நேபாளத்தில் ஏற்பட்ட திடீர் வெள்ளப்பெருக்கால் நூற்றுக்கணக்கானோர் உயிரிழந்துள்ள நிலையில், மீட்கப்பட்ட சடலங்களை அடையாளம் காண்பதில் அதிகாரிகளுக்கு பெரும் சவால் ஏற்பட்டுள்ளது. இதற்கிடையே, காணாமல் போனவர்களின் குடும்பத்தினர் தங்களது உறவினர்களை அடையாளம் காண உதவும் வகையில் நேபாள போலீசார் புதிய ஏற்பாட்டை செய்துள்ளனர்.
நேபாள போலீசார் தங்களது சமூக வலைதளப் பக்கத்தில் வெளியிட்டுள்ள கியூஆர் குறியீட்டை பொதுமக்கள் ஸ்கேன் செய்வதன் மூலம், மீட்கப்பட்ட சடலங்களின் புகைப்படங்கள் மற்றும் கிடைக்கப்பெற்ற அடையாள விவரங்களை பார்க்க முடியும். இதன் மூலம், வெள்ளத்தில் காணாமல் போன தங்களது உறவினர்களில் யாராவது மீட்கப்பட்டுள்ளார்களா என்பதை குடும்பத்தினர் அறிந்து கொள்ள முடியும்.
போதேகோஷி மற்றும் திரிசூலி ஆற்றுப் பகுதிகளில் இருந்து தொடர்ந்து சடலங்கள் மீட்கப்பட்டு வருகின்றன. வெள்ளநீர் சடலங்களை வெகு தொலைவுக்கு அடித்துச் செல்வதால், நேபாளத்தின் பல மாவட்டங்களில் உள்ள சவக்கிடங்குகளிலும் இடப்பற்றாக்குறை ஏற்பட்டுள்ளது. இதனால் மீட்கப்படும் உடல்களை பாதுகாப்பாக வைத்திருப்பதுடன், அவற்றை அடையாளம் காணும் பணியிலும் அதிகாரிகள் தீவிரமாக ஈடுபட்டுள்ளனர்.
இதையும் படிங்க: அசையவே இல்லை! நேபாள வெள்ளத்தில் கம்பீரமாக நின்ற ஒரே வீடு! இணையத்தில் வைரலாகும் வீடியோ!
திரிசூலி மற்றும் நாராயணி ஆறுகள் சங்கமிக்கும் சித்வான் பகுதியில் மட்டும் 137 உடல்கள் மீட்கப்பட்டதாக தெரிவிக்கப்பட்டுள்ளது. மருத்துவமனை சவக்கிடங்குகளில் ஒரே நேரத்தில் குறைந்த எண்ணிக்கையிலான உடல்களை மட்டுமே பாதுகாக்க முடிவதால், கூடுதல் இடங்களை தற்காலிக சவக்கிடங்குகளாக மாற்றும் நடவடிக்கையும் மேற்கொள்ளப்பட்டுள்ளது.
பரத்பூரில் பயன்படுத்தப்படாத அரசு கட்டடம் ஒன்றை தற்காலிக உடல் பாதுகாப்பு மையமாக மாற்றும் பணிகள் நடைபெற்று வருகின்றன. அங்கு சுமார் 250 உடல்களை வைக்க ஏற்பாடு செய்யப்படுவதாக கூறப்படுகிறது. உடல்கள் விரைவில் சிதைவடையாமல் இருக்க குளிரூட்டிகள் மற்றும் உலர் பனிக்கட்டியை பயன்படுத்தவும் அதிகாரிகள் திட்டமிட்டுள்ளனர்.
இதற்கிடையே, காத்மாண்டு போதனா மருத்துவமனை உள்ளிட்ட பகுதிகளில் காணாமல் போனவர்களின் குடும்பத்தினர் பெரும் சோகத்துடன் காத்திருக்கின்றனர். சவக்கிடங்குகளுக்கு வெளியே உறவினர்கள் குவிந்து, மீட்கப்பட்டவர்களில் தங்களது குடும்ப உறுப்பினர்கள் உள்ளனரா என்பதை தேடி வருகின்றனர்.
இந்த சூழலில், QR Code மூலம் சடலங்களின் புகைப்படங்களையும் அடையாள விவரங்களையும் பார்க்கும் வசதி, தொலைதூரத்தில் இருக்கும் குடும்பத்தினருக்கும் தகவலை விரைவாகச் சரிபார்க்க உதவும் முக்கிய முயற்சியாக பார்க்கப்படுகிறது.
இதையும் படிங்க: நேபாளத்தில் தொடங்கிய வெள்ளம்… 200 கி.மீ. தூரம் அடித்துச் செல்லப்பட்ட சடலங்கள்! இந்தியாவில் 7 உடல்கள் மீட்பு!