நாட்டின் மிக உயரிய உயர் கல்வி நிறுவனங்களான ஐஐடி, ஐஐஎம், எய்ம்ஸ், மத்தியப் பல்கலைக்கழகங்கள் மற்றும் முன்னணி மருத்துவ, பொறியியல் கல்லூரிகளில் கல்வி பயின்று வரும் இளம் மாணவர்களில் சுமார் 15 சதவீதம் பேர் கடுமையான மன அழுத்தத்திலும், 9 சதவீதம் பேர் விபரீதமான தற்கொலை எண்ணத்துடனும் (Suicidal Ideation) அன்றாடம் போராடி வருவது உச்ச நீதிமன்றத்தால் அமைக்கப்பட்ட சிறப்புக் குழுவின் தீவிரக் கள ஆய்வில் அம்பலமாகி ஒட்டுமொத்த தேசத்தையும் பெரும் அதிர்ச்சியிலும் வேதனையிலும் ஆழ்த்தியுள்ளது.

நாடு முழுவதும் உள்ள முன்னணி உயர்கல்வி நிறுவனங்களில் பயிலும் இளம் மாணவர்கள் அடுத்தடுத்து தற்கொலை செய்துகொள்ளும் துயரச் சம்பவங்கள் அதிகரித்து வந்ததை அடுத்து, மாணவர்களின் தற்கொலைகளைத் தடுத்து நிறுத்துவதற்கும், கல்லூரிகளில் நிலவும் சாதகமற்ற கல்விச் சூழல்களை முழுமையாக ஆராய்ந்து வழிகாட்டுதல்களை வழங்குவதற்கும் உச்ச நீதிமன்றம் ஓர் உயர்நிலைக் குழுவை அமைத்து உத்தரவிட்டிருந்தது.

இக்குழுவானது நாடு தழுவிய அளவில் பல்வேறு முன்னணி மத்திய மற்றும் மாநில உயர்கல்வி நிறுவனங்களில் பயிலும் பல்லாயிரக்கணக்கான மாணவ, மாணவிகளிடம் விரிவான கள ஆய்வுகளையும், ரகசிய வாக்கெடுப்புகளையும், உளவியல் ரீதியான ஆழமான நேர்காணல்களையும் நடத்தித் தனது விரிவான அறிக்கையைத் தயார் செய்துள்ளது.

இதையும் படிங்க: சாலை விதிமீறல்... கறார் காட்டிய சுப்ரீம் கோர்ட்..! மத்திய, மாநில அரசுகளுக்கு முக்கிய உத்தரவு.!!

இவ்வாய்வு அறிக்கையில் இடம்பெற்றுள்ள புள்ளிவிவரங்கள் இந்தியக் கல்வி உலகையே தலைகுனிய வைக்கும் அளவிற்கு மிகக் கடுமையான எச்சரிக்கையை விடுத்துள்ளன. உயர் கல்வி நிறுவனங்களில் படித்து வரும் மாணவர்களில் 15 சதவீதம் பேர் அன்றாட வாழ்க்கையைக் கூட எதிர்கொள்ள முடியாமல் நசுங்கிப் போகும் அளவிற்கு உச்சக்கட்ட மன அழுத்தத்தால் பீடிக்கப்பட்டுள்ளனர் என்பதும், அதில் சுமார் 9 சதவீதத்திற்கும் அதிகமான மாணவர்கள் உயிரை மாய்த்துக் கொள்ளும் தற்கொலை எண்ணத்தின் விளிம்பில் நின்று தவித்து வருகின்றனர் என்பதும் உறுதி செய்யப்பட்டுள்ளது. 

தாங்க முடியாத கல்விச் சுமை, பேராசிரியர்களின் அழுத்தம், சமூக மற்றும் சாதியப் பின்னணியால் ஏற்படும் மறைமுகப் புறக்கணிப்புகள், வேலைவாய்ப்பு குறித்த நிச்சயமற்ற எதிர்காலம் மற்றும் வளாகங்களில் உரிய மனநல ஆலோசனை மையங்கள் இல்லாததே இந்த அபாயகரமான நிலைக்கு முக்கியக் காரணங்களாகச் சுட்டிக்காட்டப்பட்டுள்ளன. எதிர்காலத் தூண்களாகத் திகழ வேண்டிய இளம் தலைமுறையினரின் உயிரைக் காக்க அனைத்துக் கல்வி நிறுவனங்களிலும் உடனடியாக அவசர மனநலக் கட்டமைப்புகளைப் பலப்படுத்த வேண்டும் என உச்ச நீதிமன்றக் குழு பரிந்துரைத்துள்ளது.

இதையும் படிங்க: நீளும் பாலியல் குற்றங்கள்... அரசின் அப்பட்டமான தோல்வி... சுப்ரீம் கோர்ட் காட்டம்..!!