பீகார் சட்டமன்றத் தேர்தலின் முதல் கட்ட வாக்குப்பதிவு நாளை (நவம்பர் 6) நடைபெறும் நிலையில், காங்கிரஸ் தலைவர் ராகுல் காந்தி இன்று (நவம்பர் 5) அரியானா தேர்தலில் 'வாக்கு திருட்டு' நடந்ததாக பரபரப்பு குற்றச்சாட்டை முன்வைத்தார். இதற்கு மத்திய அமைச்சர் மற்றும் பாஜக மூத்த தலைவர் கிரண் ரிஜிஜு உடனடி பதிலடி கொடுத்துள்ளார். "இது பீகார் தேர்தலுக்கு கவனத்தைத் திசைதிருப்பும் உத்தி" என்று அவர் விமர்சித்தார். இந்த விவாதம், அரசியல் களத்தில் பெரும் சலசலப்பை ஏற்படுத்தியுள்ளது.

ராகுல் காந்தி, டெல்லியில் செய்தியாளர்களைச் சந்தித்து, அரியானா 2024 சட்டமன்றத் தேர்தலில் பெரிய அளவில் மோசடி நடந்ததாகக் கூறினார். "பா.ஜ.க.வும் தேர்தல் ஆணையமும் சேர்ந்து 25 லட்சம் போலி வாக்குகள் போட்டனர். இதனால் காங்கிரஸ் ஆட்சி அமைக்க வேண்டிய மாநிலம் பா.ஜ.க.வுக்கு போய்விட்டது" என்று அவர் குற்றம் சாட்டினார். அவர் கொடுத்த விவரங்கள்: 5 லட்சத்து 21 ஆயிரத்து 619 இரட்டை வாக்குகள், 93 ஆயிரத்து 174 செல்லாத வாக்குகள், 19 லட்சம் பல்க் வாக்குகள். "மொத்த வாக்குகளில் 8-ல் ஒன்று போலியானது. தேர்தலுக்கு முந்தைய கருத்துக்கணிப்புகள் காங்கிரஸ் வெற்றி பெறும் எனக் கூறிய நிலையில் முடிவுகள் மாறிவிட்டன" என்று அவர் சொன்னார்.

மேலும், அரியானா முதல்வர் நயாப் சிங் சைனி, தேர்தல் முடிவுக்கு இரண்டு நாட்கள் முன் "பா.ஜ.க. ஆட்சி பிடிக்கும், வேலைகளைச் செய்துவிட்டோம்" என்று சிரித்ததை அவர் சுட்டிக்காட்டினார். "அந்த சிரிப்பின் பின்னால் பெரிய சதி இருக்கிறது" என்று ராகுல் கூறினார். அவர் இதை 'ஆபரேஷன் சர்கார் சோரி' (அரசு திருட்டு) என்று அழைத்து, தேர்தல் ஆணையத்தை 'பா.ஜ.க. கைப்பாவை' என்று விமர்சித்தார். இது அவரது 'வாக்காளர் உரிமை யாத்திரை'யின் தொடர்ச்சியாகும். கர்நாடகா, மகாராஷ்டிரா தேர்தல்களுக்குப் பின், இது மூன்றாவது முறை.

இதையும் படிங்க: பொங்கல் பண்டிகைதோறும் ரூ.30,000 நிதியுதவி! வாக்குறுதிகளை வாரி வழங்கும் தேஜஸ்வி! பீகார் தேர்தல் விறுவிறு!

இந்தக் குற்றச்சாட்டுக்கு கிரண் ரிஜிஜு உடனடி பதிலடி கொடுத்தார். பாஜக தலைமை அலுவலகத்தில் செய்தியாளர்களிடம் பேசிய அவர், "அரியானாவில் காங்கிரஸ் முகவர்களே எந்தப் புகாரும் அளிக்கவில்லை. வாக்காளர் பட்டியல் பலமுறை சரிபார்க்கப்பட்டது. ராகுல் பொய் குற்றச்சாட்டுகளைப் பரப்புகிறார். தனது தோல்விகளிலிருந்து கவனத்தைத் திசைதிருப்ப முயல்கிறார்" என்று விமர்சித்தார். 

ரிஜிஜு மேலும் கூறினார்: "பீகார் தேர்தலுக்கு நாளை வாக்குப்பதிவு. அங்கு காங்கிரஸுக்கு எதுவும் இல்லை என்பதால், அரியானா விவகாரத்தை எடுத்து பேசுகிறார். இது திசைதிருப்பல் உத்தி. இளம் வாக்காளர்களைத் தூண்டி, EVM-களை பழி சாட்கிறார். தனது பலவீனங்களை மறைக்கிறார்."

ரிஜிஜு, காங்கிரஸின் உள்கட்சி பிரச்சினைகளையும் சுட்டிக்காட்டினார். "அரியானாவில் காங்கிரஸ் தலைவர்கள் குமாரி சேல்ஜா, ராவ் நரேந்திர சிங், 'கட்சியில் ஒருங்கிணைப்பு இல்லை' என்று ஒப்புக்கொண்டனர். முன்னாள் அமைச்சர்கள் ராஜினாமா செய்தனர். அப்படி இருக்க, ராகுல் 'வாக்கு திருட்டு' என்று சொல்கிறார். இதனை யார் நம்புவார்கள்?" என்று அவர் கேட்டார். 

ராகுலின் 'பிரேசிலிய மாடல்' உதாரணத்தை 'வெளிநாட்டு யாத்திரைகளில் சேகரித்த தகவல்' என்று கிண்டல் செய்தார். "ராகுல் அணு குண்டு வெடிக்கும் என்று சொல்கிறார், ஆனால் ஒருபோதும் வெடிக்கவில்லை" என்று அவர் கிண்டலடித்தார்.

இந்த விவாதம், பீகார் தேர்தலில் காங்கிரஸ்-ஆர்.ஜே.டி கூட்டணியின் முக்கிய பிரசாரமாக மாறலாம். ராகுல், "இது ஜனநாயகத்தை அழிக்கும் சதி" என்று எச்சரிக்கிறார். பாஜக, "காங்கிரஸ் தோல்வியை ஏற்க மறுக்கிறது" என்று பதிலளிக்கிறது. தேர்தல் ஆணையம், "வாக்காளர் பட்டியலுக்கு எதிராக எந்த புகாரும் இல்லை" என்று உறுதிப்படுத்தியுள்ளது. இந்த சர்ச்சை, வாக்கு நேர்மை, EVM, வாக்காளர் பட்டியல் திருத்தம் போன்ற விவாதங்களை மீண்டும் கொண்டு வந்துள்ளது.

இதையும் படிங்க: மக்களே உஷார்... இந்த 14 மாவட்டங்களை பொளந்தெடுக்கப் போகும் மழை...!