ஐக்கிய அரபு எமிரேட்சின் துபாயில் இருந்து இஸ்ரேலின் டெல் அவிவ் நகருக்கு சென்ற பிளைதுபாய் விமானத்தில் நடந்த கத்திக்குத்து சம்பவத்தில் தங்களுக்கு எந்த தொடர்பும் இல்லை என ஈரான் திட்டவட்டமாக மறுத்துள்ளது. தங்களை தொடர்புபடுத்தி வெளியாகும் தகவல்கள் ஆதாரமற்றவை என்றும் ஈரான் தெரிவித்துள்ளது.

சமீபத்தில் 180 பயணிகளுடன் துபாயில் இருந்து டெல் அவிவ் நோக்கி பிளைதுபாய் விமானம் புறப்பட்டது. விமானம் தொடர்பான பணியில் இருந்தபோது, துணை விமானி ஒருவர் முதன்மை விமானியான இந்தியாவைச் சேர்ந்த ஸ்மித் மச்சாரை கத்தியால் தாக்கியதாக கூறப்படுகிறது. ஆபத்தான சூழ்நிலையிலும் பயணிகளின் பாதுகாப்பை கருத்தில் கொண்டு ஸ்மித் மச்சார் செயல்பட்டதாக தகவல்கள் வெளியாகின.

இந்த சம்பவத்தின் பின்னணியில் ஈரானுக்கு தொடர்பு இருக்கலாம் என அமெரிக்காவும் இஸ்ரேலும் சந்தேகம் தெரிவித்திருந்தன. இதுகுறித்து அமெரிக்க அதிபர் டொனால்டு டிரம்பும் கருத்து தெரிவித்திருந்தார்.

இதையும் படிங்க: துணை விமானியின் பயங்கர சதிச்செயல்! தப்பித்தது எப்படி? விமானத்தில் நடந்த தாக்குதலை விவரித்த ஸ்மித் மச்சார்!

“எனக்கு கிடைத்த தகவல்களின்படி, இந்த சம்பவத்தில் ஈரானுக்கு தொடர்பு இருக்க வாய்ப்புள்ளது. விசாரணையில் ஈரானின் தொடர்பு உறுதி செய்யப்பட்டால், அந்நாடு கடுமையான விளைவுகளை சந்திக்க வேண்டியிருக்கும்” என்று டிரம்ப் கூறியிருந்தார்.

இந்த சூழலில், ஈரான் தனது நிலைப்பாட்டை தற்போது வெளிப்படையாக தெரிவித்துள்ளது. அந்நாட்டு வெளியுறவு அமைச்சக செய்தித் தொடர்பாளர் இஸ்மாயில் பாகாயி, பிளைதுபாய் சம்பவத்துடன் ஈரானை தொடர்புபடுத்தும் செய்திகள் ஆதாரமற்றவை என்றும், புனையப்பட்ட தகவல்களின் அடிப்படையிலேயே குற்றச்சாட்டுகள் முன்வைக்கப்படுவதாகவும் தெரிவித்துள்ளார்.

மேலும், காசா பகுதியில் நடைபெறும் சம்பவங்களில் இருந்து சர்வதேச கவனத்தை திசைதிருப்ப இஸ்ரேலும் அதன் ஐரோப்பிய கூட்டாளிகளும் முயற்சிப்பதாக ஈரான் குற்றம்சாட்டியுள்ளது. இதுபோன்ற குற்றச்சாட்டுகள் இஸ்ரேல் பயன்படுத்தும் பழைய உத்தி என்றும் பாகாயி கூறியுள்ளார்.

அதே நேரத்தில், இந்த சம்பவத்தின் உண்மையான பின்னணி என்ன, இதில் வெளிப்புற தலையீடு இருந்ததா என்பது விசாரணையின் முடிவிலேயே தெளிவாகும். ஈரான் மீதான சந்தேகத்தை அமெரிக்கா மற்றும் இஸ்ரேல் முன்வைத்துள்ள நிலையில், ஈரான் அதனை முழுமையாக மறுத்திருப்பது சர்வதேச அளவில் பரபரப்பை ஏற்படுத்தியுள்ளது.

இதையும் படிங்க: இஸ்ரேல் சுதந்திர தின விழாவுக்கு மோடியுடன் நீங்களும் வர வேண்டும்! இந்திய விமானி ஸ்மித்துக்கு நெதன்யாகு அழைப்பு!