துபாயில் இருந்து டெல் அவிவ் நோக்கிச் சென்ற ஃப்ளைடுபாய் விமானத்தில் நடைபெற்ற கத்திக்குத்து சம்பவம் பெரும் பரபரப்பை ஏற்படுத்தியுள்ளது. விமானத்தை வீழ்த்த முயன்றதாகக் கூறப்படும் சம்பவத்தில், இந்திய விமானி கேப்டன் ஸ்மித் மச்சார் காயமடைந்தார். இருப்பினும், அவர் காயமடைந்த நிலையிலும் துணிச்சலுடன் செயல்பட்டு விமானத்தில் இருந்த பயணிகளின் உயிரைக் காப்பாற்ற உதவியுள்ளார்.

துபாயில் இருந்து டெல் அவிவ் நோக்கி ஃப்ளைடுபாய் நிறுவனத்தின் FZ1073 விமானம் புறப்பட்டது. விமானம் நடுவானில் பறந்து கொண்டிருந்தபோது, விமானிகளுக்கிடையே கடுமையான மோதல் ஏற்பட்டதாக தெரிவிக்கப்பட்டுள்ளது. இதில் துணை விமானி, விமானி கேப்டன் ஸ்மித் மச்சாரை கத்தியால் தாக்கியதாகவும், பின்னர் விமானத்தை வீழ்த்த முயன்றதாகவும் இஸ்ரேல் பிரதமர் பெஞ்சமின் நெதன்யாகு தெரிவித்துள்ளார்.

இந்த தாக்குதலால் விமானம் திடீரென அதிக உயரத்தில் கட்டுப்பாட்டை இழந்தது. விமானத்தில் அவசரநிலை ஏற்பட்டதைத் தொடர்ந்து, பயணிகளும் விமான ஊழியர்களும் உடனடியாக செயல்பட்டனர். காயமடைந்த நிலையிலும் கேப்டன் ஸ்மித் மச்சார் காக்பிட் கதவைத் திறக்க உதவியதாகவும், இதையடுத்து பயணிகள் மற்றும் ஊழியர்கள் உள்ளே சென்று தாக்குதல் நடத்தியதாகக் கூறப்படும் துணை விமானியை கட்டுப்படுத்தியதாகவும் தெரிவிக்கப்பட்டுள்ளது.

இதையும் படிங்க: உலக அரசியலில் பரபரப்பு... திடீரென அமெரிக்க அதிபர் டிரம்பிற்கு போன் போட்ட பிரதமர் மோடி... என்ன நடந்தது?

இதனிடையே, விமானத்தில் பயணம் செய்த மற்றொரு விமானி குழுவினர் விமானத்தின் கட்டுப்பாட்டை ஏற்றுக்கொண்டனர். இதையடுத்து விமானம் சவுதி அரேபியாவின் தபுக் நகருக்கு திருப்பி விடப்பட்டு, அங்குள்ள விமான நிலையத்தில் பாதுகாப்பாக தரையிறக்கப்பட்டது. விமானத்தில் இருந்த 180 பயணிகளும் பாதுகாப்பாக மீட்கப்பட்டனர்.

இந்திய விமானி ஸ்மித் மச்சார் நிலை: 

கத்திக்குத்தில் காயமடைந்த கேப்டன் ஸ்மித் மச்சார், சவுதி அரேபியாவின் தபுக் நகரில் உள்ள மருத்துவமனையில் சிகிச்சை பெற்று வருகிறார். அவரது உடல்நிலை தற்போது சீராக இருப்பதாக சவுதி அரேபியாவில் உள்ள இந்திய தூதரகம் தெரிவித்துள்ளது. அவரது உடல்நிலையை இந்திய தூதரக அதிகாரிகள் தொடர்ந்து கண்காணித்து வருவதுடன், அவரது குடும்பத்தினருடனும் தொடர்பில் இருப்பதாக தெரிவிக்கப்பட்டுள்ளது.

இந்த சம்பவத்தில் ஸ்மித் மச்சாருக்கு அறுவை சிகிச்சை மேற்கொள்ளப்பட்டதாகவும் சில தகவல்கள் தெரிவிக்கின்றன. எனினும், அவரது உடல்நிலை குறித்து இந்திய தூதரகம் தற்போது சீராக இருப்பதாக தெரிவித்துள்ளது.

180 பயணிகளையும் காப்பாற்றிய ஹீரோ:

விமானத்தில் இருந்த பயணிகள் மற்றும் ஊழியர்கள் சரியான நேரத்தில் துரிதமாக செயல்பட்டதால் மிகப்பெரிய பேராபத்து தவிர்க்கப்பட்டதாக இஸ்ரேல் பிரதமர் பெஞ்சமின் நெதன்யாகு பாராட்டு தெரிவித்துள்ளார்.

மேலும், பலத்த காயமடைந்த நிலையிலும் சூழ்நிலையை சமாளிக்க கேப்டன் ஸ்மித் மச்சார் எடுத்த நடவடிக்கைகளை நெதன்யாகு பாராட்டியுள்ளார். 180 பயணிகளின் உயிரைக் காப்பாற்ற உதவிய இந்திய விமானி ஸ்மித் மச்சாரை “உண்மையான ஹீரோ” என அவர் பாராட்டியுள்ளார்.

இதனிடையே, விமானத்தை வீழ்த்த முயன்றதாகக் கூறப்படும் துணை விமானியை சவுதி அரேபிய அதிகாரிகள் கைது செய்துள்ளதாக நெதன்யாகு தெரிவித்துள்ளார். இந்த சம்பவத்திற்கான முழுமையான காரணம் மற்றும் பின்னணி குறித்து விசாரணை நடைபெற்று வருகிறது. ஃப்ளைடுபாய் நிறுவனமும் சம்பவத்தை உறுதி செய்துள்ளதுடன், விசாரணை முடிவடையும் முன் ஊகங்களை வெளியிட வேண்டாம் என தெரிவித்துள்ளது.

டிரம்ப் பாராட்டு: 

இந்த சம்பவம் தொடர்பாக அமெரிக்க அதிபர் டொனால்ட் ட்ரம்ப், இஸ்ரேல் பிரதமர் நெதன்யாகுவுடன் பேசியதாகவும், அப்போது இந்திய விமானி ஸ்மித் மச்சாரின் துணிச்சலைப் பாராட்டியதாகவும் தகவல்கள் வெளியாகியுள்ளன. காயமடைந்த நிலையிலும் காக்பிட் கதவைத் திறந்து பயணிகள் மற்றும் ஊழியர்கள் தாக்குதலைத் தடுத்து நிறுத்த வழிவகுத்த விமானியின் செயல்பாடு பாராட்டுக்குரியது என ட்ரம்ப் குறிப்பிட்டுள்ளார்.

தாக்குதல் நடத்தியதாகக் கூறப்படும் நபரின் நோக்கம் குறித்து இதுவரை அதிகாரப்பூர்வமாக முழுமையான தகவல் வெளியாகவில்லை. சம்பவம் தொடர்பான விசாரணை தொடர்ந்து நடைபெற்று வரும் நிலையில், விமானத்தில் இருந்த பயணிகள், ஊழியர்கள் மற்றும் குறிப்பாக காயமடைந்த நிலையிலும் செயல்பட்ட கேப்டன் ஸ்மித் மச்சாரின் நடவடிக்கையால் மிகப்பெரிய விமான விபத்து தவிர்க்கப்பட்டதாக அதிகாரிகள் மற்றும் தலைவர்கள் பாராட்டு தெரிவித்துள்ளனர்.
 

இதையும் படிங்க: ஈரான் போர் விரைவில் முடிவுக்கு வரும்... கச்சா எண்ணெய் விலை அதிரடியாக சரியும் என டிரம்ப் நம்பிக்கை!