பெங்களூரு: காதலியுடன் பரஸ்பர சம்மதத்துடன் உறவு கொண்டதாகப் புகார் அளிக்கப்பட்ட வழக்கை ரத்து செய்து, கர்நாடக உயர் நீதிமன்றம் முக்கிய உத்தரவு பிறப்பித்துள்ளது. இதனால் 19 வயது இளைஞர் உடனடியாக விடுதலை செய்யப்பட உள்ளார்.

பெங்களூரைச் சேர்ந்த தனுஷ் (19) என்பவரும், 19 வயது இளம்பெண்ணும் ஒருவரையொருவர் காதலித்து வந்தனர். திருமணம் செய்து கொள்வதாக தனுஷ் உறுதியளித்ததால் இருவரும் உடல் உறவில் ஈடுபட்டனர். பின்னர் இருவருக்கும் இடையே பிரச்சினை ஏற்பட்டு பிரிந்தனர்.

இதனைத் தொடர்ந்து, திருமண வாக்குறுதி கொடுத்து தன்னை பாலியல் பலாத்காரம் செய்ததாகக் கூறி இளம்பெண் பெங்களூரு போலீசில் புகார் அளித்தார். போலீசார் வழக்குப் பதிவு செய்து தனுஷை கைது செய்து சிறையில் அடைத்தனர்.

இதையும் படிங்க: தவெகவில் இணைவும் விஜய பாஸ்கர்கள்!!! ஜூலையில் தேதி குறிச்சாச்சு!! அதிமுகவில் தொடரும் அதிருப்தி!

இந்த வழக்கை ரத்து செய்யக்கோரி தனுஷ் சார்பில் கர்நாடக உயர் நீதிமன்றத்தில் மனு தாக்கல் செய்யப்பட்டது. நீதிபதி நாகபிரசன்னா முன்னிலையில் வழக்கு விசாரணைக்கு வந்தது. விசாரணையின்போது, இருவரும் காதலித்ததாகவும், திருமணம் செய்ய தயாராக இருந்ததாகவும், பரஸ்பர சம்மதத்துடன் உறவு கொண்டதாகவும் இளம்பெண் தெரிவித்தார்.

இதை ஏற்ற நீதிபதி, “பரஸ்பர சம்மதத்துடன் நடைபெற்ற உறவை பாலியல் பலாத்காரம் என ஏற்றுக்கொள்ள முடியாது. கட்டாயப்படுத்தி பலாத்காரம் செய்ததற்கான ஆதாரம் ஏதும் இல்லை. ஆணும் பெண்ணும் சம்மதத்துடன் உறவு கொள்வது குற்றமல்ல” என்று தெளிவுபடுத்தினார்.

இதனால் தனுஷ் மீது பதிவான பாலியல் வழக்கை ரத்து செய்து, உடனடியாக அவரை விடுதலை செய்ய உத்தரவிட்டார். உத்தரவு நகலை மின்னஞ்சல் மூலம் சிறை நிர்வாகத்துக்கு அனுப்பி எந்தத் தாமதமும் இன்றி இளைஞரை விடுதலை செய்யுமாறு நீதிபதி அறிவுறுத்தினார்.

இந்த தீர்ப்பு, காதல் உறவுகளில் பிரச்சினை ஏற்பட்டால் புகார் அளிப்பதற்கும், சட்டத்தை தவறாகப் பயன்படுத்துவதற்கும் எதிரான முக்கிய முன்னுதாரணமாகப் பார்க்கப்படுகிறது. இருப்பினும், குழந்தைகள் மற்றும் பெண்களுக்கு எதிரான உண்மையான குற்றங்களுக்கு சட்டம் கடுமையாக செயல்படும் என்பதையும் நீதிமன்றங்கள் தொடர்ந்து வலியுறுத்தி வருகின்றன.

இதையும் படிங்க: "விசிக துணை"..! 5 ஆண்டுகள் தவெக ஆட்சி தொடரும்... திருமாவளவன் உறுதி..!