அமலாக்கத் துறையை தொடர்ந்து, மத்திய உள்துறை அமைச்சகம் முன்னாள் டெல்லி அமைச்சர்கள் மீது வழக்கு தொடர அனுமதி அளித்துள்ளது. இது ஆம் ஆத்மி கட்சிக்கு புதிய சிக்கலை ஏற்படுத்தி உள்ளது. 

மத்திய உள்துறை அமைச்சகம் (MHA), முன்னாள் டெல்லி அமைச்சர்களான மனீஷ் சிசோடியா மற்றும் சத்யேந்தர் ஜெயின் மீது ஊழல் புகார்கள் தொடர்பாக வழக்கு தொடர அனுமதி அளித்துள்ளது. இது, அவர்களது பதவிக் காலத்தில் கல்வி மற்றும் பொதுப்பணித் துறைகளில் (PWD) நடந்ததாகக் கூறப்படும் ஊழல்கள் மீதான சட்டப் பரிசீலனையை தீவிரப்படுத்தியுள்ளது.

இதையும் படிங்க: 45 மொழிகளில் திருக்குறள்... டிஜிட்டல் மயமாகும் ஓலைச்சுவடிகள்...தமிழுக்காக பட்ஜெட்டில் பல கோடிகள் ஒதுக்கீடு....! 

ஊழல் தடுப்புச் சட்டத்தின் பிரிவு 17A-ன் கீழ் வழங்கப்பட்ட இந்த அனுமதி, 2021-ல் டெல்லியின் விழிப்புணர்வுத் துறையால் அளிக்கப்பட்ட புகாரை மீண்டும் தூசி தட்டி எடுத்துள்ளது. ஆனால் இந்த விவகாரம் சூடு பிடிக்கத் தொடங்கியுள்ளது.

இது ஆம் ஆத்மி கட்சி (AAP) தலைவர்களுக்கு புதிய சிக்கலை ஏற்படுத்தியுள்ளது. இந்த அனுமதி, லெப்டினன்ட் கவர்னர் வி.கே.சக்சேனாவின் செயலகத்திற்கு அனுப்பப்பட்டுள்ளது. இதன் மூலம், மதுபானக் கொள்கை மற்றும் போலி நிறுவனங்கள் தொடர்பான ஊழல் மற்றும் பணமோசடி குற்றச்சாட்டுகளில் 17 மாதங்களுக்கு மேல் சிறையில் இருந்த சிசோடியா மற்றும் ஜெயின் ஆகியோரை விசாரிக்க வழி ஏற்பட்டுள்ளது. அவர்களுக்கு பெரிய சிக்கலும் தலைவலியும் ஏற்படுத்தி உள்ளதால் வெளியே வருவது என்பது கேள்விக்குறியாகி உள்ளது.

ஜாமீனில் விடுவிக்கப்பட்ட இவர்கள் இருவரும், பிப்ரவரி 2025 டெல்லி சட்டமன்றத் தேர்தலில் போட்டியிட்ட தொகுதிகளில் தோல்வி அடைந்தனர். இந்தத் தேர்தலில் பாஜக அமோக வெற்றி பெற்றது. முதலமைச்சர் ரேகா குப்தா, முந்தைய ஆம் ஆத்மி ஆட்சியின் கீழ் நடந்ததாகக் கூறப்படும் அனைத்து ஊழல்கள் குறித்தும் விசாரணை நடத்துவதாக உறுதியளித்துள்ளார்.

இந்த வழக்கு, 2020-ல் லஞ்ச ஒழிப்புத்துறை அளித்த அறிக்கையிலிருந்து மீண்டும் தொடங்குகிறது. இதில், டெல்லி அரசுப் பள்ளிகளில் 193 இடங்களில் 2,405 வகுப்பறைகள் கட்டப்பட்டதில் “பகிரங்க முறைகேடுகள்” நடந்ததாகக் குற்றம் சாட்டப்பட்டது. இதற்காக ரூ.1,300 கோடி செலவிடப்பட்டது. 2015-ல் அப்போதைய முதலமைச்சர் அரவிந்த் கெஜ்ரிவால் உத்தரவிட்ட இந்த திட்டம், பொதுப்பணித் துறையின் ஆய்வில் 7,180 வகுப்பறைகள் தேவை என்று கூறப்பட்ட பின்னர், ஆரம்ப திட்டத்தை விட மூன்று மடங்கு அதிகமாக செலவிடப்பட்டுள்ளது. ஊழல் காரணமாக செலவு 90% வரை உயர்ந்தது. ரூ.500 கோடி டெண்டர் இல்லாமல் ஒப்புதல் அளிக்கப்பட்டது.

லஞ்ச ஒழிப்புத்துறை நடைமுறை மீறல்கள், டெண்டர் மோசடி மற்றும் செலவு அதிகரிப்பு ஆகியவற்றை சுட்டிக்காட்டி, கல்வி மற்றும் பொதுப்பணித் துறை அதிகாரிகளுக்கு பொறுப்பு நிர்ணயிக்க பரிந்துரைத்தது.

மத்திய உள்துறை அமைச்சகத்தின் இந்த நடவடிக்கை, ஆம் ஆத்மி கட்சியின் வளர்ச்சிக்கு எதிராக பாஜக தரப்பு அதிரடி ஆட்டத்தின் அடுத்த அடியாக இது இருக்கும்.
 

இதையும் படிங்க: சிறுபான்மையினரை குறி வைத்து தாக்குகிறது பாஜக..! அகிலேஷ் ஆவேசம்..!