அருணாச்சலப் பிரதேசத்தில் கடந்த சில நாட்களாகப் பெய்து வரும் கனமழை மற்றும் அதிதீவிர மழைப் பொழிவு காரணமாகப் பல்வேறு மாவட்டங்களில் திடீர் வெள்ளப்பெருக்கு மற்றும் பயங்கர நிலச்சரிவுகள் ஏற்பட்டுள்ளன. இதனால் மக்களின் அன்றாட வாழ்க்கை முற்றிலும் பாதிக்கப்பட்டுள்ளது. குறிப்பாக, கேயி பன்யோர் மாவட்டத்தில் ஏற்பட்டுள்ள கடுமையான வெள்ளப்பெருக்கு பெரும் பாதிப்பை ஏற்படுத்தியுள்ளது.

யாசாலி பகுதியில் அமைந்துள்ள நீப்கோ நீர்மின் திட்ட குடியிருப்புப் பகுதிக்கு அருகே, கட்டுமானப் பணியில் இருந்த தடுப்புச் சுவர் ஒன்று வெள்ள நீரின் தாக்குதலால் இடிந்து விழுந்தது. இந்தச் சம்பவம் பெரும் அதிர்ச்சியை ஏற்படுத்தியுள்ளது. சுவர் இடிந்ததைத் தொடர்ந்து, பெருக்கெடுத்த வெள்ளநீர் குடியிருப்புப் பகுதிக்குள் புகுந்து, தாழ்வான பகுதிகளில் இருந்த சுமார் 18 வீடுகளை மிகக் கடுமையாகச் சேதப்படுத்தியது. சில வீடுகள் முழுமையாக நீரில் மூழ்கின. இந்தத் திடீர் வெள்ளத்தில் சிக்கிய மூன்று பேர் இதுவரை காணாமல் போயுள்ளதாக மாநிலப் பேரிடர் மேலாண்மைத்துறைச் செயலாளர் தனி சூலு தெரிவித்தார். 

காணாமல் போனவர்களைத் தேடும் பணி தீவிரமாக நடைபெற்று வருகிறது. இச்சம்பவ இடத்திற்கு உடனடியாகச் சென்ற கூடுதல் துணை ஆணையர், காவல்துறை துணைக் கண்காணிப்பாளர் உள்ளிட்ட உயர் அதிகாரிகள் மீட்புப் பணிகளை முடுக்கிவிட்டுள்ளனர். மாநிலப் பேரிடர் மீட்புப் படையினர் ஏற்கனவே களத்தில் இறங்கி மீட்பு நடவடிக்கைகளைத் தொடங்கியுள்ள நிலையில், தேசியப் பேரிடர் மீட்புப் படை (NDRF) வீரர்களும் அவசர உதவிக்காக விரைந்து வந்துள்ளனர். மீட்புப் பணிகளுக்கு உதவியாக முன்னாள் ராணுவ வீரர்களும் அழைக்கப்பட்டுள்ளனர்.

இதையும் படிங்க: இன்று எங்கெங்கு மிதமான மழை பெய்யும் தெரியுமா..?? வானிலை மையம் அப்டேட்..!!

முன்னெச்சரிக்கை நடவடிக்கையாக ரங்கநதி அணையில் இருந்து உபரி நீர் திறக்கப்பட்டதால், அங்குள்ள நீர்மின் திட்டத்தில் மின் உற்பத்தி தற்காலிகமாக நிறுத்தப்பட்டுள்ளது. இதனால் அப்பகுதியில் மின்விநியோகம் பாதிக்கப்பட்டுள்ளது. மேலும், தேசிய நெடுஞ்சாலையின் பல இடங்களில் ஏற்பட்ட நிலச்சரிவு காரணமாகப் போக்குவரத்து முற்றிலும் துண்டிக்கப்பட்டுள்ளது. பொடின் மற்றும் ஹோஜ் இடையிலான சாலைகளில் டன் கணக்கில் மண் மற்றும் பாறைகள் சரிந்து விழுந்ததால் நூற்றுக்கணக்கான பயணிகள் சாலையோரங்களில் தவித்துக் கொண்டிருக்கின்றனர். 

சாலைகளை விரைவாகச் சீரமைக்கும் பணிகள் போர்க்கால அடிப்படையில் மேற்கொள்ளப்பட்டு வருகின்றன.ஆற்றுப் படுகைகள் மற்றும் நிலச்சரிவு அபாயம் உள்ள பகுதிகளில் வசிக்கும் மக்கள் மிகுந்த எச்சரிக்கையுடன் இருக்குமாறு அதிகாரிகள் அறிவுறுத்தியுள்ளனர். தொடர் மழை எச்சரிக்கை தொடரும் நிலையில், மாநிலம் முழுவதும் பேரிடர் மீட்புப் பணிகள் தீவிரப்படுத்தப்பட்டுள்ளன.
 

இதையும் படிங்க: சென்னை டூ குமரி..!! இன்று இடி, மின்னலுடன் வெளுக்கப்போகுது மழை..!! வானிலை நிலவரம்..!!