இந்தியாவில் புற்றுநோயால் பாதிக்கப்பட்டுள்ள லட்சக்கணக்கான நோயாளிகள் மற்றும் அவர்களது குடும்பங்களுக்கு மிகப்பெரிய பொருளாதார நிவாரணம் அளிக்கும் வகையில், புற்றுநோய் சிகிச்சைக்குப் பயன்படுத்தப்படும் 137 முக்கிய மருந்துகளை மத்திய அரசு தனது நேரடி விலைக் கட்டுப்பாட்டுப் பட்டியலில் சேர்த்துள்ளது; மேலும், இம்மருந்துகளுக்கான மொத்த வர்த்தக லாப வரம்பை (Trade Margin) அதிகபட்சமாக 30 சதவீதமாக நிர்ணயித்து தேசிய மருந்துகள் விலை நிர்ணய ஆணையம் (NPPA) அதிரடி உத்தரவு பிறப்பித்துள்ளது.

இந்தியாவில் நாளுக்கு நாள் அதிகரித்து வரும் புற்றுநோய் பாதிப்புகளுக்கு மத்தியில், அதற்கான சிகிச்சை மற்றும் மருந்துகளின் விலை விண்ணைத் தொடும் அளவுக்கு இருந்து வருகிறது. கீமோதெரபி மற்றும் இம்யூனோதெரபி உள்ளிட்ட சிகிச்சைகளுக்குத் தேவைப்படும் பல முக்கிய மருந்துகள், உற்பத்தி விலையை விடவும் பல மடங்கு அதிக விலைக்குத் தனியார் மருந்து நிறுவனங்கள் மற்றும் மருத்துவமனைகளால் விற்பனை செய்யப்பட்டு வந்தன. இதனால், சிகிச்சையைத் தொடர முடியாமல் பல ஏழை, எளிய மற்றும் நடுத்தரக் குடும்பங்கள் பொருளாதார ரீதியாகக் கடுமையாக நிலைகுலைந்து போகும் சூழல் நிலவி வந்தது.

இப்பிரச்சினைக்கு முற்றுப்புள்ளி வைக்கும் வகையில், மத்திய ரசாயனம் மற்றும் உரங்கள் அமைச்சகத்தின் கீழ் இயங்கும் தேசிய மருந்துகள் விலை நிர்ணய ஆணையம், 'வர்த்தக லாப வரம்பு சீரமைப்பு' (Trade Margin Rationalisation - TMR) கொள்கையின் கீழ் விரிவான ஆய்வுகளை மேற்கொண்டது.

இதையும் படிங்க: பெட்ரோல் ஏற்றுமதி வரி உயர்வு; டீசல் வரி குறைப்பு..!! அதிரடி காட்டிய மத்திய அரசு!!

அதன் அடிப்படையில் பிறப்பிக்கப்பட்டுள்ள புதிய உத்தரவின் முக்கிய அம்சங்கள்:

137 புற்றுநோய் மருந்துகள் சேர்ப்பு: இதுவரை அரசின் கட்டுப்பாட்டு வரம்பிற்குள் வராத 137 வகையான புற்றுநோய் சிகிச்சைக்கான மருந்துகள் மற்றும் வேதிப்பொருட்கள் உடனடியாக விலைக் கட்டுப்பாட்டு வரம்பிற்குள் கொண்டு வரப்பட்டுள்ளன.

30% லாப வரம்பு நிர்ணயம்: உற்பத்தியாளர் அல்லது இறக்குமதியாளர் விற்கும் விலையிலிருந்து (Price to Stockist), சில்லறை விற்பனையாளர் மற்றும் மருத்துவமனைகள் நுகர்வோருக்கு விற்கும் இறுதி சில்லறை விலைக்கான (MRP) மொத்த லாப வரம்பு 30 சதவீதத்திற்கு மிகாமல் மட்டுமே இருக்க வேண்டும் என உச்சவரம்பு விதிக்கப்பட்டுள்ளது.

கணிசமாகக் குறையும் விலை: இந்த அதிரடி நடவடிக்கையின் மூலம் சந்தையில் பல ஆயிரம் ரூபாய்க்கு விற்கப்பட்டு வந்த முக்கிய புற்றுநோய் மருந்துகளின் விலை 50% முதல் 80% வரை வெகுவாகக் குறைய வாய்ப்பு உருவாகியுள்ளது.

அரசு நிர்ணயித்துள்ள இந்த 30 சதவீத லாப வரம்பை மீறி எந்தவொரு மருந்து உற்பத்தி நிறுவனமோ, விநியோகஸ்தரோ அல்லது மருத்துவமனை மருந்தகங்களோ அதிகபட்ச விலைக்கு மருந்துகளை விற்பனை செய்தால், அவர்கள் மீது மருந்து விலைக் கட்டுப்பாட்டு ஆணை (DPCO) மற்றும் அத்தியாவசியப் பொருட்கள் சட்டத்தின் கீழ் மிகக் கடுமையான குற்றவியல் நடவடிக்கை எடுக்கப்படும் என மத்திய அரசு எச்சரித்துள்ளது.

நீண்ட நாட்களாக மருத்துவ வல்லுநர்கள் மற்றும் பொதுமக்கள் கோரி வந்த இந்த வரலாற்றுச் சிறப்புமிக்க நடவடிக்கை, புற்றுநோய் சிகிச்சையை அனைவருக்கும் எளிய விலையில் கிடைக்கச் செய்வதற்கான மிக முக்கியமான மைல்கல்லாகப் பார்க்கப்படுகிறது.

இதையும் படிங்க: நவ.1 முதல்.. இனி ஃபோன் செய்பவர்களின் பெயர் ஸ்க்ரீனில்.. போலி அழைப்புகளுக்கு செக் வைத்த மத்திய அரசு..!!