சென்னை: தமிழக சட்டசபைத் தேர்தல் முடிவுகள் மே 4-ம் தேதி வெளியான பிறகு, எந்தக் கட்சிக்கும் தெளிவான பெரும்பான்மை கிடைக்காததால் புதிய அரசு அமைப்பதில் தொடர்ந்து சிக்கல் நீடித்து வருகிறது. இந்நிலையில், தமிழக வெற்றிக் கழகம் (த.வெ.க.) தலைவர் விஜய்யுக்கு மட்டுமே ஆட்சி அமைக்கும் வாய்ப்பு இருப்பதாக மார்க்சிஸ்ட் கம்யூனிஸ்ட் கட்சியின் தேசிய பொதுச் செயலாளர் எம்.ஏ. பேபி திட்டவட்டமாகக் கூறியுள்ளார்.

108 தொகுதிகளில் வெற்றி பெற்ற த.வெ.க.வுடன் காங்கிரஸ் ஏற்கெனவே கூட்டணி வைத்துள்ளது. பெரும்பான்மைக்குத் தேவையான ஆதரவைப் பெற வி.சி.க. மற்றும் கம்யூனிஸ்ட் கட்சிகளிடம் த.வெ.க. ஆதரவு கோரியுள்ளது. இது குறித்து அந்தக் கட்சிகள் தீவிர ஆலோசனை நடத்தி வருகின்றன.

இந்நிலையில், எம்.ஏ. பேபி அளித்த பேட்டியில், “மக்கள் தீர்ப்புக்கு மதிப்பளிக்க வேண்டும். அ.தி.மு.க.வுக்கு தேவையான ஆதரவு கிடைக்கப் போவதில்லை. சட்டமன்ற உறுப்பினர்களை வேறு எங்கிருந்தும் வரவழைக்க முடியாது. 

இதையும் படிங்க: நாமதான் ஆட்சி அமைப்போம்! உறுதியா இருங்க!! தவெக எம்.எல்.ஏ-க்களுக்கு தைரியம் சொன்ன மூத்த நிர்வாகிகள்!

விஜய்யை ஆட்சி அமைக்க கவர்னர் அழைக்க வேண்டும். வி.சி.க. மற்றும் கம்யூனிஸ்ட் கட்சிகள் இதற்குத் தேவையான நடவடிக்கைகளை எடுக்கும். எங்கள் மதிப்பீட்டின்படி, சட்டமன்றம் கூடும்போது பெரும்பான்மையுடன் ஆட்சி அமைக்கும் வாய்ப்பு த.வெ.க.வுக்கு மட்டுமே உள்ளது” என்றார்.

தேர்தல் முடிவுகளுக்குப் பின் தமிழக அரசியல் களம் பெரும் பரபரப்பில் உள்ளது. த.வெ.க.வுக்கு ஆதரவு அளிப்பது குறித்து வி.சி.க. மற்றும் இடதுசாரி கட்சிகள் தங்கள் செயற்குழு கூட்டங்களில் தீவிரமாக விவாதித்து வருகின்றன. மறுபுறம், தி.மு.க. எதிர்க்கட்சியாக செயல்பட விருப்பம் தெரிவித்துள்ள நிலையில், அ.தி.மு.க. தி.மு.க. ஆதரவுடன் ஆட்சி அமைக்க முயற்சிப்பதாகவும் தகவல்கள் வெளியாகியுள்ளன.

இந்த சூழலில் எம்.ஏ. பேபியின் கருத்து முக்கியத்துவம் பெற்றுள்ளது. மக்கள் வாக்குகளுக்கு மதிப்பளித்து, பெரும்பான்மை பலத்தைக் கொண்ட கட்சிக்கு ஆட்சி அமைக்க வாய்ப்பு அளிக்க வேண்டும் என அவர் வலியுறுத்தியுள்ளார். அடுத்த சில நாட்களில் வி.சி.க. மற்றும் கம்யூனிஸ்ட் கட்சிகளின் இறுதி முடிவுகள் வெளியாகும் என எதிர்பார்க்கப்படுகிறது.

தமிழகத்தில் தொங்கு சட்டசபை நிலை உருவாகியுள்ளதால், அரசியல் கட்சிகளின் பேச்சுவார்த்தைகள் தீவிரமடைந்துள்ளன. விரைவில் தெளிவான முடிவு எட்டப்படும் என அரசியல் பார்வையாளர்கள் தெரிவிக்கின்றனர். 

இதையும் படிங்க: கவர்னர் ஆதாரம் கேட்பது தவறா? புதிய அரசு அமைக்க காலக்கெடு இருக்கா? அலசல்!!