பெட்ரோல் மற்றும் டீசல் விலை விரைவில் உயரும் என சில ஊடகங்கள் மற்றும் சமூக ஊடகங்களில் வெளியான செய்திகள் பொய்யானவை என்று மத்திய பெட்ரோலியம் மற்றும் இயற்கை எரிவாயு அமைச்சகம் தெளிவுபடுத்தியுள்ளது. அரசின் பரிசீலனையில் இத்தகைய எந்த முன்மொழிவும் இல்லை என அமைச்சகம் வலியுறுத்தியுள்ளது.

அமைச்சகம் வெளியிட்ட அதிகாரப்பூர்வ விளக்கத்தில், “பெட்ரோல், டீசல் விலை உயர்வு குறித்து சில செய்திகள் வெளியாகியுள்ளன. அரசு இத்தகைய எந்த திட்டத்தையும் பரிசீலிக்கவில்லை” என தெரிவிக்கப்பட்டுள்ளது. மேலும், இவ்வாறான செய்திகள் குடிமக்களிடையே பயம் மற்றும் அச்சத்தை ஏற்படுத்துவதற்காகவே உருவாக்கப்பட்டவை என்றும், அவை தவறாக வழிநடத்தும் வகையில் உள்ளன என்றும் குறிப்பிடப்பட்டுள்ளது. 

இத்தகைய தவறான தகவல்கள் மக்களுக்கு சங்கடத்தை உண்டாக்குகின்றன என அமைச்சகம் எச்சரித்துள்ளது. கடந்த நான்கு ஆண்டுகளாக இந்தியா, பெட்ரோல் மற்றும் டீசல் விலையை உயர்த்தாத ஒரே நாடாக திகழ்கிறது. சர்வதேச அளவில் கச்சா எண்ணெய் விலை கடுமையாக உயர்ந்தாலும், மத்திய அரசும் பொது துறை எண்ணெய் நிறுவனங்களும் இந்திய மக்களை பாதுகாக்க தொடர்ந்து நடவடிக்கை எடுத்து வருகின்றன.

இதையும் படிங்க: அதிர்ச்சி..!! பெட்ரோல், டீசல் விலை உயர்வு..! தலையில் இடியை இறக்கிய ஷெல் நிறுவனம்..!!

உலக சந்தையில் ஏற்படும் திடீர் விலை உயர்வுகளிலிருந்து நுகர்வோரை காக்கும் வகையில், அரசு தயக்கமின்றி தலையீடு செய்து வருவதாக அதிகாரிகள் தெரிவித்துள்ளனர். மேற்காசியப் பகுதியில் நிலவும் பதற்ற சூழல் காரணமாக சர்வதேச கச்சா எண்ணெய் விலை கணிசமாக அதிகரித்துள்ளது. 

மத்திய பெட்ரோலியம் மற்றும் இயற்கை எரிவாயு அமைச்சகத்தின் இணை செயலாளர் சுஜாதா சர்மா சமீபத்தில் செய்தியாளர்களிடம் பேசுகையில், “ஜனவரி மாதத்தில் இந்திய கச்சா எண்ணெய் கூடை ஒரு பீப்பாய் 63 அமெரிக்க டாலராக இருந்தது. மார்ச் மாதத்தில் இது 113 டாலராக உயர்ந்தது. ஏப்ரல் மாதத்தில் சராசரியாக 116 டாலராக உள்ளது” எனக் கூறினார்.

இந்த உலகளாவிய விலை உயர்வு இருந்தபோதிலும், அண்டை நாடுகளுடன் ஒப்பிடுகையில் இந்தியாவில் எரிபொருள் விலைகள் தொடர்ந்து குறைந்த அளவிலேயே பராமரிக்கப்படுகின்றன என்று அவர் சுட்டிக்காட்டினார். பெட்ரோல் மற்றும் டீசல் போதுமான அளவு கையிருப்பில் உள்ளதாகவும், விநியோகத்தில் எந்த பிரச்சினையும் இல்லை என்றும் அமைச்சகம் உறுதிப்படுத்தியுள்ளது.

தற்போது பெரும்பாலான நகரங்களில் பெட்ரோல் விலை லிட்டருக்கு 94 முதல் 103 ரூபாய் வரையிலும், டீசல் 87 முதல் 90 ரூபாய் வரையிலும் நிலையாக உள்ளது. சர்வதேச விலை உயர்வால் எண்ணெய் நிறுவனங்கள் நஷ்டத்தை ஏற்றுக்கொண்டாலும், நுகர்வோர் மீது சுமையை ஏற்றாமல் அரசு பாதுகாப்பு நடவடிக்கைகளை மேற்கொண்டு வருகிறது. இத்தகைய வதந்திகளால் மக்கள் குழப்பமடைய வேண்டாம் என அமைச்சகம் கேட்டுக்கொண்டுள்ளது.

அதிகாரப்பூர்வ தகவல்களுக்கு மட்டுமே முக்கியத்துவம் அளிக்குமாறு பொதுமக்களுக்கு அறிவுறுத்தப்பட்டுள்ளது. சர்வதேச சந்தை ஏற்ற இறக்கங்களுக்கு மத்தியிலும், இந்தியாவின் எரிபொருள் விலை நிலைத்தன்மையை அரசு தொடர்ந்து உறுதி செய்யும் என்று எதிர்பார்க்கப்படுகிறது.
 

இதையும் படிங்க: குன்னூர் தொகுதியில் கள்ள ஓட்டு.? வாக்களிக்க வந்த இளைஞருக்கு காத்திருந்த அதிர்ச்சி..!!