அதிக வட்டி தருவதாகக் கூறி முதியவர்கள் மற்றும் ஓய்வூதியர்களிடம் கோடிக்கணக்கில் பணம் திரட்டியதாக எழுந்த நிதி மோசடி புகாரில் கைது செய்யப்பட்ட தொழிலதிபர் பிரேம்குமாருக்கு மேலும் சிக்கல் ஏற்பட்டுள்ளது. சட்டவிரோத பணப்பரிமாற்றம் தொடர்பாக அவர் மீது அமலாக்கத்துறை வழக்குப்பதிவு செய்து விசாரணையைத் தொடங்கியுள்ளது.

கேரள மாநிலம் கோழிக்கோட்டைச் சேர்ந்தவர் பிரேம்குமார். இவர் கடந்த 2006-ஆம் ஆண்டு சென்னையில் பாரத் லஜ்னா மல்டி-ஸ்டேட் (BLM) ஹவுசிங் கோ-ஆபரேட்டிவ் சொசைட்டி என்ற நிறுவனத்தைத் தொடங்கினார். முதியவர்கள் மற்றும் ஓய்வூதியர்களுக்கு அதிக வட்டி வழங்குவதாகக் கூறி, இந்த நிறுவனத்தின் மூலம் பல கோடி ரூபாய் முதலீடாகத் திரட்டினார்.

முதிர்வுத் தொகையைத் திருப்பித் தராமல் ஏமாற்றியதாகப் புகார்!

நிறுவனத்தில் முதலீடு செய்தவர்களின் பணம் முதிர்வடைந்த பின்னரும் உரிய தொகையைத் திருப்பித் தரவில்லை எனப் புகார்கள் எழுந்தன. இதையடுத்து, பிஎல்எம் நிறுவனத்தின் செயல்பாடுகள் குறித்து விசாரணை மேற்கொள்ளப்பட்டது.

இதையும் படிங்க: உங்க லிமிட்ல நடந்துக்கோங்க! பினராயி விஜயன் வழக்கில் அமலாக்கத் துறைக்கு உச்ச நீதிமன்றம் எச்சரிக்கை!

முதலீட்டாளர்களிடம் வசூலித்த கோடிக்கணக்கான ரூபாயை கூட்டுறவு சங்க விதிகளுக்கு மாறாகப் பயன்படுத்தியதாக பிரேம்குமார் மீது குற்றச்சாட்டுகள் எழுந்தன. குறிப்பாக, முதலீட்டுப் பணத்தைத் தனது சொந்த வங்கிக் கணக்குகள், குடும்பத்தினரின் பெயர்களில் உள்ள கணக்குகள் மற்றும் பிற தனியார் தொழில் நிறுவனங்களுக்குத் திசைதிருப்பியதாகப் புலனாய்வு அமைப்புகள் குற்றம்சாட்டியுள்ளன.

சென்னையில் கைது செய்த கேரள போலீசார்!

இந்த நிதி மோசடி தொடர்பாக கேரள மாநில குற்றப்பிரிவின் பொருளாதாரக் குற்றப்பிரிவு அதிகாரிகள் சென்னையில் வைத்து பிரேம்குமாரைக் கடந்த வாரம் கைது செய்தனர். தொடர்ந்து அவரிடம் விசாரணை மேற்கொள்ளப்பட்டு வருகிறது.

அமலாக்கத்துறையும் களத்தில் இறங்கியது!

இந்த வழக்கில் சட்டவிரோத பணப்பரிமாற்றம் நடைபெற்றதாக எழுந்த புகாரின் அடிப்படையில் அமலாக்கத்துறையும் தற்போது தனியாக வழக்குப்பதிவு செய்துள்ளது. முதலீட்டாளர்களிடம் திரட்டப்பட்ட பணம் எவ்வாறு பயன்படுத்தப்பட்டது, எந்தெந்த வங்கிக் கணக்குகள் மற்றும் நிறுவனங்கள் வழியாகப் பரிமாற்றம் செய்யப்பட்டது என்பது குறித்து விசாரணை தொடங்கியுள்ளது.

முதியவர்கள் மற்றும் ஓய்வூதியர்களிடம் அதிக வட்டி தருவதாகக் கூறி பணம் திரட்டியதாக எழுந்த புகாரில் ஏற்கெனவே கைது செய்யப்பட்டுள்ள பிரேம்குமாருக்கு, அமலாக்கத்துறையின் விசாரணையும் கூடுதல் நெருக்கடியை ஏற்படுத்தியுள்ளது.

இதையும் படிங்க: திருப்பதி லட்டு கலப்பட நெய் விவகாரத்தில் அதிரடி! ரூ.129.85 கோடி சொத்துகளை முடக்கியது அமலாக்கத்துறை!