இந்தியத் தேர்தல் ஆணையத்தின் சிறப்புத் தீவிரத் திருத்தம் என்ற பெயரில் தேர்தல் ஆணையத்தின் பெரும்பான்மை உறுப்பினர்களின் நிலைப்பாட்டுக்கு மாறாகவும், சட்டவிரோதமாகவும் செயல்பட்டு தேர்தல் ஜனநாயகத்தையே அடியோடு சீர்குலைத்துள்ள தலைமைத் தேர்தல் ஆணையர் ஞானேஷ்குமார் உடனடியாகத் தனது பதவியை விட்டு விலக வேண்டும் என்றும், அவர் மீது உரிய சட்டப்பிரிவுகளின் கீழ் வழக்குப் பதிவு செய்து உடனடியாகக் கைது செய்ய வேண்டும் என்றும் விடுதலைச் சிறுத்தைகள் கட்சியின் நிறுவனத் தலைவரும் நாடாளுமன்ற உறுப்பினருமான முனைவர் தொல்.திருமாவளவன் மிகக் கடுமையான அறிக்கையை வெளியிட்டுள்ளார்.

இந்தியத் தேர்தல் ஆணையத்தின் தன்னாட்சி மற்றும் செயல்பாடுகள் குறித்து 'தி இந்தியன் எக்ஸ்பிரஸ்' நாளிதழ் வெளியிட்டுள்ள அதிர்ச்சித் தகவல்களைச் சுட்டிக்காட்டி அறிக்கை வெளியிட்டுள்ள தொல்.திருமாவளவன், தேர்தல் ஆணையத்தில் உள்ள மூன்று ஆணையர்களில் சுக்பீர் சிங் சந்து மற்றும் விவேக் ஜோஷி ஆகிய இரு தேர்தல் ஆணையர்கள், தங்களது அறிவோ அல்லது ஒப்புதலோ இல்லாமலேயே தலைமைத் தேர்தல் ஆணையர் ஞானேஷ்குமார் தலைமையில் தன்னிச்சையாக முக்கிய முடிவுகள் எடுக்கப்பட்டுள்ளதாகக் கூறி, கடந்த 10 மாதங்களில் மட்டும் 14 முறை முறையான ஆட்சேபனைகளைப் பதிவு செய்துள்ளனர் என்கிற செய்தி நாட்டு மக்களைப் பேரதிர்ச்சியில் ஆழ்த்தியுள்ளது. 2023-ஆம் ஆண்டு சட்டத்தின்படி தேர்தல் ஆணையத்தின் செயல்பாடுகள் ஒருமித்த கருத்தின் அடிப்படையில் மட்டுமே மேற்கொள்ளப்பட வேண்டும் என்ற விதியைத் துச்சமாக மதித்து, பெரும்பான்மை உறுப்பினர்களையே ஒதுக்கி வைத்துவிட்டுத் தன்னிச்சையாக இயங்கியுள்ளது அப்பட்டமான சட்டவிரோதச் செயலாகும் என்று சாடியுள்ளார்.

இந்த உள்மோதலின் பின்னணி குறித்து விளக்கிய அவர், சுமார் 13 கோடி வாக்காளர்களின் பெயர்களைப் பாதிக்கும் சிறப்புத் தீவிர வாக்காளர் பட்டியல் திருத்தம் (SIR) நடவடிக்கையே இந்த முறைகேடுகளின் மையப்புள்ளியாக அமைந்துள்ளது. புதிய வாக்காளர்களைப் பதிவு செய்வதற்கான படிவம் 6-ல் அங்கீகாரமற்ற, சட்டவிரோத மாற்றங்கள் செய்யப்பட்டுள்ளதாகவும், கள அளவில் உள்ள வாக்காளர் பதிவு அலுவலர்களின் (ERO) சட்டப்பூர்வ அதிகாரங்களை மீறி மையப்படுத்தப்பட்ட மென்பொருள் மூலமாகத் தகுதியுள்ள வாக்காளர்கள் திட்டமிட்டு நீக்கப்பட்டுள்ளதாகவும் தேர்தல் ஆணையர்களே ஆட்சேபித்துள்ளனர். தேர்தல் முறைகேடுகளைத் தடுப்பதற்காகத் தேர்தல் ஆணையம் பாரம்பரியமாகக் கொண்டிருந்த பரவலாக்கப்பட்ட பாதுகாப்பு அமைப்பையே இவர்கள் தகர்த்துள்ளனர்; உச்ச நீதிமன்ற உத்தரவு இருந்தும் கோவாவில் 97 பேர் வாக்களிக்கும் உரிமையை இழந்துள்ளனர் என்று வேதனையுடன் குறிப்பிட்டார்.

இதையும் படிங்க: தலைமை தேர்தல் ஆணையர் ஞானேஷ்குமார் உடனே ராஜினாமா செய்ய வேண்டும்! ராகுல் காந்தி ஆவேசம்!

மேலும் இதன் சட்டரீதியான பாதிப்புகள் குறித்துப் பேசிய திருமாவளவன், தேர்தல் ஆணையத்தின் பெரும்பான்மை உறுப்பினர்களின் ஒப்புதல் இன்றி எடுக்கப்பட்ட எஸ்.ஐ.ஆர். நடவடிக்கையின் கீழ் 13 கோடி வாக்காளர்களின் பெயர்கள் நீக்கப்பட்டிருப்பது முழுமையான சட்டவிரோதமாகும். இதன் அடிப்படையில் நடத்தப்பட்ட தேர்தல்களும் சட்டவிரோதமானவையே என அரவிந்த் கெஜ்ரிவால், உத்தவ் தாக்கரே, மம்தா பானர்ஜி உள்ளிட்ட தேசியத் தலைவர்கள் முன்வைக்கும் குற்றச்சாட்டில் முழு நியாயம் உள்ளது. எனவே, தலைமைத் தேர்தல் ஆணையர் ஞானேஷ்குமார் தாமாக முன்வந்து உடனடியாகப் பதவி விலக வேண்டும்; இதுவரை மேற்கொள்ளப்பட்ட அனைத்து SIR நடவடிக்கைகளும் உடனடியாக ரத்து செய்யப்பட வேண்டும். மக்களின் வாக்குரிமையைப் பறித்த தலைமைத் தேர்தல் ஆணையர் மீது உரிய சட்ட நடவடிக்கை எடுத்து, அவரைக் கைது செய்து விசாரணைக்கு உட்படுத்த வேண்டும் என வலியுறுத்தியுள்ளார்.

இதையும் படிங்க: தலைமை தேர்தல் ஆணையர் ஞானேஷ்குமார் உடனே ராஜினாமா செய்ய வேண்டும்! ராகுல் காந்தி ஆவேசம்!