தமிழகத்தில் வளிமண்டலச் சுழற்சி காரணமாகப் பரவலாக மழை பெய்யக்கூடும் என வானிலை ஆய்வு மையம் எச்சரித்திருந்த சூழலில், இன்று (ஜூன் 18, 2026) மாலை 4:00 மணி அளவில் சென்னை மற்றும் அதன் புறநகர்ப் பகுதிகளில் திடீரென வானிலை தலைகீழாக மாறியது. கருகருவென மேகக்கூட்டங்கள் அசுர வேகத்தில் ஒன்றாகத் திரண்டதைத் தொடர்ந்து, இடி மின்னலுடன் கூடிய பயங்கரச் சூறைக்காற்று வீசத் தொடங்கியது. இந்தத் திடீர்ச் சூறைக்காற்று மற்றும் மோசமான வானிலை காரணமாகச் சென்னை சர்வதேச விமான நிலையத்தில் (Chennai International Airport) விமானப் போக்குவரத்துச் சேவைகள் அடியோடு முடங்கி, 20-க்கும் மேற்பட்ட சேவைகள் கடுமையாகப் பாதிக்கப்பட்டுள்ளன.
விமான நிலையப் பகுதியில் வீசிய பயங்கரக் காற்றின் வேகம் காரணமாக, அந்த நேரத்தில் சென்னையில் தரையிறங்க வந்த 10-க்கும் மேற்பட்ட விமானங்கள் தரைதொட முடியாமல் வானிலேயே நீண்ட நேரம் வட்டமடித்துத் தத்தளித்தன. சேலத்தில் இருந்து 72 பயணிகளுடன் மாலை 4:30 மணிக்கு வந்த இண்டிகோ ஏர்லைன்ஸ் விமானம், சென்னை புறநகர்ப் பகுதிகளான வண்டலூர், கூடுவாஞ்சேரி, கேளம்பாக்கம் வான்பரப்பில் நீண்ட நேரம் தத்தளித்தது. ஜெய்ப்பூரில் இருந்து 168 பயணிகளுடன் வந்த இண்டிகோ விமானம் மற்றும் கோவையில் இருந்து 138 பயணிகளுடன் வந்த இண்டிகோ விமானம் ஆகியவை சென்னை மெரினா கடற்கரை மற்றும் கிழக்குக் கடற்கரைச் சாலை (ECR) வான்வெளியில் வட்டமடித்துப் பறந்தன. இதுதவிர டாக்கா, கொல்கத்தா, காசியாபாத், மும்பை, சீரடி, மதுரை ஆகிய நகரங்களில் இருந்து வந்த விமானங்களும் தரையிறங்க முடியாமல் வானில் நீண்ட நேரம் காக்க வைக்கப்பட்டன.
இதையும் படிங்க: நடிகர் ரஜினிகாந்த் இல்லத்தில் பாஜக தலைவர்கள்..! பிரதமர் மோடியின் சாதனை நூல்கள் வழங்கிய நயினார்..!
மறுபுறம், சென்னையில் இருந்து புறப்பட வேண்டிய ஹைதராபாத், பெங்களூரு, விசாகப்பட்டினம், புனே, மும்பை, டெல்லி, ராஞ்சி, மைசூரு உள்ளிட்ட 10-க்கும் மேற்பட்ட விமானங்கள் போதிய தட்பவெப்பச் சூழல் இல்லாததால் தாமதமாகப் புறப்படும் என அறிவிக்கப்பட்டது. இதனால் விமான நிலையப் முனையங்களில் பயணிகள் நீண்ட வரிசையில் காத்திருந்து கடும் அவதிக்குள்ளாயினர். இது குறித்துச் சென்னை விமான நிலையப் புரோட்டோகால் அதிகாரிகள் தரப்பில் பேசுகையில், "இது வழக்கமான கோடை மழையின் தாக்கம்தான். சிறிது நேரத்தில் சூறைக்காற்று மற்றும் இடி மின்னல் ஓய்ந்ததும் விமானங்கள் வழக்கம் போல் பாதுகாப்பாகத் தரையிறக்கப்படும். தற்காலிகமாக ஏற்பட்டுள்ள இந்த வானிலைச் சிக்கலைப் பயணிகள் பொறுமையுடன் கையாண்டு ஒத்துழைக்க வேண்டும்" என்று கேட்டுக்கொண்டனர்.
இதையும் படிங்க: தொடர் மின்வெட்டால் தவிக்கும் சென்னை மக்கள்..!! காரணம் சொல்லும் மின்வாரியம்..!! என்ன தெரியுமா..??