குடியரசு துணைத் தலைவராக இருந்த ஜகதீப் தன்கர், உடல்நலக் காரணங்களைக் காட்டி தனது பதவியை ராஜினாமா செய்திருந்தார். இதனைத் தொடர்ந்து, செப்டம்பர் 9 அன்று நடைபெறவுள்ள குடியரசு துணைத் தலைவர் தேர்தலுக்கு சி.பி. ராதாகிருஷ்ணனை பாஜக தலைமையிலான என்டிஏ கூட்டணி தனது வேட்பாளராக அறிவித்துள்ளது. சி.பி. ராதாகிருஷ்ணன் 1957 ஆம் ஆண்டு அக்டோபர் 20 அன்று தமிழ்நாட்டின் திருப்பூர் மாவட்டத்தில் பிறந்தவர். இவரது அரசியல் பயணம் மிக நீண்டதும், பல்வேறு பொறுப்புகளை உள்ளடக்கியது.

16 வயதிலேயே அரசியலில் ஈடுபடத் தொடங்கிய இவர், ராஷ்ட்ரிய ஸ்வயம்சேவக் சங்கம் (ஆர்.எஸ்.எஸ்) மற்றும் ஜன சங்கத்தில் தனது அரசியல் பயணத்தைத் தொடங்கினார். அவசரநிலைக் காலத்தில் மாணவர்களைத் திரட்டி போராட்டங்களை நடத்தியவர் என்ற பெருமையைப் பெற்றவர். முதலில் ஜனதா கட்சியில் பணியாற்றிய இவர், பின்னர் பாஜகவில் இணைந்து பல முக்கிய பொறுப்புகளை வகித்தார். 1998 மற்றும் 1999 ஆம் ஆண்டு மக்களவைத் தேர்தல்களில் கோவை தொகுதியில் பாஜக சார்பில் போட்டியிட்டு வெற்றி பெற்று எம்.பி.யாக பதவி வகித்தார். 

 2014 ஆம் ஆண்டு தேர்தலில், திமுக மற்றும் அதிமுகவின் ஆதரவின்றி தனித்து போட்டியிட்டு 3.8 லட்சத்திற்கும் மேற்பட்ட வாக்குகளைப் பெற்று, தனது தனிப்பட்ட செல்வாக்கை நிரூபித்தார். சி.பி. ராதா கிருஷ்ணன் 1990 முதல் 1995 மற்றும் 2001 முதல் 2006 வரை தமிழ்நாடு பாஜக மாநிலத் தலைவராகப் பணியாற்றினார். 2023 ஆம் ஆண்டு பிப்ரவரியில் ஜார்க்கண்ட் மாநில ஆளுநராக நியமிக்கப்பட்டார். பின்னர், தமிழிசை சவுந்தரராஜன் மக்களவைத் தேர்தலில் போட்டியிடுவதற்காக தனது பதவியை ராஜினாமா செய்தபோது, தெலங்கானா ஆளுநர் மற்றும் புதுச்சேரி துணைநிலை ஆளுநர் பொறுப்புகளையும் கூடுதலாக ஏற்றார். பின்னர், மகாராஷ்டிர ஆளுநராக மாற்றப்பட்டார். தற்போது குடியரசு துணைத் தலைவர் பதவிக்கு பாஜக தலைமையிலான என்டிஏ கூட்டணியின் வேட்பாளராக சி.பி. ராதாகிருஷ்ணன் அறிவிக்கப்பட்டார். 

இதையும் படிங்க: இந்தியா கூட்டணி வேட்பாளர் மயில்சாமி அண்ணாதுரை? தமிழருக்கு போட்டி தமிழரா! நயினார் கேள்வி..!

இந்த நிலையில், என் டி ஏ கூட்டணியின் குடியரசு துணைத்தலைவர் வேட்பாளரான சிபி ராதாகிருஷ்ணன் என்ற வேட்புமன தாக்கல் செய்துள்ளார். சிபி ராதாகிருஷ்ணனை வேட்பாளராக முன்மொழிந்து வேட்பு மனுவை தாக்கல் செய்தார் பிரதமர் மோடி. இந்த நிகழ்வின்போது, உள்துறை அமைச்சர் அமித் ஷா, பாதுகாப்பு துறை அமைச்சர் ராஜ்நாத் சிங், மதிய இணை அமைச்சர் எல். முருகன், அதிமுக எம்பி தம்பிதுரை உள்ளிட்டோரும் உடன் இருந்தனர்.

இதையும் படிங்க: பாஜக வேட்பாளருக்கு ஆதரவு தாங்க! எதிர்க்கட்சிகளுக்கு பிரதமர் மோடி வேண்டுகோள்..!