தமிழக வெற்றிக் கழகம், நடிகர் விஜய் தலைமையில் 2026 சட்டமன்றத் தேர்தலுக்கு தீவிரமாக தயாராகி வருகிறது. 2024ம் ஆண்டு பிப்ரவரியில் தொடங்கப்பட்ட இக்கட்சி, இளைஞர்கள், பெண்கள் மற்றும் சமூகநீதி ஆதரவாளர்களை மையப்படுத்தி தனது அரசியல் பயணத்தை வலுப்படுத்தி வருகிறது.
தவெகவின் முதல் மாநில மாநாடு கடந்த 2024ம் ஆண்டு அக்டோபரில் விக்ரவாண்டியில் நடைபெற்றபோது, கல்வி, மாநில உரிமைகள், ஊழல் ஒழிப்பு மற்றும் மதச்சார்பின்மையை முன்னிறுத்திய கொள்கைகளை விஜய் அறிவித்தார். வரும் ஆகஸ்ட் 25ம் தேதி அன்று மதுரையில் நடைபெறவுள்ள இரண்டாவது மாநில மாநாடு, தவெகவின் தேர்தல் வியூகங்களை மேலும் தெளிவுபடுத்தும் என எதிர்பார்க்கப்படுகிறது. இந்த மாநாட்டில் கூட்டணி முடிவுகள், தொகுதி வாரியான திட்டங்கள் மற்றும் கட்சியின் தேர்தல் அறிக்கை குறித்து முக்கிய அறிவிப்புகள் வெளியாகலாம்.
இதையும் படிங்க: கோர்ட்டுக்கு போன தவெக கொடி நிறப் பிரச்சனை.. 2 வாரம் கெடு.. பதிலளிக்க விஜய்க்கு பறந்த நோட்டீஸ்..!
தவெக, தமிழகத்தின் 234 தொகுதிகளிலும் போட்டியிடுவதற்கு மாவட்ட அளவில் கட்டமைப்பை வலுப்படுத்தி வருகிறது. மதுரை மாநாடு, விஜய்யின் அரசியல் செல்வாக்கை மேலும் வலுப்படுத்துவதற்கு முக்கியமானதாக கருதப்படுகிறது. இளைஞர்கள் மற்றும் பெண்களை மையப்படுத்தி, கல்வி, சமூகநீதி மற்றும் மாநில உரிமைகளை முன்னிறுத்தி தவெக தனது பயணத்தை தொடர்கிறது.
தவெகவின் இரண்டாவது மாநில மாநாடு வரும் ஆகஸ்ட் 25ம் தேதி அன்று மதுரையில் நடைபெறவுள்ள நிலையில் இந்நிகழ்விற்கு அனுமதி கோரி தவெக சார்பில் மதுரை மாவட்ட காவல்துறையிடம் விண்ணப்பிக்கப்பட்டது. இதற்கு பதிலளித்த மதுரை காவல்துறை, மாநாடு தொடர்பாக 50-க்கும் மேற்பட்ட கேள்விகளை எழுப்பியுள்ளது.
காவல்துறையின் கேள்விகளில், மாநாட்டில் தவெக தலைவர் விஜயைத் தவிர்த்து மற்ற விஐபிக்கள் பங்கேற்பார்களா?, எத்தனை தொண்டர்கள் கலந்துகொள்வார்கள்?, பாதுகாப்பு ஏற்பாடுகள் மற்றும் வாகன நிறுத்த வசதிகள் குறித்த விவரங்கள் என்ன? போன்றவை அடங்கியுள்ளன. மேலும், மாநாட்டின் இடம், நேரம், மற்றும் கூட்ட நெரிசல் மேலாண்மை தொடர்பான விரிவான தகவல்களையும் காவல்துறை கேட்டுள்ளது.
மாநாடு மதுரை-தூத்துக்குடி தேசிய நெடுஞ்சாலையில் பாரப்பத்தியில் 500 ஏக்கர் பரப்பளவில் நடைபெறவுள்ளது. இதில் 237 ஏக்கர் மாநாட்டு திடலுக்கும், 217 ஏக்கர் வாகன நிறுத்தத்திற்கும் ஒதுக்கப்பட்டுள்ளது. இந்தக் கேள்விகள் த.வெ.க.வின் மாநாட்டு ஏற்பாடுகளுக்கு சவாலாக அமைந்துள்ளதாக கட்சி வட்டாரங்கள் தெரிவிக்கின்றன.
மாநாட்டிற்கு லட்சக்கணக்கான தொண்டர்கள் வருவார்கள் என எதிர்பார்க்கப்படுவதால், காவல்துறையின் இந்த விசாரணைகள் பொது ஒழுங்கு மற்றும் பாதுகாப்பு கருதி எழுப்பப்பட்டிருக்கலாம் எனக் கருதப்படுகிறது. இதற்கு தவெக நிர்வாகிகள் உரிய பதில்களை அளித்து அனுமதி பெறுவார்கள் என எதிர்பார்க்கப்படுகிறது. மேலும் இந்த கேள்விகளுக்கு அளிக்கப்படும் பதில்களின் அடிப்படையில் மாநாட்டிற்கு அனுமதி வழங்குவது குறித்து முடிவு செய்யப்படும் என காவல்துறை தரப்பில் தெரிவிக்கப்பட்டுள்ளது.
இதையும் படிங்க: ஆக.25.. இந்த தேதிக்கு பின்னால் உள்ள ரகசியம்.. விஜய் மாநாட்டை நடத்த இதுதான் காரணமா..?