நேபாளத்தில் சமூக ஊடகத் தடையைத் தொடர்ந்து எழுந்த பெரும் மக்கள் போராட்டத்தின் எதிரொலியாக, பிரதமர் கே.பி. சர்மா ஒலி தனது பதவியை ராஜினாமா செய்ததை அடுத்து, குடியரசுத் தலைவர் ராம் சந்திரா பவுடலும் இன்று தனது பதவியை ராஜினாமா செய்தார். இது நேபாள அரசியலில் பெரும் பரபரப்பை ஏற்படுத்தியுள்ளது.

கடந்த செப்டம்பர் 4ம் தேதி முதல், பேஸ்புக், இன்ஸ்டாகிராம், எக்ஸ், யூடியூப் உள்ளிட்ட 26 சமூக ஊடகங்களுக்கு நேபாள அரசு திடீர் தடை விதித்தது. இந்த முடிவு இளைஞர்கள் மற்றும் மாணவர்கள் மத்தியில் கடும் அதிருப்தியை ஏற்படுத்தியது. ‘ஜெனரல் Z’ எனப்படும் இளைய தலைமுறையினர், ஊழல், மோசமான நிர்வாகம் மற்றும் சமூக ஊடகத் தடைக்கு எதிராக நாடு தழுவிய போராட்டங்களை முன்னெடுத்தனர். 

இதையும் படிங்க: நேபாளத்தில் தொடரும் வன்முறை.. இந்தியர்களுக்கு உதவி எண்கள் அறிவிப்பு..!!

தலைநகர் காட்மாண்டுவில் நடைபெற்ற போராட்டங்கள் வன்முறையாக மாறி, 22 பேர் உயிரிழந்தனர், 300-க்கும் மேற்பட்டோர் காயமடைந்தனர். இதனால் அரசு தடையை நீக்கிய போதிலும், மக்களின் கோபம் தணியவில்லை. போராட்டக்காரர்கள் அரசியல் தலைவர்களின் வீடுகளைத் தாக்கி, பிரதமர் ஒலியின் ராஜினாமாவை வலியுறுத்தினர். இதையடுத்து, ஒலி தனது பதவியை விட்டு விலகினார். 

இந்நிலையில், அரசியல் நெருக்கடி மற்றும் போராட்டங்களின் அழுத்தம் காரணமாக, குடியரசுத் தலைவர் ராம் சந்திரா பவுடலும் தனது பதவியை ராஜினாமா செய்தார். இந்த இரு முக்கிய தலைவர்களின் விலகல், நேபாளத்தில் அரசியல் குழப்பத்தை தீவிரப்படுத்தியுள்ளது. நேபாள அரசு, வன்முறை குறித்து விசாரிக்க குழு அமைத்து, சமூக ஊடகத் தடையை ரத்து செய்துள்ளது. 

இருப்பினும், ஊழல் மற்றும் பொருளாதார நெருக்கடி குறித்த மக்களின் அதிருப்தி தொடர்கிறது. தற்போது, நாட்டில் இயல்பு நிலை திரும்புவதற்கு முயற்சிகள் மேற்கொள்ளப்பட்டாலும், புதிய தலைமைக்கான தேடல் மற்றும் அரசியல் நிலைத்தன்மை மீதான கேள்விகள் நீடிக்கின்றன.

இதையும் படிங்க: நேபாளத்தில் தொடரும் வன்முறை.. இந்தியர்களுக்கு உதவி எண்கள் அறிவிப்பு..!!