ஜம்மு: ஜம்மு காஷ்மீரில் பயங்கரவாதிகள் நடமாட்டம் இருப்பதாக கிடைத்த தகவல்களைத் தொடர்ந்து, ரஜவுரி, பூஞ்ச் மற்றும் கதுவா மாவட்டங்களில் பாதுகாப்புப் படையினர் தீவிர தேடுதல் நடவடிக்கையை மேற்கொண்டு வருகின்றனர். ஒரே நேரத்தில் 12 இடங்களில் இந்த சோதனை நடைபெற்று வருவதால், அந்தப் பகுதிகளில் பாதுகாப்பு பலப்படுத்தப்பட்டுள்ளது.

ரஜவுரி, பூஞ்ச் மற்றும் கதுவா மாவட்டங்களில் உள்ள அடர்ந்த வனப்பகுதிகளில் சந்தேகத்திற்கிடமான நடமாட்டம் இருப்பதாக பாதுகாப்பு அமைப்புகளுக்கு தகவல்கள் கிடைத்ததாக கூறப்படுகிறது. இதையடுத்து ஜம்மு காஷ்மீர் போலீசார், ராணுவம், சிஆர்பிஎப் மற்றும் பிஎஸ்எப் வீரர்கள் இணைந்து பல்வேறு பகுதிகளில் தேடுதல் நடவடிக்கையை தொடங்கியுள்ளனர்.

ரஜவுரி மாவட்டத்தில் பீர்கானா, போதா நரேட்டா மற்றும் காலகோட் பகுதிகளில் பாதுகாப்புப் படையினர் சோதனை மேற்கொண்டு வருகின்றனர். இந்தப் பகுதிகளில் உள்ள வனப்பகுதிகள் மற்றும் சந்தேகத்திற்கிடமான இடங்களில் தீவிரமாக கண்காணிப்பு நடத்தப்பட்டு வருகிறது.

இதையும் படிங்க: காஷ்மீரில் திடீர் துப்பாக்கிச்சூடு! லஷ்கர்-இ-தொய்பா பயங்கரவாதி சுட்டுக்கொலை! பாதுகாப்பு படை அதிரடி!

அதேபோல் கதுவா மாவட்டத்தில் பஞ்வாரி மற்றும் கதேரோ உள்ளிட்ட பகுதிகளிலும் பாதுகாப்புப் படையினர் தேடுதல் வேட்டையில் ஈடுபட்டுள்ளனர். அப்பகுதியில் சந்தேக நபர்கள் பதுங்கியிருக்கிறார்களா என்பது குறித்து வீடு மற்றும் வனப்பகுதிகளைச் சுற்றியுள்ள பகுதிகளில் சோதனை நடத்தப்பட்டு வருகிறது.

பூஞ்ச் மாவட்டத்தின் மென்தர் செக்டாரில் உள்ள அப்பர் கஸ்பலாரி, தெரடோபா, நாகல்கலி மற்றும் கலாபன் உள்ளிட்ட பகுதிகளிலும் தேடுதல் நடவடிக்கை நீடிக்கிறது. குறிப்பாக எளிதில் பதுங்கக்கூடிய வனப்பகுதிகள், மலைப்பாதைகள் மற்றும் பாதுகாப்புக்கு அச்சுறுத்தல் ஏற்படக்கூடும் என கருதப்படும் இடங்களில் வீரர்கள் சோதனை நடத்தி வருகின்றனர்.

தேடுதல் நடவடிக்கையின்போது சந்தேகத்திற்கிடமான நபர்கள், பொருட்கள் அல்லது நடமாட்டம் குறித்து பாதுகாப்புப் படையினர் தீவிரமாக கண்காணித்து வருகின்றனர். இதற்காக அந்தப் பகுதிகளில் கண்காணிப்பு மற்றும் ரோந்து பணிகளும் அதிகரிக்கப்பட்டுள்ளன.

பயங்கரவாதிகள் குறித்த தகவலின் உண்மைத் தன்மை மற்றும் தேடுதல் நடவடிக்கையின் முடிவுகள் தொடர்பாக பாதுகாப்பு அமைப்புகளிடம் இருந்து கூடுதல் தகவல்கள் வெளியாகும் என எதிர்பார்க்கப்படுகிறது. இதற்கிடையே மூன்று மாவட்டங்களிலும் முக்கிய பகுதிகளில் பாதுகாப்புப் படையினர் தொடர்ந்து கண்காணிப்பில் ஈடுபட்டு வருகின்றனர்.

இதையும் படிங்க: ஓடவும் முடியாது... ஒளியவும் முடியாது!! பயங்கரவாதத்திற்கு பின்விளைவுகள் இருக்கும்! ஐநாவில் பாகிஸ்தானுக்கு இந்தியா பதிலடி!