நடிகர் தனுஷின் நற்பணி மன்றம் சார்பில் தமிழகத்தின் 234 சட்டப்பேரவைத் தொகுதிகளிலும் ஏசி வசதியுடன் கூடிய இலவச டியூஷன் மையங்களைத் தொடங்க திட்டமிடப்பட்டுள்ளதாகத் தகவல்கள் வெளியாகியுள்ளன.
இந்தத் திட்டம் 10ஆம் வகுப்பு மற்றும் 12ஆம் வகுப்பு பொதுத்தேர்வு எழுதும் மாணவர்களுக்கு முதன்மையாக அமைக்கப்படவுள்ளது. ஒவ்வொரு மையத்திலும் மூன்று ஆசிரியர்கள் மற்றும் ஒரு உதவியாளர் நியமிக்கப்பட்டு, அவர்களுக்கான ஊதியம், மைய வாடகை மற்றும் மின்சாரம் உள்ளிட்ட செலவுகளை நற்பணி இயக்கமே ஏற்கும் எனக் கூறப்படுகிறது.
முதற்கட்டமாக மாவட்டத் தலைநகரங்களில் இந்த மையங்கள் தொடங்கப்பட்டு, பின்னர் 234 தொகுதிகளுக்கும் விரிவுபடுத்தப்படும். ஒருங்கிணைப்புப் பணிகள் வரும் ஜனவரி மாதம் முதல் தொடங்க உள்ளதாகத் தகவல்கள் தெரிவிக்கின்றன.
இதையும் படிங்க: தனுஷின் அரசியல் வருகைக்குப் பின்னால் பாஜக? எடப்பாடி கட்டுப்பாட்டில் இல்லாத அதிமுக! மாணிக்கம் தாகூர் பரபரப்பு பேட்டி!!
தனுஷின் ரசிகர் மன்றம் நற்பணி இயக்கமாக மாற்றப்பட்டதைத் தொடர்ந்து இதுபோன்ற கல்வி சார்ந்த முன்னெடுப்புகள் குறித்த செய்திகள் வெளியாகி வருகின்றன. இதற்கு முன்னர் விஜய் தலைமையிலான தமிழக வெற்றிக் கழகம் சார்பில் “விஜய் விலையில்லா பயிலகம்” என்ற பெயரில் இலவச மாலை நேர டியூஷன் மையங்கள் அறிவிக்கப்பட்டன.
தனுஷ் அரசியலில் களமிறங்க உள்ளதாகத் தொடர்ந்து பேசப்பட்டு வரும் நிலையில், “தமிழக எழுச்சிக் கழகம்” என்ற பெயரில் கட்சி தொடங்க உள்ளதாகவும் 2031 சட்டப்பேரவைத் தேர்தலை இலக்காகக் கொண்டுள்ளதாகவும் சில தகவல்கள் வெளியாகின.
இருப்பினும் நற்பணி மன்றத் தலைவர் உள்ளிட்டோர் இதுபோன்ற கட்சிப் பதிவு குறித்த செய்திகளை மறுத்துள்ளனர். தனுஷ் தரப்பிலிருந்து அதிகாரப்பூர்வ அறிவிப்பு எதுவும் வெளியாகவில்லை.
இதையும் படிங்க: தனுஷின் பின்னால் பாஜக இருந்தால் என்ன தவறு? அதிமுக பொருளாளர் திண்டுக்கல் சீனிவாசன் பேட்டி!