பெங்களூரு: இந்தியாவில் அதிக போக்குவரத்து நெரிசல் மிகுந்த நகரமாக பெங்களூரு முதலிடம் பிடித்துள்ளதாக ‘டாம் டாம் போக்குவரத்து குறியீடு’ நிறுவனம் நடத்திய ஆய்வில் தெரியவந்துள்ளது. தகவல் தொழில்நுட்ப நகரமாக உலக அளவில் புகழ்பெற்ற பெங்களூரு, தற்போது கடுமையான போக்குவரத்து நெரிசலுக்காகவும் கவனம் பெற்றுள்ளது.

நெதர்லாந்தை தலைமையிடமாகக் கொண்டு செயல்படும் ‘டாம் டாம்’ நிறுவனம், உலகின் பல்வேறு நகரங்களில் நிலவும் போக்குவரத்து நெரிசல் குறித்து ஆண்டுதோறும் ஆய்வு நடத்தி வருகிறது. அந்த வகையில், இந்திய நகரங்களில் மேற்கொள்ளப்பட்ட ஆய்வின் முடிவுகள் தற்போது வெளியாகியுள்ளன.

அதன்படி, பெங்களூருவில் வாகன ஓட்டிகள் 10 கி.மீ., தூரத்தை கடக்க சராசரியாக 36 நிமிடங்கள் 9 விநாடிகள் எடுத்துக்கொள்வதாக தெரிவிக்கப்பட்டுள்ளது. குறிப்பாக அலுவலகம் மற்றும் பள்ளிகள் செயல்படும் உச்ச நேரங்களில் நகரின் முக்கிய சாலைகள் மற்றும் இணைப்பு சாலைகளில் போக்குவரத்து நெரிசல் அதிகமாக இருப்பதாக ஆய்வு சுட்டிக்காட்டுகிறது.

இதையும் படிங்க: காவிரி நீர் விவகாரம்! உச்சநீதிமன்றத்தை நாடிய தமிழக அரசு! 13ம் தேதி முக்கிய விசாரணை!

நகரில் அதிகரித்து வரும் வாகனங்களின் எண்ணிக்கை, மெதுவாக நகரும் போக்குவரத்து, மெட்ரோ மற்றும் மேம்பாலப் பணிகள், சாலை மேம்பாட்டுப் பணிகள் உள்ளிட்டவை நெரிசலுக்கான முக்கிய காரணங்களாக குறிப்பிடப்பட்டுள்ளன. நெரிசல் அதிகமாக இருக்கும் நேரங்களில் பெங்களூருவின் சாலைகளில் வாகனங்களின் சராசரி வேகம் மணிக்கு 13.9 கி.மீ., அளவுக்கு குறைவதாக ஆய்வில் தெரிவிக்கப்பட்டுள்ளது.

இதன் தாக்கம் பெங்களூருவாசிகளின் அன்றாட வாழ்க்கையிலும் வெளிப்படுகிறது. போக்குவரத்து நெரிசல் காரணமாக வாகன ஓட்டிகள் ஆண்டுக்கு சுமார் 168 மணி நேரத்தை சாலைகளில் கூடுதலாக செலவிடுவதாக ஆய்வு கூறுகிறது. அதாவது, ஒரு ஆண்டில் சுமார் ஏழு நாட்கள் முழுவதும் போக்குவரத்து நெரிசலில் சிக்கி செலவிடும் அளவுக்கு நிலைமை இருப்பதாக கணக்கிடப்பட்டுள்ளது.

இந்திய அளவில் பெங்களூருவுக்கு அடுத்த இடத்தில் புனே உள்ளது. அங்கு 10 கி.மீ., தூரத்தை கடக்க சராசரியாக 33 நிமிடங்கள் ஆகிறது. மும்பையில் இதே தூரத்தை கடக்க சுமார் 29 நிமிடங்கள் ஆகிறது. இதன் மூலம் இந்தியாவின் அதிக நெரிசல் கொண்ட நகரங்களின் பட்டியலில் பெங்களூரு முதலிடத்திலும், புனே இரண்டாவது இடத்திலும், மும்பை மூன்றாவது இடத்திலும் உள்ளதாக ஆய்வு தெரிவித்துள்ளது.

தகவல் தொழில்நுட்ப நிறுவனங்கள் அதிகம் செயல்படும் பெங்களூருவில் மக்கள் தொகை மற்றும் வாகனங்களின் எண்ணிக்கை தொடர்ந்து அதிகரித்து வரும் நிலையில், சாலை உள்கட்டமைப்பு மற்றும் போக்குவரத்து மேலாண்மை தொடர்பான சவால்களும் அதிகரித்து வருகின்றன. இதனால், எதிர்காலத்தில் நகரின் போக்குவரத்து நெரிசலை குறைக்க நீண்டகால தீர்வுகள் தேவைப்படும் நிலை உருவாகியுள்ளது.

இதையும் படிங்க: மேகதாது எதிர்ப்பு: கர்நாடகாவில் ‘முழு அடைப்பு’! தமிழகத்துக்கு வாட்டாள் நாகராஜ் எச்சரிக்கை! எல்லையில் பதற்றம்!