீட்டின் கட்டுமானத்தை பாராட்டுவதுடன், இதை வடிவமைத்த பொறியாளர் மற்றும் கட்டுமானக் குழுவினரையும் பாராட்டி வருகின்றனர்.

ஒருபுறம் நேபாள வெள்ளம் ஏற்படுத்திய பேரழிவு உலகையே அதிர்ச்சிக்குள்ளாக்கியுள்ள நிலையில், மறுபுறம் அந்த அழிவுக்கு நடுவே தப்பிய இந்த ஒரு வீட்டின் காட்சி இணையத்தில் வியப்பையும் கவனத்தையும் ஏற்படுத்தியுள்ளது.

இதையும் படிங்க: நேபாள வெள்ளம்: 320 இந்தியர்களை தொடர்பு கொள்ள முடியவில்லை! வெளியுறவுத்துறை சொன்ன முக்கிய தகவல்!