இந்திய கடற்படையின் உள்நாட்டு கப்பல் கட்டுமான திறனை வெளிப்படுத்தும் முக்கிய நிகழ்வாக, நாட்டிலேயே தயாரிக்கப்பட்ட முதல் ப்ளீட் சப்போர்ட் ஷிப் ‘சூர்யா’ சேவைக்கு வந்துள்ளது. ஆந்திரப் பிரதேசத்தின் விசாகப்பட்டினத்தில் உள்ள ஹிந்துஸ்தான் ஷிப்யார்ட் லிமிடெட் நிறுவனத்தில் நடைபெற்ற நிகழ்ச்சியில், மத்திய பாதுகாப்புத்துறை அமைச்சர் ராஜ்நாத் சிங் இந்த கப்பலை நாட்டுக்கு அர்ப்பணித்தார்.

இந்திய கடற்படைக்காக உருவாக்கப்பட்டுள்ள முதல் உள்நாட்டு Fleet Support Ship (FSS-1) என்ற பெருமையை ‘சூர்யா’ பெற்றுள்ளது. போர்க்கப்பல்கள் நீண்ட நாட்கள் கடலில் தொடர்ந்து செயல்படும்போது அவற்றுக்கு தேவையான எரிபொருள், குடிநீர், ஆயுதங்கள் மற்றும் பிற அத்தியாவசியப் பொருட்களை நடுக்கடலிலேயே வழங்கும் வகையில் இந்த கப்பல் வடிவமைக்கப்பட்டுள்ளது.

சுமார் 43,500 டன் எடை கொண்ட ‘சூர்யா’, இந்திய கடற்படையின் தொலைதூர கடல் நடவடிக்கைகளுக்கு முக்கிய ஆதரவாக இருக்கும் என எதிர்பார்க்கப்படுகிறது. இதுபோன்ற கப்பல்கள் இருப்பதால், போர்க்கப்பல்கள் அடிக்கடி துறைமுகத்துக்கு திரும்ப வேண்டிய அவசியம் குறைந்து, நீண்ட காலம் கடலில் பணியாற்றும் திறன் அதிகரிக்கும்.

இதையும் படிங்க: ஹனிட்ராப்!! பாகிஸ்தான் பெண் உளவாளி வலையில் சிக்கிய கடற்படை வீரர்? கடற்படை ரகசியங்கள் கசிவு?

இந்த கப்பல் திட்டத்தின் கீழ் மொத்தம் 5 Fleet Support Ships கட்டப்பட்டு வருகின்றன. அவற்றில் முதல் கப்பலாக ‘சூர்யா’ சேவைக்கு வந்துள்ளது. குறிப்பாக, கட்டுமானப் பணிகள் தொடங்கிய 18 மாதங்களிலேயே கப்பல் பயன்பாட்டுக்கு கொண்டுவரப்பட்டிருப்பது இந்தியாவின் கப்பல் கட்டுமான வேகத்தையும் திறனையும் எடுத்துக்காட்டுவதாக அமைந்துள்ளது.

கப்பல் கட்டுமான திறனை மேலும் அதிகரிக்கும் வகையில், ஹிந்துஸ்தான் ஷிப்யார்டில் புதிய ‘Slipway-4’ மற்றும் 300 டன் எடையை தூக்கும் திறன் கொண்ட மிகப்பெரிய கிரேனும் திறந்து வைக்கப்பட்டன. இதன் மூலம் 45,000 டன் எடை வரையிலான பெரிய கப்பல்களை இந்தியாவிலேயே கட்டமைக்கும் வசதி மேலும் மேம்படும்.

நிகழ்ச்சியில் பேசிய பாதுகாப்புத்துறை அமைச்சர் ராஜ்நாத் சிங், இந்த நாள் முக்கியமானது என்றும், இந்தியாவின் கடல்சார் திறன், கடற்படை வலிமை மற்றும் சுயசார்பு இந்தியா மீதான உறுதிப்பாட்டை இந்த நிகழ்வு மேலும் வலுப்படுத்துவதாகவும் தெரிவித்தார்.

உள்நாட்டிலேயே பெரிய கப்பல்களை கட்டும் திறன் தொடர்ந்து அதிகரித்து வரும் நிலையில், ‘சூர்யா’வின் சேவை தொடக்கம் இந்திய கடற்படையின் எதிர்கால கடல் நடவடிக்கைகளில் முக்கிய மைல்கல்லாக பார்க்கப்படுகிறது.

இதையும் படிங்க: கார் முதல் டிவி வரை இனி ‘மேட் இன் இந்தியா’ சிப்! 5 ஆண்டுகளில் இந்தியாவின் மெகா திட்டம்! மத்திய அரசின் அடுத்த இலக்கு!