நாட்டின் உச்ச நீதிமன்றத்தின் அடுத்த தலைமை நீதிபதியாக நீதிபதி சூர்யகாந்த் பொறுப்பேற்பார் என அதிகாரப்பூர்வ அறிவிப்பு வெளியாகியுள்ளது. தற்போதைய தலைமை நீதிபதி பி.ஆர். கவாய்க்குப் பிறகு, நாட்டின் 53வது தலைமை நீதிபதியாக நீதிபதி சூர்யகாந்த் நியமிக்கப்பட்டுள்ளார். அவர் இந்தப் பதவியில் சுமார் 14 மாதங்கள் நீடிப்பார், மேலும் ஹரியானாவிலிருந்து வந்த முதல் தலைமை நீதிபதியாக வரலாற்றைப் படைத்துள்ளார். இது சம்பந்தமாக, அவரது பின்னணி மற்றும் அவர் வழங்கிய முக்கிய தீர்ப்புகள் பற்றிய விவரங்கள் இங்கே...

உச்ச நீதிமன்றத்தின் அடுத்த தலைமை நீதிபதியாக நீதிபதி சூர்யகாந்த் பொறுப்பேற்கவுள்ளார். தற்போதைய தலைமை நீதிபதி பி.ஆர். கவாயின் பதவிக்காலம் அடுத்த மாதம், அதாவது நவம்பர் 23 ஆம் தேதி முடிவடைகிறது. அவருக்குப் பிறகு நீதிபதி சூர்யகாந்த் தலைமை நீதிபதியாகப் பொறுப்பேற்க உள்ளார். இந்த உத்தரவில், தன்னை விட மூத்தவரான நீதிபதி சூர்யகாந்தின் பெயரை மத்திய அரசுக்கு பி.ஆர். கவாய் பரிந்துரைத்துள்ளார். இது ஜனாதிபதியின் ஒப்புதலை பெற்றதையடுத்து அது நீதிபதி சூர்யகாந்த் அடுத்த மாதம், அதாவது நவம்பர் 24 ஆம் தேதி முதல் இந்திய உச்ச நீதிமன்றத்தின் தலைமை நீதிபதியாகப் பொறுப்பேற்க உள்ளார். 

இந்த நியமனம் குறித்து உச்ச நீதிமன்றம் சமீபத்தில் ஒரு அறிக்கையை வெளியிட்டுள்ளது. அதில், நீதிபதி சூர்யகாந்த் உச்ச நீதிமன்றத்தின் தலைமை நீதிபதியாக சுமார் 14 மாதங்கள் பணியாற்றுவார். நவம்பர் 24, 2024 அன்று பொறுப்பேற்ற நாளிலிருந்து 14 மாதங்கள், அதாவது பிப்ரவரி 9, 2027 வரை அவர் தலைமை நீதிபதியாகத் தொடர்வார். அதன் பிறகு, அவர் ஓய்வு பெறுவார். உச்ச நீதிமன்றத்தின் தலைமை நீதிபதியாகப் பொறுப்பேற்ற முதல் ஹரியானா மாநிலத்தைச் சேர்ந்தவர் என்ற வரலாற்றையும் நீதிபதி சூர்யகாந்த் படைக்கவுள்ளார் எனக் குறிப்பிடப்பட்டுள்ளது.

இதையும் படிங்க: சுப்ரீம் கோர்ட் தலைமை நீதிபதி மீது செருப்பு வீச முயற்சி.. முதல்வர் மு.க ஸ்டாலின் கடும் கண்டனம்..!!

யார் இந்த சூர்ய காந்த்?

நீதிபதி சூர்யகாந்த் பிப்ரவரி 10, 1962 அன்று ஹரியானாவின் ஹிசார் மாவட்டத்தில் பிறந்தார். அவர் ஒரு நடுத்தர குடும்பத்தைச் சேர்ந்தவர். 1981 இல் தனது பட்டப்படிப்பை முடித்தார். பின்னர் 1984 இல், ரோஹ்தக்கில் உள்ள மகரிஷி தயானந்த் பல்கலைக்கழகத்தில் சட்டத்தில் பட்டம் பெற்றார். அதே ஆண்டில் வழக்கறிஞராக தனது வாழ்க்கையைத் தொடங்கினார். முதலில் ஹிசார் மாவட்ட நீதிமன்றத்தில் வழக்கறிஞராகச் சேர்ந்தார். 1985 இல் பஞ்சாப் மற்றும் ஹரியானா உயர் நீதிமன்றத்திற்குச் சென்றார். 2001 இல் மூத்த வழக்கறிஞராக அங்கீகரிக்கப்பட்டார்.

ஜனவரி 9, 2004 அன்று பஞ்சாப் மற்றும் ஹரியானா உயர் நீதிமன்றத்தின் நீதிபதியாக நியமிக்கப்படும் வரை அவர் ஹரியானாவின் அட்வகேட் ஜெனரலாகப் பணியாற்றினார். அதன் பிறகு, அக்டோபர் 5, 2018 அன்று இமாச்சலப் பிரதேச உயர் நீதிமன்றத்தின் தலைமை நீதிபதியாகவும், மே 24, 2019 அன்று உச்ச நீதிமன்ற நீதிபதியாகவும் பதவி உயர்வு பெற்றார். 2011 இல் குருக்ஷேத்ரா பல்கலைக்கழகத்தில் சட்டத்தில் முதுகலைப் பட்டத்தையும் முடித்தார்.

நீதிபதி சூர்யகாந்த் தனது 20 ஆண்டு கால சட்ட வாழ்க்கையில் பல முக்கிய தீர்ப்புகளை வழங்கியுள்ளார்.  370வது பிரிவு ரத்து செய்யப்பட்டதற்கான தீர்ப்பை வழங்கிய அமர்வில் அவர் உறுப்பினராக இருந்தார். கூடுதலாக, பேச்சு சுதந்திரம், ஊழல், பீகார் வாக்காளர் பட்டியல், சுற்றுச்சூழல், பாலின சமத்துவம் போன்ற பல முக்கிய விஷயங்களில் முக்கிய தீர்ப்புகளை வழங்கியுள்ளார். பிரிட்டிஷ் கால தேசத்துரோகச் சட்டத்தை நிறுத்தி வைத்த தீர்ப்பிலும் இவரது பங்களிப்பு முக்கியத்துவம் வாய்ந்தது.

ஆயுதப்படைகளில் ஒற்றை பதவி, ஒற்றை ஓய்வூதிய முறை அரசியலமைப்பு ரீதியாக செல்லுபடியாகும் என்று நீதிபதி சூர்யகாந்த் தீர்ப்பளித்தார். நிரந்தர சேவைகளில் பெண் அதிகாரிகளை நியமிக்கக் கோரும் மனுவையும் அவர் விசாரித்து வருகிறார். தற்போது உத்தரகாண்டில் உள்ள சார் தாம் திட்டத்தின் சுற்றுச்சூழல் மதிப்பீட்டு வழக்கில் அவர் பங்கேற்று வருகிறார். முன்னாள் டெல்லி முதல்வர் கெஜ்ரிவாலுக்கு மதுபான வழக்கில் ஜாமீன் வழங்கிய அமர்வில் நீதிபதி சூர்யகாந்த் உறுப்பினராகவும் இருந்துள்ளார். இதுவரை 300 அமர்வுகளில் உறுப்பினராக பணியாற்றியுள்ளார். அடுத்த மாதம் 24 ஆம் தேதி முதல் 53வது தலைமை நீதிபதியாக பொறுப்பேற்கவுள்ளார்.

இதையும் படிங்க: பாமக உட்கட்சி பிரச்சனைக்கு விரைவில் என்ட்கார்டு... நல்ல செய்தி சொன்ன அன்புமணி ...!