இந்தியத் தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும், தேர்தல் ஆணையத்தின் செயல்பாடுகளில் அடிப்படைச் சீர்திருத்தங்கள் கொண்டுவரப்பட வேண்டும் என்றும் வலியுறுத்தி, கரப்பான்பூச்சி ஜனதா கட்சி அக்டோபர் 10 ஆம் தேதி டெல்லியில் போராட்டம் நடத்த இருப்பதாக அறிவித்துள்ளது. 

இந்தப் போராட்டம் தொடர்பாகக் கட்சியின் இணை ஒருங்கிணைப்பாளர் சௌரவ் தாஸ், டெல்லி காவல்துறைக்கு முறைப்படியான அறிவிப்பைச் சமர்ப்பித்துள்ளார். ஜந்தர் மந்தர் பகுதியில் நடைபெறவிருக்கும் இந்தப் போராட்டம் பெரிய அளவில் அமையும் என்று எச்சரித்துள்ள சௌரவ் தாஸ், காவல்துறை போதுமான ஏற்பாடுகளைச் செய்து கொள்ள வேண்டும் எனக் கேட்டுள்ளார்.

இதுகுறித்து செய்தியாளர்களிடம் பேசிய அவர், “நாங்கள் முறையான அறிவிப்பைச் சமர்ப்பித்துவிட்டோம். காவல்துறையிடமிருந்து ஒப்புதல் நகலையும் பெற்றுள்ளோம். தேவையான உறுதிமொழிகளையும் நடைமுறைகளையும் முடித்துவிட்டோம். அவர்கள் ஒத்துழைப்பார்கள் என்று நம்புகிறோம்” என்றார். இந்த இயக்கத்தில் மாணவர் அமைப்புகள், இந்தியா கூட்டணி உள்ளிட்ட பல்வேறு தரப்பினர் இணைவார்கள் என அவர் தெரிவித்தார். 

இதையும் படிங்க: ஜந்தர் மந்தரில் வெடித்த போராட்டம்..!! டெல்லி Ex. முதல்வர் அதிஷி உட்பட 700+ பேர் அதிரடி கைது!!

“நாங்கள் அனைவரும் ஒரே பக்கம். எதிர்ப்பக்கம் தேர்தல் ஆணையமும் பாஜகவும் மட்டுமே. கடந்த முறை ஒற்றுமையுடன் போராடியபோது அமைச்சர் பதவி விலக நேர்ந்தது. அதே ஒற்றுமையை இப்போதும் காட்டுவோம்” என்று அவர் நினைவூட்டினார். முன்னதாகத் தேர்வு வினாத்தாள் கசிவு போராட்டத்தில் இதே அமைப்பு முக்கியப் பங்காற்றியது குறிப்பிடத்தக்கது.

கட்சி முன்வைத்துள்ள மூன்று முக்கியக் கோரிக்கைகள்:

• ஞானேஷ் குமார் உடனடியாகப் பதவி விலக வேண்டும். அவர் மீது குற்றவியல் வழக்கு பதிவு செய்யப்பட்டு நடவடிக்கை எடுக்கப்பட வேண்டும். 
• வரவிருக்கும் அனைத்துத் தேர்தல்களையும் நிறுத்தி வைக்க வேண்டும். திருத்தப்பட்ட வாக்காளர் பட்டியல்களை இடைநிறுத்தி, 2025 ஆம் ஆண்டு வாக்காளர் பட்டியலுக்குத் திரும்ப வேண்டும். சிறப்பு தீவிர மறுஆய்வு (SIR) நடைமுறைகள் குறித்து சுதந்திரமான விசாரணை ஆணையம் அமைக்கப்பட வேண்டும்.
• தேர்தல் ஆணையர்களை நியமிப்பது தொடர்பான 2023 ஆம் ஆண்டுச் சட்டத்தை ரத்து செய்து, பொதுமக்களின் நம்பிக்கையைப் பெறக்கூடிய புதிய சட்டம் இயற்றப்பட வேண்டும்.

இந்தக் கோரிக்கைகள் நிறைவேற்றப்பட்டால் போராட்டம் கைவிடப்படும் எனக் கட்சி தெரிவித்துள்ளது. வாக்காளர் பட்டியல் திருத்தம் மற்றும் தேர்தல் ஆணையத்தின் சுதந்திரம் தொடர்பான சர்ச்சைகள் நாடு முழுவதும் விவாதத்தை எழுப்பியுள்ள நிலையில், இந்தப் போராட்டம் மேலும் கவனத்தை ஈர்க்கும் என எதிர்பார்க்கப்படுகிறது.
 

இதையும் படிங்க: மின்கோபுரத்தில் ஏறிய 8 விவசாயிகள்! ஓட்டப்பிடாரம் அருகே உச்சகட்ட போராட்டம்..! பரபரப்பு.!!