டாஸ்மாக் மதுபானக் கடைகளில் மது அருந்திவிட்டு வருபவர்களால் அந்தந்தப் பகுதி மக்களுக்கு ஏற்படும் கடுமையான இடையூறுகள், சட்டம்-ஒழுங்கு பிரச்சினைகள் மற்றும் அச்சுறுத்தல்களைத் தடுப்பதற்கு என்னென்ன பாதுகாப்பு நடவடிக்கைகள் எடுக்கப்பட்டுள்ளன என்பது குறித்து விரிவான அறிக்கை தாக்கல் செய்ய வேண்டும் என்று தமிழக அரசுக்குச் சென்னை உயர் நீதிமன்றம் அதிரடியாக உத்தரவிட்டுள்ளது.

சென்னை பெரம்பூர் பகுதியைச் சேர்ந்த சுரேஷ் என்பவர் சென்னை உயர் நீதிமன்றத்தில் பொதுநல மனு ஒன்றைத் தாக்கல் செய்திருந்தார். அந்த மனுவில், பெரம்பூரில் எனது வீட்டின் மிக அருகிலேயே டாஸ்மாக் மதுபானக் கடை அமைந்துள்ளது. இந்தக் கடையில் மது அருந்துபவர்கள் சாலைகளிலும் வீட்டின் வாசலிலும் விழுந்து கிடப்பதுடன், ஆபாசமாகப் பேசுவது மற்றும் அப்பகுதியில் வசிக்கும் பொதுமக்கள், பெண்கள், குழந்தைகளுக்கு மிகுந்த தொல்லை மற்றும் இடையூறுகளை ஏற்படுத்துகின்றனர். 

மது விற்பனை செய்வது மட்டுமே டாஸ்மாக் நிறுவனத்தின் பிரதான வேலை கிடையாது; மதுக்கடைகளுக்கு அருகில் வசிக்கும் அப்பாவி மக்களின் நிம்மதியையும் பாதுகாப்பையும் உறுதி செய்வதும் டாஸ்மாக் நிர்வாகம் மற்றும் காவல்துறையின் தலையாய பணியாகும். எனவே, குடியிருப்புப் பகுதிகளில் பொதுமக்களுக்கு இடையூறாக இருக்கும் இந்தக் கடையை உடனடியாக அகற்ற வேண்டும் அல்லது உரிய பாதுகாப்பு வழிகாட்டுதல்களை அமல்படுத்த வேண்டும் என்று வலியுறுத்தியிருந்தார்.

இதையும் படிங்க: விசாரணையின்றி டாஸ்மாக் ஊழியர்களை பணிநீக்கம் செய்ய கூடாது! சென்னை உயர்நீதிமன்றம் அதிரடி உத்தரவு!

இந்த மனு உயர் நீதிமன்ற நீதிபதி என். செந்தில்குமார் முன்பு இன்று விசாரணைக்கு வந்தது. அப்போது மனுதாரர் தரப்பு வாதங்களைக் கேட்டறிந்த நீதிபதி, டாஸ்மாக் கடைகளால் பொதுமக்களுக்கு ஏற்படும் பாதிப்புகள் குறித்துக் கடுமையான கேள்விகளை எழுப்பினார்.

அப்போது உத்தரவிட்ட நீதிபதி, டாஸ்மாக் கடைகளில் மது அருந்திவிட்டு வெளியே வருபவர்களால் அப்பகுதி வாழ் மக்களுக்கு ஏற்படும் சட்டம்-ஒழுங்கு சீர்குலைவுகள் மற்றும் இடையூறுகளைத் தடுப்பதற்குத் தமிழ்நாடு அரசும் டாஸ்மாக் நிர்வாகமும் எடுத்துள்ள பாதுகாப்பு நடவடிக்கைகள் என்னென்ன என்பது குறித்து முழுமையான விரிவான அறிக்கை தாக்கல் செய்ய வேண்டும் என்று உத்தரவிட்டார்.

மேலும், சென்னை வடக்கு கூடுதல் காவல் ஆணையர் எல்லைக்குட்பட்ட பகுதிகளில் கடுமையான உத்தரவுகளைப் பிறப்பித்த நீதிபதி, சென்னை வடக்கு காவல் மாவட்டத்தில் மது அருந்திவிட்டு வாகனம் ஓட்டியதாக இதுவரை எத்தனை வழக்குகள் பதிவு செய்யப்பட்டுள்ளன? அவர்களிடமிருந்து எவ்வளவு அபராதத் தொகை வசூலிக்கப்பட்டுள்ளது? எந்தெந்த டாஸ்மாக் கடைகளின் அருகில் அதிக விதிமீறல்கள் நடக்கின்றன? அந்தந்த மதுபானக் கடைகளின் எண்கள் மற்றும் அமைவிடம் என்ன? என்பது குறித்து சென்னை வடக்கு காவல் துணை ஆணையர் விரிவான பதில் மனுவைத் தாக்கல் செய்ய வேண்டும் என உத்தரவிட்டு, வழக்கின் அடுத்தகட்ட விசாரணையை மூன்று வாரங்களுக்கு ஒத்திவைத்தார்.

இதையும் படிங்க: இடைத்தேர்தல் எதிரொலி!! 3 நாட்களுக்கு டாஸ்மாக் மூடல்! செங்கல்பட்டு, திருப்பூர் மாவட்டங்களில் அதிரடி உத்தரவு!