கரூர் மாவட்டம் வேலுசாமிபுரத்தில் செப்டம்பர் 27 அன்று நடந்த தமிழக வெற்றிக் கழக (தவெக) பிரசாரக் கூட்டத்தில் ஏற்பட்ட நெரிசலில் 41 பேர் உயிரிழந்த சம்பவம் தமிழக அரசியலில் பெரும் புயலை கிளப்பியுள்ளது. இந்த துயரச் சம்பவத்தில் தவெக தலைவர் விஜய் மீது வழக்கு பதிவு செய்யப்படாதது பல்வேறு கட்சித் தலைவர்களிடையே சர்ச்சையை ஏற்படுத்தியுள்ளது.
இதற்கிடையே, காங்கிரஸ் எதிர்க்கட்சித் தலைவர் ராகுல் காந்தி, முதல்வர் ஸ்டாலினிடம் கூறிவிட்டே விஜயை தொலைபேசியில் தொடர்பு கொண்டு பேசியதாக தமிழக காங்கிரஸ் தலைவர் செல்வப்பெருந்தகை தெரிவித்தது, கடும் எதிர்ப்பை உருவாக்கியுள்ளது.
கரூர் கூட்டத்தில், அனுமதிக்கப்பட்ட எண்ணிக்கையை விட இரு மடங்கு கூட்டம், மோசமான நிர்வாகம் மற்றும் விஜயின் தாமதமான வருகை ஆகியவை நெரிசலை ஏற்படுத்தியதாக கூறப்படுகிறது. இதில் பெரும்பாலும் பெண்களும் குழந்தைகளும் உயிரிழந்தனர். 100-க்கும் மேற்பட்டோர் காயமடைந்தனர்.
மதுரை உயர்நீதிமன்றம் இது தொடர்பாக சிறப்பு விசாரணைக் குழு (SIT) அமைக்க உத்தரவிட்டது. தவெக நிர்வாகிகள் மீது கைது நடவடிக்கைகள் தீவிரமடைந்துள்ள நிலையில், விஜய் மீது வழக்கு பதிவு செய்யப்படாதது கேள்விகளை எழுப்பியுள்ளது.
இதையும் படிங்க: விஜயை குற்றவாளி ஆக்காதீங்க! திமுகவை வீழ்த்துவதே பொது இலக்கு! அண்ணாமலை சப்போர்ட்!
கரூர் காவல் துறையினர், தவெக நிர்வாகிகள் வி.பி. மதியழகன், எம்.சி. பவுன்ராஜ் உள்ளிட்டோரை கைது செய்து, 15 நாள் நீதிமன்றக் காவல் விதித்தனர். மேலும், சமூக ஊடகத்தில் சர்ச்சைக்குரிய பதிவு செய்த தவெக நிர்வாகி ஆதவ் அர்ஜூனா மீது வழக்கு பதிவு செய்யப்பட்டு, அவர் தேடப்படுகிறார். தவெக பொதுச் செயலாளர் புஸ்ஸி ஆனந்த், இணைப் பொதுச் செயலாளர் சி.டி.ஆர். நிர்மல் குமார் ஆகியோரும் தேடப்படுகின்றனர்.
இந்நிலையில், ராகுல் காந்தி விஜயுடன் பேசியதாகவும், அதற்கு முதல்வர் ஸ்டாலினிடம் அனுமதி பெற்றதாகவும் செல்வப்பெருந்தகை கூறியது, கடும் அதிருப்தியை ஏற்படுத்தியுள்ளது. “ராகுல் தனித்து முடிவெடுக்கும் அதிகாரம் இல்லையா? ஸ்டாலின் அனுமதி தேவையா?” என சமூக வலைதளங்களில் காங்கிரசில் ஒரு கோஷ்டியினர் விமர்சித்துள்ளனர். முன்னாள் காங்கிரஸ் தலைவர் அழகிரி, “ராகுல் - விஜய் நட்பு 2009 முதல் தொடர்கிறது. இது தி.மு.க. - காங்கிரஸ் கூட்டணியை பாதிக்காது” என தெரிவித்தார்.
இந்த சம்பவம் தொடர்பாக உச்சநீதிமன்றத்தில் தவெக நிர்வாகிகளின் முன்ஜாமீன் மனு இன்று விசாரணைக்கு வர உள்ளது. இது மேலும் பரபரப்பை ஏற்படுத்தியுள்ளது. கரூர் துயரச் சம்பவம், தமிழக அரசியலில் புதிய அத்தியாயத்தை தொடங்கியுள்ளது.
இதையும் படிங்க: திமுக? அதிமுக? தவெக? என்ன முடிவு பண்ணப்போறீங்க! ராமதாஸ், அன்புமணியுடன் தனித்தனியாக சந்திப்பு!