தமிழ்நாட்டில் அரசினர் தொழிற்பயிற்சி நிலையங்களில் 2026-27 கல்வி ஆண்டுக்கான மாணவர் சேர்க்கை நடைபெற்று வரும் நிலையில், சேர்க்கைக்கான கால அவகாசம் நிறைவடையவிருந்த தருணத்தில் மேலும் நீட்டிக்கப்பட்டுள்ளது. தமிழ்நாடு அரசு வேலைவாய்ப்பு மற்றும் பயிற்சித்துறை சார்பில் வெளியிடப்பட்ட அறிவிப்பின்படி, நேரடி மாணவர் சேர்க்கைக்கான கால அவகாசம் ஆகஸ்ட் 31ஆம் தேதி வரை நீட்டிக்கப்பட்டுள்ளது.

இதனால் இன்னும் சேர விரும்பும் மாணவர்களுக்கு கூடுதல் வாய்ப்பு கிடைத்துள்ளது.தமிழ்நாட்டில் வேலைவாய்ப்பு மற்றும் பயிற்சித்துறையின் கீழ் 132 அரசு தொழிற்பயிற்சி நிலையங்களும், 277 தனியார் தொழிற்பயிற்சி நிலையங்களும் செயல்பட்டு வருகின்றன.

இந்த நிலையங்களில் பல்வேறு பொறியியல் மற்றும் பொறியியல் அல்லாத தொழிற்பிரிவுகளில் பயிற்சி அளிக்கப்படுகிறது. 2026-27 கல்வி ஆண்டுக்கான கலந்தாய்வு செயல்முறை ஆகஸ்ட் 14ஆம் தேதியுடன் நிறைவடைந்த நிலையில், மாணவர்களின் நலன் கருதி நேரடி சேர்க்கைக்கான கால அவகாசம் மேலும் நீட்டிக்கப்பட்டுள்ளது.

இதையும் படிங்க: சிங்கப்பெண் அதிரடிப்படை அதிரடி: ஒரே வாரத்தில் 255 புகார்கள் மீது நடவடிக்கை!

இதன் மூலம் எட்டாம் வகுப்பு அல்லது பத்தாம் வகுப்பு தேர்ச்சி பெற்ற மாணவர்கள், பிளஸ் ஒன்று, பிளஸ் இரண்டு தேர்வில் தோல்வியுற்றவர்கள் மற்றும் கல்லூரி படிப்பு முடித்தவர்கள் உள்ளிட்டோர் தங்களுக்கு விருப்பமான தொழிற்பிரிவில் சேர முடியும். தொழிற்சாலைகளில் திறன்மிக்க தொழிலாளர்களின் தேவை நாளுக்கு நாள் அதிகரித்து வருகிறது.

தமிழ்நாட்டில் பல தொழிற்சாலைகளும் பன்னாட்டு நிறுவனங்களும் செயல்படுவதால், தொழிற்பயிற்சி நிலையங்களில் பயிற்சி பெற்றவர்களுக்கு நல்ல வேலைவாய்ப்புகள் உருவாகின்றன. கடந்த ஆண்டு தொழிற்பயிற்சி நிலையங்களில் பயிற்சி முடித்தவர்களில் சுமார் 95 சதவீதம் பேர் முன்னணி தொழில் நிறுவனங்களில் வேலை பெற்றுள்ளனர். பயிற்சி முடித்த மாணவர்களுக்கு குறைந்தபட்சம் மாதம் ரூபாய் 20 ஆயிரம் முதல் திறனுக்கேற்ப ரூபாய் 30 ஆயிரம் வரை சம்பளம் கிடைக்கும் வாய்ப்பு உள்ளது. இது இளைஞர்களுக்கு நிலையான வாழ்வாதாரத்தை உறுதி செய்கிறது.

இதையும் படிங்க: "சுட்டெரிக்கும் வெயில்" - திருச்சியில் 104°F வெப்பம் பதிவு; 8 இடங்களில் 100°F-ஐத் தாண்டியது!