கேரளாவில் தேர்தல் அதிகாரிகள் மத்தியில் பெரும் சர்ச்சையை ஏற்படுத்திய ஒரு சம்பவம், அரசியல் கட்சிகளிடையே பதற்றத்தை ஏற்படுத்தியுள்ளது. உச்சநீதிமன்ற உத்தரவின்படி, குற்ற வழக்குகளில் சிக்கிய வேட்பாளர்கள் தேர்தலில் போட்டியிடுவது தொடர்பான வழிகாட்டு நெறிமுறைகளை தெளிவுபடுத்தும் வகையில், மாநில தலைமை தேர்தல் அதிகாரி அலுவலகம் இந்த மாத தொடக்கத்தில் அனைத்து அரசியல் கட்சிகளுக்கும் ஒரு கடிதம் அனுப்பியது.

இந்த கடிதத்தில், எதிர்பாராத விதமாக பாரதிய ஜனதா கட்சியின் (பாஜக) மாநில அலுவலக முத்திரை பதிந்திருந்தது. இந்த பிழையை முதலில் கவனித்த மார்க்சிஸ்ட் கம்யூனிஸ்ட் கட்சி (சிபிஐஎம்), உடனடியாக கேள்வி எழுப்பியது. தேர்தல் ஆணையத்தின் நடுநிலைத்தன்மை குறித்து சந்தேகம் வலுத்ததால், சிபிஐஎம் சார்பில் புகார் அளிக்கப்பட்டது. புகாரைத் தொடர்ந்து, தேர்தல் அதிகாரிகள் உடனடி நடவடிக்கை எடுத்தனர். பாஜக முத்திரை கொண்ட கடிதத்தை திரும்பப் பெற்று, மாநில தலைமை தேர்தல் அதிகாரியின் ஒப்புதலுடன் புதிய, சரியான கடிதத்தை மார்ச் 21-ஆம் தேதி அனைத்து கட்சிகளுக்கும் அனுப்பினர்.

இருப்பினும், இந்த சம்பவம் பெரும் பரபரப்பை ஏற்படுத்தியது. தேர்தல் ஆணைய அலுவலகத்துக்கு பாஜக முத்திரை எப்படி வந்தது என்பது குறித்து பல்வேறு கேள்விகள் எழுந்தன. இந்த விவகாரத்தை பயன்படுத்தி, சிபிஐஎம் கட்சி தேர்தல் ஆணையத்துக்கும் பாஜகவுக்கும் இடையே ரகசிய தொடர்பு இருப்பதாக குற்றம் சாட்டியது. அதேபோல், மேற்கு வங்காள முதல்வரும் திரிணாமூல் காங்கிரஸ் தலைவருமான மம்தா பானர்ஜி இந்த சம்பவத்தை கடுமையாக விமர்சித்தார்.

இதையும் படிங்க: பெண் வீட்டிற்குள் போதையில் அத்துமீறிய காவலர்... ராயப்பேட்டையில் பரபரப்பு!

“பூனை பையில் இருந்து வெளியே வந்துவிட்டது. தேர்தல் ஆணையம் பாஜகவின் ரப்பர் ஸ்டாம்ப் போல் செயல்படுகிறது” என்று அவர் கூறி, ஜனநாயகத்தை பாதுகாக்க அனைத்து எதிர்க்கட்சிகளும் ஒன்றிணைய வேண்டும் என்று வலியுறுத்தினார். இந்த குற்றச்சாட்டுகளுக்கு பதிலளித்த மாநில தலைமை தேர்தல் அதிகாரி ரத்தன் கேல்கர், இது வெறும் எழுத்து பிழை மற்றும் தொழில்நுட்ப கோளாறு என்று விளக்கம் அளித்தார். 

2019-ஆம் ஆண்டு வழிகாட்டு நெறிமுறைகள் தொடர்பாக பாஜக சமர்ப்பித்த ஆவணத்தின் புகைப்பட நகலில் அந்த முத்திரை இருந்தது. அதை கவனிக்காமல் மற்ற கட்சிகளுக்கு அனுப்பியதே இந்த தவறு என்று அவர் தெரிவித்தார். உடனடியாக இந்த பிழை கண்டறியப்பட்டு திருத்தம் செய்யப்பட்டதாகவும், சம்பந்தப்பட்ட உதவி பிரிவு அதிகாரியை பணியிடை நீக்கம் செய்து விசாரணைக்கு உத்தரவிடப்பட்டுள்ளதாகவும் அவர் அறிவித்தார். 

தேர்தல் ஆணையம் இந்த சம்பவம் தேர்தல் நடைமுறையின் நேர்மையை பாதிக்கவில்லை என்று உறுதி அளித்துள்ளது. இருப்பினும், வரும் கேரள சட்டமன்றத் தேர்தலுக்கு முன்னதாக இந்த சர்ச்சை அரசியல் வட்டாரத்தில் பெரும் பேசுபொருளாக மாறியுள்ளது. எதிர்க்கட்சிகள் தேர்தல் ஆணையத்தின் நடுநிலையை சந்தேகிக்கும் நிலை உருவாகியிருப்பது, ஜனநாயக நிறுவனங்களின் நம்பகத்தன்மை குறித்த விவாதத்தை தூண்டியுள்ளது.
 

இதையும் படிங்க: நெருங்கும் தேர்தல்... கருத்துக் கணிப்புகளுக்கு கட்டுப்பாடு..! தேர்தல் ஆணையம் முக்கிய அறிவிப்பு..!!