சென்னை: சிறுபான்மையினரை பாதுகாப்பதில் தங்களுக்கு நிகர் யாரும் இல்லை என்று அடிக்கடி கூறிவரும் தி.மு.க.,வின் சட்டமன்றத் தேர்தல் வேட்பாளர் பட்டியலில் முஸ்லிம் சமூகத்தைச் சேர்ந்தவர்கள் வெறும் நான்கு பேர் மட்டுமே இடம் பெற்றுள்ளது பெரும் பரபரப்பை ஏற்படுத்தியுள்ளது.

தி.மு.க., 164 தொகுதிகளில் நேரடியாகப் போட்டியிடும் நிலையில், அக்கட்சியின் சார்பில் பாளையங்கோட்டை தொகுதியில் அப்துல் வஹாப், ராயபுரத்தில் சுபேர்கான், செஞ்சியில் மஸ்தான் மற்றும் ஆவடியில் நாசர் ஆகிய நான்கு பேர் மட்டுமே வேட்பாளர்களாக அறிவிக்கப்பட்டுள்ளனர்.

கூட்டணி கட்சிகளைப் பொறுத்தவரை, இந்திய யூனியன் முஸ்லிம் லீக் சார்பில் பாபநாசம் தொகுதியில் ஷாஜகான், வாணியம்பாடியில் சையது பாரூக் ஆகிய இருவரும், மனிதநேய ஜனநாயக கட்சி சார்பில் சிதம்பரத்தில் தமிமுன் அன்சாரியும் போட்டியிடுகின்றனர். விடுதலை சிறுத்தைகள் கட்சி சார்பில் பண்ருட்டியில் அப்துல் ரகுமான் களமிறங்குகிறார். ஆனால், தே.மு.தி.க., சார்பில் ஒரு முஸ்லிம் வேட்பாளர் கூட இல்லை. மாறாக, அக்கட்சி நாயுடு சமூகத்தைச் சேர்ந்த ஆறு பேருக்கு வாய்ப்பு அளித்துள்ளது.

இதையும் படிங்க: சீட் தரலைனு குள்ளநரி வேலையை பாக்காதீங்க!! பதவி பறிகொடுக்க நேரிடும்!! மு.க.ஸ்டாலின் வார்னிங்!

இந்திய கம்யூனிஸ்ட் கட்சி ஐந்து தொகுதிகளிலும், மார்க்சிஸ்ட் கம்யூனிஸ்ட் கட்சி நான்கு தொகுதிகளிலும் போட்டியிடும் நிலையில், அந்த இரு கட்சிகளும் முஸ்லிம் வேட்பாளர்களை அறிவிக்கவில்லை.

தி.மு.க., கூட்டணியில் காங்கிரஸுக்கு 28 தொகுதிகள், தே.மு.தி.க.,வுக்கு 10 தொகுதிகள், விடுதலை சிறுத்தைகள் கட்சிக்கு 8 தொகுதிகள் உட்பட மொத்தம் 70 தொகுதிகள் ஒதுக்கப்பட்டுள்ளன. இந்த சூழலில் தி.மு.க., சார்பில் மிகக் குறைந்த எண்ணிக்கையிலான முஸ்லிம் வேட்பாளர்கள் மட்டுமே இடம் பெற்றிருப்பது, கட்சியின் சிறுபான்மையினர் நல அக்கறை குறித்து பல்வேறு கேள்விகளை எழுப்பியுள்ளது.

தி.மு.க.,வின் இந்த வேட்பாளர் தேர்வு சிறுபான்மை சமூகத்தினரிடையே ஏமாற்றத்தை ஏற்படுத்தியுள்ளதாக அரசியல் வட்டாரங்கள் தெரிவிக்கின்றன. இருப்பினும், கூட்டணி கட்சிகள் மூலம் சில தொகுதிகளில் முஸ்லிம் வேட்பாளர்கள் களமிறக்கப்பட்டுள்ளனர்.

தமிழ்நாடு சட்டமன்றத் தேர்தல் 2026 நெருங்கும் வேளையில், வேட்பாளர் பட்டியலில் சமூக சமநிலை குறித்த விவாதம் தீவிரமடைந்துள்ளது. தி.மு.க., தலைமை இந்த விவகாரத்துக்கு எப்படி பதிலளிக்கும் என்பதை அரசியல் அவதானிகள் உன்னிப்பாக கவனித்து வருகின்றனர்.

இதையும் படிங்க: சென்னை மயிலாப்பூரில் பிரதமர் மோடி பிரசாரம்!! மீண்டும் தமிழகம் விசிட்! தேதி குறிச்சாச்சு! பரபரக்கும் பாஜகவினர்!