வரும் ஏப்ரல் 10-ம் தேதி முதல் இந்தியாவின் தேசிய நெடுஞ்சாலைகளில் உள்ள சுங்கச்சாவடிகளில் ரொக்கப் பணம் முழுமையாக ஒழிக்கப்படுகிறது. தேசிய நெடுஞ்சாலை ஆணையம் (NHAI) இந்த மாற்றத்தை அமல்படுத்துவதன் மூலம், நாடு முழுவதும் நெடுஞ்சாலைப் பயணம் முழுமையாக டிஜிட்டல் மயமாக மாற்றப்படுகிறது. இந்தப் புதிய விதிமுறை, போக்குவரத்து நெரிசலை குறைத்து, பயணத்தை வேகமாகவும் தடையின்றியும் மாற்றும் நோக்கத்துடன் கொண்டுவரப்பட்டுள்ளது.
நாட்டில் சுமார் 1,200 சுங்கச்சாவடிகள் செயல்பட்டு வருகின்றன. தினசரி பாஸ்டேக் மூலம் சுமார் 1.16 கோடி ரூபாய் வசூலாகிறது. 2025-26 நிதியாண்டில் மொத்த சுங்க வசூல் 82,900 கோடி ரூபாயை எட்டும் என எதிர்பார்க்கப்படுகிறது. ரொக்கப் பரிவர்த்தனையை நீக்குவதன் மூலம், சுங்கச்சாவடிகளில் ஏற்படும் நீண்ட வரிசைகள் முற்றிலும் ஒழிக்கப்படும் என்று அதிகாரிகள் தெரிவித்துள்ளனர்.
மத்திய சாலைப் போக்குவரத்து மற்றும் நெடுஞ்சாலைத் துறை வெளியிட்டுள்ள அறிவிப்பின்படி, ஏப்ரல் 10 முதல் சுங்கச்சாவடி கட்டணங்கள் அனைத்தும் பாஸ்டேக் அல்லது மின்னணு முறைகள் மூலம் மட்டுமே செலுத்த வேண்டும். பாஸ்டேக் வசதி இல்லாத வாகனங்கள் UPI மூலம் கட்டணம் செலுத்தலாம். ஆனால், அந்தச் சந்தர்ப்பத்தில் வழக்கமான கட்டணத்தைவிட 25 சதவீதம் அதிகமாக (1.25 மடங்கு) செலுத்த வேண்டும்.
இதையும் படிங்க: தமிழ்நாட்டில் 68 சுங்கச்சாவடிகளில் உயருகிறது கட்டணம்..!! இன்று நள்ளிரவு முதல் அமல்..!!
பாஸ்டேக் அல்லது UPI மூலம் கட்டணம் செலுத்தாத வாகனங்களை சுங்கச்சாவடிக்குள் அனுமதிக்காது. அத்தகைய வாகனங்களுக்கு மின்னணு அறிவிப்பு அனுப்பப்படும். மூன்று நாட்களுக்குள் குறிப்பிட்ட தொகையை செலுத்தாவிட்டால், சுங்கக் கட்டணத்தைப் போல இரு மடங்கு தொகை செலுத்த வேண்டிய நிலை ஏற்படும். தொடர்ந்து பணம் செலுத்தாதவர்களின் வாகன விவரங்கள் VAHAN தரவுத்தளத்தில் பதிவு செய்யப்படலாம்.அரசு அலுவலக நிமித்தம் பயன்படுத்தப்படும் வாகனங்களுக்கு மட்டுமே சுங்கக் கட்டண விலக்கு அளிக்கப்படும்.
இதற்கு முறையான விண்ணப்பம் அல்லது ஆண்டுப் பாஸ் தேவை. தனிப்பட்ட முறையில் அரசு அதிகாரிகள் மேற்கொள்ளும் பயணங்களுக்கு இந்த விலக்கு பொருந்தாது. முன்பு போல் அடையாள அட்டை காட்டி விலக்கு பெறும் முறை இனி இல்லை. அடிக்கடி நெடுஞ்சாலைப் பயணம் செய்பவர்களுக்கு ஊக்கமளிக்கும் வகையில் FASTag Annual Pass வழங்கப்படுகிறது. இந்தப் பாஸ் ஒரு வருடம் அல்லது 200 சுங்கச்சாவடி கடப்புகள் வரை செல்லுபடியாகும். இதன் மூலம் அடிக்கடி பயணிப்பவர்களுக்கு கட்டணச் சுமை குறையும் மற்றும் பயணம் மிகவும் சுலபமாகும்.
இந்த ஆண்டுப் பாஸுக்கு விண்ணப்பிக்க Rajmarg Yatra செயலி, NHAI அல்லது MoRTH-இன் அதிகாரப்பூர்வ இணையதளங்களைப் பயன்படுத்தலாம். பயனர்கள் தங்கள் FASTag-உடன் இணைக்கப்பட்ட கணக்கில் உள்நுழைந்து, வாகனப் பதிவு எண் மற்றும் பதிவு செய்யப்பட்ட மொபைல் எண்ணை உள்ளிட வேண்டும். பின்னர் UPI, டெபிட்/கிரெடிட் கார்டு அல்லது நெட் பேங்கிங் மூலம் கட்டணம் செலுத்தினால், பாஸ் தானாக FASTag-உடன் இணைக்கப்பட்டு 24 மணி நேரத்துக்குள் செயல்படத் தொடங்கும்.
இந்தப் புதிய விதிமுறைகள், நெடுஞ்சாலைப் பயணத்தை முழுமையாக டிஜிட்டல் மயமாக்கி, நேரத்தை மிச்சப்படுத்தும். அதேசமயம், விதிகளை மீறுபவர்களுக்கு கடுமையான அபராதங்கள் விதிக்கப்படும். எனவே, அனைத்து வாகன ஓட்டிகளும் முன்கூட்டியே FASTag பெற்று அல்லது Annual Pass வாங்கி தயாராக இருக்க வேண்டும். இந்த மாற்றம், இந்தியாவின் உள்கட்டமைப்பு வளர்ச்சியில் ஒரு முக்கிய அடியாகக் கருதப்படுகிறது.
இதையும் படிங்க: சுங்கச்சாவடிகளில் இனி NO CASH.. டிஜிட்டல் பேமெண்ட் மட்டும்தான்..!! நாளை முதல் அமல்..!!