சர்வதேச கச்சா எண்ணெய் மற்றும் பெட்ரோலியப் பொருட்களின் விலையில் ஏற்படும் ஏற்ற இறக்கங்களை கருத்தில் கொண்டு, பெட்ரோல் மற்றும் டீசல் ஏற்றுமதி மீதான வரிகளை மத்திய அரசு மீண்டும் மாற்றியமைத்துள்ளது.

 மத்திய நிதி அமைச்சகம் வெளியிட்டுள்ள அறிவிப்பின்படி, பெட்ரோல் ஏற்றுமதி மீதான சிறப்பு கூடுதல் கலால் வரி (SAED) லிட்டருக்கு ரூ.0.50-லிருந்து ரூ.2.50 ஆக ஐந்து மடங்கு உயர்த்தப்பட்டுள்ளது. அதேநேரம், டீசல் ஏற்றுமதி மீதான வரி ரூ.16-லிருந்து ரூ.8.50 ஆக கணிசமாகக் குறைக்கப்பட்டுள்ளது. இந்த மாற்றங்கள் இன்று (வெள்ளிக்கிழமை) முதல் அமலுக்கு வந்துள்ளன.

விமான எரிபொருள் (ATF) ஏற்றுமதி மீதான வரி ரூ.10.50 ஆகவே தொடர்கிறது. உள்நாட்டு நுகர்வுக்காக விற்பனை செய்யப்படும் பெட்ரோல் மற்றும் டீசல் மீதான தற்போதைய கலால் வரி விகிதங்களிலோ, பம்புகளில் விற்கப்படும் சில்லறை விலைகளிலோ எந்த மாற்றமும் இல்லை என அமைச்சகம் தெளிவுபடுத்தியுள்ளது.

இதையும் படிங்க: நவ.1 முதல்.. இனி ஃபோன் செய்பவர்களின் பெயர் ஸ்க்ரீனில்.. போலி அழைப்புகளுக்கு செக் வைத்த மத்திய அரசு..!!

மேற்கு ஆசியாவில் (குறிப்பாக அமெரிக்கா-இஸ்ரேல்-ஈரான் தொடர்பான) பதட்டங்கள் மற்றும் உக்ரைன் போர் போன்ற புவிசார் அரசியல் நிகழ்வுகளால் சர்வதேச சந்தையில் கச்சா எண்ணெய் விலைகளில் ஏற்படும் மாற்றங்களை எதிர்கொள்ள, அரசு ஒவ்வொரு 15 நாட்களுக்கும் ஏற்றுமதி வரிகளை மறுஆய்வு செய்கிறது. 

இந்த வரி அமைப்பு, ஏற்றுமதியாளர்கள் அதிக லாபம் ஈட்டும் வகையில் உள்நாட்டு விநியோகத்தை பாதிக்காமல் இருக்கவும், உள்நாட்டு எரிபொருள் பாதுகாப்பை உறுதி செய்யவும் கொண்டுவரப்பட்டது. 2022-ல் முதன்முதலில் அறிமுகப்படுத்தப்பட்ட இந்த வின்ட்ஃபால் வரி பின்னர் நீக்கப்பட்டது. 2026 மார்ச்சில் மேற்கு ஆசிய நெருக்கடியின் போது மீண்டும் கொண்டுவரப்பட்டது.

கடந்த செப்டம்பரில் பெட்ரோல் ஏற்றுமதி வரி ரூ.0.50 ஆகக் குறைக்கப்பட்டது. ஆகஸ்டில் டீசல் வரி ரூ.25.50 வரை உயர்த்தப்பட்ட பிறகு, படிப்படியாக ரூ.19, ரூ.16 என குறைக்கப்பட்டு, தற்போது ரூ.8.50 ஆக நிர்ணயிக்கப்பட்டுள்ளது. அக்டோபர் 1 முதல் நடைமுறையில் இருந்த திருத்தத்தில் டீசல் வரி ரூ.20-லிருந்து ரூ.16 ஆகக் குறைக்கப்பட்டிருந்தது.

இந்த தொடர்ச்சியான மறுஆய்வுகள், சர்வதேச விலை ஏற்ற இறக்கங்களுக்கு ஏற்ப உள்நாட்டு சந்தையில் விநியோகத்தை சமநிலைப்படுத்த உதவுகின்றன. ஏற்றுமதி வரி உயர்வு பெட்ரோல் ஏற்றுமதியை ஊக்கப்படுத்தாமல், டீசல் ஏற்றுமதிக்கு சற்று தளர்வு அளிப்பதன் மூலம், உள்நாட்டு தேவையை முன்னுரிமைப்படுத்துவதே அரசின் நோக்கமாக உள்ளது. அடுத்த 15 நாட்களுக்கு இந்த விகிதங்கள் அமலில் இருக்கும்.

இதையும் படிங்க: மாற்றுத்திறனாளிகளுக்கு குட் நியூஸ்! 5 வருடம் செல்லுபடியாகும் FASTag - மத்திய அரசு புதிய அறிவிப்பு!!