சாலை விதிகளை மீறும் வாகன ஓட்டிகளுக்கு அபராதம் விதிப்பது மட்டும் போதாது; அதை கறாராக வசூலிக்கவும் வேண்டும் என்ற முக்கிய கருத்தை உச்ச நீதிமன்றம் அண்மையில் வலியுறுத்தியுள்ளது. இ-சலான் முறை மூலம் ஆயிரக்கணக்கான அபராதங்கள் விதிக்கப்படுகின்றன. ஆனால் அவற்றில் பெரும்பகுதி நிலுவையில் உள்ளது.

நாடு முழுவதும் மாநிலங்களும் யூனியன் பிரதேசங்களும் சேர்த்து சுமார் நாற்பத்தைந்தாயிரம் கோடி ரூபாய் அளவுக்கு இ-சலான் அபராதங்கள் விதிக்கப்பட்டுள்ளன. அவற்றில் இருபத்தைந்தாயிரம் கோடி ரூபாய் மட்டுமே வசூலிக்கப்பட்டுள்ளது. மீதமுள்ள இருபதாயிரம் கோடி ரூபாய் இன்னும் நிலுவையில் உள்ளது. இந்த நிலையை கண்ட உச்ச நீதிமன்றம், வெறும் சலான் வழங்குவதால் மட்டும் பயனில்லை என்றும், உண்மையான வசூல் நடைமுறையை உறுதிப்படுத்த வேண்டும் என்றும் தெளிவாகக் கூறியுள்ளது.

நீதிபதிகள் ஜே.பி. பர்திவாலா மற்றும் கே.வி. விஸ்வநாதன் அடங்கிய அமர்வு, சாலைப் பாதுகாப்பு தொடர்பான பொதுநல மனு விசாரணையின்போது இந்தக் கருத்துகளை வெளியிட்டது. நீதிபதி பர்திவாலா, போலீசார் ஆயிரக்கணக்கான இ-சலான்களை வழங்கலாம். ஆனால் அதன் மூலம் விதிக்கப்படும் அபராதத்தை வசூலிப்பதே முக்கியப் பிரச்சினை என்று சுட்டிக்காட்டினார்.

இதையும் படிங்க: நீளும் பாலியல் குற்றங்கள்... அரசின் அப்பட்டமான தோல்வி... சுப்ரீம் கோர்ட் காட்டம்..!!

மக்கள் போக்குவரத்து அபராதத்தை செலுத்தவில்லை என்றால், அந்தத் தொகையை அவர்களின் வீட்டு மின்கட்டணத்துடன் சேர்த்துவிடலாம் என்ற யோசனையை அவர் முன்வைத்தார். மின்கட்டணத்தை செலுத்தாவிட்டால் மின் இணைப்பு துண்டிக்கப்படும் என்ற அச்சம் இருப்பதால், மக்கள் கட்டாயமாக அபராதத்தையும் செலுத்திவிடுவார்கள். இந்தியா போன்ற நாட்டில் இதுபோன்ற நடைமுறை சிக்கல்களுக்கு மாற்று வழிகளைக் கண்டுபிடித்துத்தான் ஆக வேண்டும் என்று அவர் வலியுறுத்தினார்.

இதையும் படிங்க: உச்சநீதிமன்ற அலுவல் மொழியாக இந்தி: ஆணையம் அமைக்கக் கோரிய மனுவை தள்ளுபடி செய்தது சுப்ரீம் கோர்ட்!